រដ្ឋាភិបាលបាននិយាយកាលពីថ្ងៃចន្ទថា ចំនួនអ្នកស្លាប់ពីការរញ្ជួយដីដ៏ខ្លាំងក្លានៅភាគខាងជើងប្រទេសជប៉ុនកាលពីសប្ដាហ៍មុន បានកើនឡើងដល់៤៤នាក់និង៦៦០នាក់ រងរបួស ខណៈដែលការផ្គត់ផ្គង់អគ្គិសនីនៅតែត្រូវកាត់ផ្តាច់ ហើយក្រុមហ៊ុនផលិតរថយន្តកំពូល Toyota បានផ្អាកការងារនៅរោងចក្រដំឡើងភាគច្រើនរបស់ខ្លួន។
ការរញ្ជួយដីកម្រិត៦.៧រ៉ិចទ័រកាលពីព្រឹកថ្ងៃព្រហស្បតិ៍មុនបានវាយប្រហារកោះហុកកៃដូដោយបានកាត់ផ្តាច់ការចូលតាមផ្លូវអាកាសនិងរថភ្លើងហើយកាត់ផ្តាច់អគ្គិសនីទៅកោះមួយនេះដែលមានទំហំប៉ុនប្រទេសអូទ្រីស។
យោងតាមទីភ្នាក់ងារគ្រប់គ្រងគ្រោះមហន្តរាយនិងអគ្គិភ័យបានឲ្យដឹងថា មានមនុស្សប្រហែល២,៥០០នាក់កំពុងស្ថិតនៅក្នុងមណ្ឌលជម្លៀសបន្ទាប់ពីការបាក់ដីបានកប់ផ្ទះហើយភ្លៀងនៅថ្ងៃចុងសប្តាហ៍បានច្រោះដីដែលជាហេតុគំរាមកំហែងបន្ថែមទៀតដល់ផ្ទះទ្រុឌទ្រោម។
លោក Yoshihide Suga អ្នកនាំពាក្យរដ្ឋាភិបាលជាន់ខ្ពស់បាននិយាយថា កងកម្លាំងស្វ័យការពារ ប៉ូលិស អ្នកពន្លត់អគ្គិភ័យនិងអ្នកដទៃទៀតដែលសរុបមានគ្នាប្រហែល៤០,០០០នាក់កំពុងធ្វើការសម្អាតកម្ទេចកម្ទីនិងប្រតិបត្តិការបោសសម្អាតផ្សេងទៀត។ លោកបាននិយាយថា មិនមានអ្នកស្រុកបាត់ខ្លួនទៀតទេ។
ការផ្គត់ផ្គង់ថាមពលត្រូវបានស្តារឡើងវិញដល់អតិថិជនស្ទើរតែទាំងអស់នៅកោះហុកកៃដូប៉ុន្តែរដ្ឋមន្ត្រីក្រសួងពាណិជ្ជកម្មលោក Hiroshige Seko បានអំពាវនាវឲ្យមានការធ្វើជំនួញលើកោះនេះហើយប្រជាជន៥.៣លាននាក់ត្រូវប្រើប្រាស់ថាមពលតិចជាង២០ភាគរយដើម្បីទប់ស្កាត់ការដាច់ចរន្តអគ្គិសនីបន្ថែមទៀត។
ខណៈភ្លើងអគ្គិសនីត្រូវបានស្តារឡើងវិញនោះ ក្រុមហ៊ុន Toyota Motor Corp បាននិយាយកាលពីថ្ងៃចន្ទថា រោងចក្រផលិតគ្រឿងបន្លាស់របស់ខ្លួននៅទីក្រុង Tomakomai លើកោះហុកកៃដូកំពុងរៀបចំការផលិតឡើងវិញនៅវេនពេលយប់។
ទោះបីជាយ៉ាងណាក៏ដោយ ការធ្លាក់ចុះបានរីករាលដាលរួចទៅហើយក្រៅកោះនេះដោយក្រុមហ៊ុន Toyota បានផ្អាកផលិតកម្មនៅរោងចក្រដំឡើងរថយន្តក្នុងស្រុកចំនួន១៦ក្នុងចំណោមរោងចក្រផលិតរថយន្តក្នុងស្រុកចំនួន១៨របស់ខ្លួនកាលពីថ្ងៃចន្ទដើម្បីធ្វើការវាយតម្លៃអំពីស្តុកគ្រឿងបន្លាស់។ ក្រុមហ៊ុនផលិតរថយន្តមួយនេះបាននិយាយថា ខ្លួននឹងស្តារផលិតកម្មឡើងវិញពីថ្ងៃអង្គារហើយធ្វើការវិញពេញលេញត្រឹមថ្ងៃព្រហស្បតិ៍៕ REUTERS
[caption id="attachment_973898" align="alignnone" width="960"]
[/caption]Source: Kampuchea Thmey Daily
0 Comments