រដ្ឋាភិបាល​អូស្ត្រាលី​ស្ថិតក្រោម​ការគំរាមកំហែង ​ខណៈ​អ្នកបោះឆ្នោត​ដាក់ទណ្ឌកម្ម​លើ​ជម្លោះ​នយោបាយ

រដ្ឋាភិបាលកណ្តាល​រប​ស់​ប្រទេស​អូស្ត្រាលី​បាន​វិលត្រឡប់​ទៅកាន់​សភា​វិញ​ហើយ​នៅ​ថ្ងៃ​ចន្ទ​សម្រាប់​ជា​លើកដំបូង​ចាប់តាំងពី​មាន​បែកបាក់​អំពី​ភាពជា​អ្នកដឹកនាំ​ហើយ​ប្រឈម​នឹង​ការស្ទង់មតិ​មួយ​ដែល​ចង្អុលបង្ហាញ​ពី​ការបរាជ័យ​យ៉ាងធ្ងន់ធ្ងរ​នៅក្នុង​ការបោះឆ្នោត​មួយ​ដែល​គ្រោង​នឹងធ្វើ​ឡើង​នៅ​ខែឧសភា​ឆ្នាំក្រោយ​។​
​
ជាការ​ពិត ការបរាជ័យ​ដ៏​ធំ​សម្រាប់​គណបក្ស​សេរីនិយម​ក្នុងការ​បោះឆ្នោត​បំពេញបន្ថែម​នៅ​រដ្ឋ New South Wales កាលពី​ចុង​សប្តាហ៍​បានធ្វើ​ឲ្យ​មាន​ហានិភ័យ​ដល់​រដ្ឋាភិបាល​នៃ​ការបាត់បង់​សំឡេង​ភាគច្រើន​របស់ខ្លួន​នៅពេលដែល​ការបោះឆ្នោត​បំពេញបន្ថែម​មួយទៀត​សម្រាប់​អាសនៈ​របស់​អតីត​នាយករដ្ឋមន្ត្រី​លោក Malcolm Turnbull ត្រូវបាន​ធ្វើឡើង​។​
​
លោក Turnbull ត្រូវបាន​ទម្លាក់​ដោយ​គណបក្ស​សេរីនិយម​ដែលជា​ដៃគូ​ដ៏​សំខាន់​នៅក្នុង​សម្ព័ន្ធភាព​កំពុងកាន់​អំណាច​នៅក្នុង​ការបោះឆ្នោត​គណបក្ស​កាលពី​ចុងខែ​សីហា​និង​បាន​ជំនួស​វិញ​ដោយ​លោក Scott Morrison ។​
​
អ្នកបោះឆ្នោត​ដែល​ត្រូវ​ប្រឈមមុខ​ជាមួយនឹង​នាយករដ្ឋមន្ត្រី​ទី​៦​របស់ខ្លួន​ក្នុងពេល​តិចជាង​១០​ឆ្នាំ​មកនេះ​គឺ​មិនទាន់បាន​សម្រេចចិត្ត​នៅឡើយ​ទេ​។​
​
ការស្ទង់មតិ Newspoll ក្នុង​កាសែត​អូស្ត្រាលី​នៅ​ថ្ងៃ​ចន្ទ​បាន​បង្ហាញថា ក្រុមចម្រុះ​នេះ​នឹង​បាត់បង់​អាសនៈ​រហូតដល់​៣០​បើសិនជា​ការបោះឆ្នោត​មួយ​ត្រូវបាន​ប្រារព្ធ​ឡើង​នាពេល​ឥឡូវនេះ​។ បច្ចុប្បន្ននេះ វា​មាន​សំឡេង​ភាគច្រើន​តែមួយ​ប៉ុណ្ណោះ​នៅក្នុង​សភា​ជាន់​ទាប​។​
​
ការស្ទង់មតិ​លើ​អ្នកបោះឆ្នោត​ចំនួន​១,៦៥៣​នាក់​បាន​បង្ហាញថា គណបក្ស​ការងារ​ដែលជា​បក្សប្រឆាំង​បាន​នាំមុខ​៥៦​ទល់​៤៤​សំឡេង​លើ​មូលដ្ឋាន​បក្ស​ពីរ​។​
​
វា​គឺជា​ការ​ចាញ់​លើក​ទី​៤០​ជាប់ៗ​គ្នា​ក្នុង​ការស្ទង់មតិ​សម្រាប់​ក្រុមចម្រុះ​និង​ជាការ​ធ្លាក់ចុះ​យ៉ាងខ្លាំង​ពី​លទ្ធផល​៥១​ទល់​៤៩​នៅក្នុង​ថ្ងៃ​ចុងក្រោយ​នៃ​ការដឹកនាំ​របស់លោក Turnbull​។​
​
លោក Morrison បាន​ប្រើ​រយៈពេល​ពីរ​សប្តាហ៍​ដំបូង​នៃ​ការ​កាន់តំណែង​របស់ខ្លួន​ដើម្បី​បង្ហាញ​ពី​រូបភាព​នៃ​ឪពុក​របស់គាត់​ហើយ​បានធ្វើ​ដំណើរ​ទៅ​ជនបទ​ដើម្បី​ប្រាប់​ឲ្យ​ប្រជាជន​អូស្ត្រាលី​ស្រឡាញ់គ្នា​ទៅវិញទៅមក​។​
​
ទោះបីជា​យ៉ាងណាក៏ដោយ អ្នកបោះឆ្នោត​បានបង្ហាញ​ពី​ការមិនសប្បាយចិត្ត​រប​ស់​ពួកគេ​ចំពោះ​ជម្លោះ​នយោបាយ​តាមរយៈ​ការដាក់ទណ្ឌកម្ម​គណបក្ស​សេរីនិយម​នៅក្នុង​អាសនៈ​រដ្ឋ New South Wales នៅ​ចុង​សប្តាហ៍​។​
​
តួលេខ​គណៈកម្មាធិការ​បោះឆ្នោត​អូស្ត្រាលី​កាលពី​ថ្ងៃអាទិត្យ​បាន​បង្ហាញថា មានការ​កើនឡើង​២៩​ភាគរយ​ប្រឆាំងនឹង​គណបក្ស​សេរីនិយម​ក្នុងការ​បោះឆ្នោត​ចំណង់​ចំណូលចិត្ត​លើកដំបូង​៕ REUTERS

​

Source: Kampuchea Thmey Daily