ភ្នំពេញ ៖ រថយន្តឡិចស៊ីសRX ៣០០មួយគ្រឿងដែលបញ្ជាចង្កូតដោយម្ចាស់ស្រវឹងធ្លាក់ភ្នែកបានជ្រុលទៅបុកក្បាលនាគរបាំងពុះចែកទ្រូងផ្លូវហើយក៏វិលហោះឡើងចិញ្ចើមផ្លូវទៅបុកដាច់ដើមឈើ១ដើម និង បុកទ្វារដែលផ្ទះប្រជាពលរដ្ឋនៅក្បែរនោះ ហើយអ្នកបើកបរប្រញាប់គេចខ្លួនបាត់តែម្តង។
ហេតុការណ៍នោះ បានកើតឡើងកាលពីម៉ោង០និង៣០នាទី ថ្ងៃទី២២ ខែកញ្ញា ឆ្នាំ២០១៨មុខផ្ទះលេខA25 ផ្លូវសហព័ន្ធរុស្ស៊ី សង្កាត់ស្រះចក ខណ្ឌដូនពេញ។
សមត្ថកិច្ចបានឲ្យដឹងថា ករណីគ្រោះថ្នាក់ចរាចរណ៍មួយនោះកើតឡើងរវាងរថយន្ដ ម៉ាកលុចស៊ីសRX300ពាក់ស្លាកលេខ2M9226ភ្នំពេញបើកបុករបាំងថ្មពុះចែកទ្រូងផ្លូវ បណ្ដាល អោយរលំអស់មួយកង់ហើយរេចង្កូតទៅបុកបាក់ដើមឈើ០១ដើមនិងខូចទ្វារបងផ្ទះមួយផ្ទាំងទៀត។
ប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញរថយន្ត១គ្រឿងម៉ាកឡិចស៊ីសX300 ពាក់ស្លាកលេខ2M-9226 បើកបរដោយបុរសម្នាក់មិនដឹងចេញពីកន្លែងណានោះទេបានបើកបោះពួយនិងរេពេញផ្លូវសហព័ន្ធរុស្ស៊ីពីកើតទៅលិចលុះទៅដល់ចំណុចកើតហេតុក៏ស្រាប់តែបុកក្បាលនាគដាច់១កង់ហើយរថយន្តនោះវិលហោះទៅចិញ្ចើមផ្លូវបុកដាច់ដើមឈើ១ដើមនិងបុកទ្វារដែលផ្ទះប្រជាពលរដ្ឋខូចខាតហើយអ្នកបើកបររូបនោះដឹងសភាពមិនស្រួលក៏ប្រញាប់បើកទ្វាររថយន្តគេចខ្លួនបាត់ដោយបន្សល់ទុករថយន្តនៅកន្លែងកើតហេតុសម្រាប់ឲ្យប៉ូលិសមកវាស់វែងយកទៅរក្សាទុកនៅការិយាល័យក្រុងដើម្បីរង់ចាំអ្នកបង្កហេតុចូលខ្លួនមកធ្វើការដោះស្រាយតាមនីតិវិធី៕
Source: Kampuchea Thmey Daily
0 Comments