ភ្នំពេញ ៖ ក្រុមជនសង្ស័យ២នាក់ បានដកកាំភ្លើងម៉ាកកា៥៩បាញ់ចំនួន២គ្រាប់ ដើម្បីគំរាមម្ចាស់ម៉ូតូ ខណៈដែលពួកគេកាច់កម៉ូតូដល់ក្នុងផ្ទះបានហើយនៅម្ដុំផ្លូវ៥៩៨ ជិះគេចខ្លួនដោយជនរងគ្រោះដេញតាមពីក្រោយស្រែកថាចោរៗ ហើយក្រុមចោរក៏ផ្តួលម៉ូតូចោលរត់ឡើងម៉ូតូបក្ខពួកវាគេចខ្លួនបាត់តែម្តង តែមិនបណ្តាលឲ្យត្រូវអ្នកណាឡើយ។
ករណីនេះបង្កឲ្យភ្ញាក់ផ្អើមនៅវេលាម៉ោងជាង១១ព្រឹកថ្ងៃទី២៤ ខែកញ្ញា ឆ្នាំ២០១៨នេះ នៅម្ដុំផ្សារសាំហាន់ ភូមិទួលសំពៅផ្លូវ១០៧សង្កាត់ទួលសង្កែ ១ខណ្ឌឫស្សីកែវ។
បើតាមសម្ដីរបស់ជនរងគ្រោះថា មុនពេលកើតហេតុ មានជនសង្ស័យ២នាក់ បានធ្វើសកម្មភាពចូលទៅកាច់កម៉ូតូរបស់គាត់ នៅក្នុងផ្ទះតាមផ្លូវ៥៩៨ (ផ្លូវជាសុផារ៉ា )ម្ដុំស្ថានីយទូរទស្សន៍ប៉ុស្ដិ៍លេខ៣ ភូមិពោងពាយសង្កាត់ទួលសង្កែ២ ខណ្ឌឫស្សីកែវហើយជិះចេញចេញពីក្នុងផ្ទះ ជនរងគ្រោះក៏បានដេញតាមស្រាប់តែប្រទះឃើញម៉ូតូ របស់ខ្លួននិងជនសង្ស័យ កំពុងអង្គុយលើម៉ូតូធ្វើមិនដឹងនៅក្បែរស្ថានីយប្រេង PTT ជិតផ្សារសាំហាន់ ក៏ស្រែកផ្អើលឆោឡោឡើងដើម្បីឲ្យគេឯងជួយ។ ស្របពេលដែលជនរងគ្រោះ កំពុងទៅជិតម៉ូតូទៅជិតភា្លមនោះស្រាប់តែជនសង្ស័យ ម្នាក់ទៀតស្រែកថា ឯកកុំដើរចូលមកប្រយ័ត្នអញបាញ់ភ្លាមៗពួកវាម្នាក់ទៀតក៏បានដកកាំភ្លើងបាញ់មួយគ្រាប់ តែខុសហើយផ្តួលម៉ូតូរបស់ជនរងគ្រោះចោលរត់ឡើងជិះម៉ូតូបក្ខពួកវាដើម្បីគេចខ្លួន ក៏បាញ់កាំភ្លើងមួយគ្រាប់បន្ថែមទៀត ទើបជនសង្ស័យគេចចេញពីកន្លែងកើតហេតុបាត់តែម្ដង។
ជនរងគ្រោះមានឈ្មោះ គង់ គីម ភេទប្រុស អាយុ២៩ឆ្នាំ មុខរបរមន្ត្រីរាជការ ស្នាក់នៅភូមិពោងពាយ សង្កាត់ទួលសង្កែ២ ខណ្ឌឫស្សីកែវ រាជធានីភ្នំពេញ។
ម៉ូតូដែលចោរកាច់សោ-កនោះម៉ាក ហុងដាឌ្រីមសង់ សេ១២៥ ស៊េរីឆ្នាំ២០១២ ពណ៌ខ្មៅ ពាក់ស្លាកលេខ ភ្នំពេញ 1BX-1073។
ទោះយ៉ាងណាសម្រាប់ហេតុការណ៍ក្រុមចោរផ្ទុះអាវុធ២គ្រាប់នេះ មិនបណ្ដាលឲ្យមានពលរដ្ឋណាម្នាក់រងគ្រោះថ្នាក់នោះទេ ហើយក្រុមជនសង្ស័យ ក៏បានគេចខ្លួនចោលម៉ូតូដែលកាច់កបាននោះផងដែរ។
ក្រោយកើតហេតុកម្លាំងនគរបាលមូលដ្ឋាន និងកម្លាំងកងរាជអាវុធហត្ថមូលដ្ឋាន បានចេញជួយអន្ដរាគមន៍ នៅកន្លែងកើតហេតុដោយរកឃើញសំបកគ្រាប់កាំភ្លើងម៉ាកកា៥៩ចំនួន២គ្រាប់ហើយសមត្ថកិច្ចរើសយកដើម្បីស្រាវជ្រាវរកក្រុមជនសង្ស័យផងដែរ៕
Source: Kampuchea Thmey Daily
0 Comments