ភ្នំពេញ ៖ ចៅក្រមសាលាដំបូងរាជធានីភ្នំពេញ នាល្ងាចថ្ងៃទី ០៥កញ្ញា ឆ្នាំ២០១៨នេះ បានលើកយកសំណុំរឿងដឹកជញ្ជូនគ្រឿងញៀនឆ្លងដែនចូលកម្ពុជារបស់ក្រុមជនបរទេស៣នាក់ ក្នុងនោះមានជនជាតិអាមេរិកាំងម្នាក់ផងដែរ មកធ្វើការជំនុំជម្រះទោសជាសាធារណៈ។
ជនជាប់ចោទទាំង៣នាក់នេះទី១.ឈ្មោះ FORTUNE EGWUONWU ភេទប្រុស អាយុ៣៣ឆ្នាំ ជនជាតិនីហ្សេរីយ៉ា ២.ឈ្មោះ MEYER NANCY LELAភេទស្រី អាយុ៣២ឆ្នាំ ជនជាតិអាមេរិក នឹង៣.ឈ្មោះ TIPPAPAT MUEANCHAN ភេទស្រី អាយុ៣០ឆ្នាំ ជនជាតិថៃ។
សូមរំលឹកថា ឆ្លងតាមកិច្ចប្រតិបត្តិការរយៈពេល៣ថ្ងៃ គឺថ្ងៃទី៣១ សីហា ដល់ថ្ងៃទី២ កញ្ញា ២០១៧ សមត្ថកិច្ចនៃមន្ទីរប្រឆាំងគ្រឿងញៀនក្រសួងមហាផ្ទៃ បានចាប់ឃាត់ខ្លួនជនបរទេស៣នាក់ជាក្រុមជួញដូរគ្រឿងញៀនឆ្លងដែនដោយខុសច្បាប់ នឹងចាប់យកវត្ថុតាងថ្នាំញៀនជាង១គីឡូក្រាម។
កិច្ចប្រតិបត្តិការនេះ ត្រូវបានលោកឧត្តមសេនីយ៍ទោ ឡឹក វណ្ណៈ ប្រធានមន្ទីរប្រឆាំងគ្រឿងញៀនក្រសួងមហាផ្ទៃឲ្យដឹងថា នៅថ្ងៃទី៣១ សីហា កម្លាំងជំនាញការិយាល័យរដ្ឋបាលសរុប នៃមន្ទីរប្រឆាំងគ្រឿងញៀន ដែលដឹកនាំដោយលោកវរសេនីយ៍ឯក អ៊ិន សុង នាយការិយាល័យ បានចុះធ្វើការស្រាវជ្រាវ នឹងស៊ើបអង្កេតរកឃើញថា មានជនជាតិអាមេរិកម្នាក់ បានទៅស្នាក់នៅសណ្ឋាគារសំណាងល្អភ្នំពេញ ស្ថិតនៅផ្លូវលេខ៣០៤ ក្នុងសង្កាត់អូឡាំពិក ខណ្ឌចំការមន ដោយសង្ស័យជាក្រុមជួញដូរគ្រឿងញៀន។
ខណៈពេលសមត្ថកិច្ចកំពុងតាមប្រមាញ់ជននេះ នៅថ្ងៃទី៣១ សីហា ជននោះបានចេញដំណើរទៅកាន់ប្រលានយន្តហោះអន្តរជាតិភ្នំពេញ ដើម្បីទៅទទួលយកថ្នាំញៀន ដែលបក្សពួកផ្ញើមកពីក្រៅប្រទេស។ ក្រោមការសហការជាមួយមន្ត្រីនគរបាលអន្តោប្រវេសន៍ នឹងសមត្ថកិច្ចពាក់ព័ន្ធប្រចាំការនៅអាកាសយានអន្តរជាតិភ្នំពេញ ព្រមទាំងមានការសម្របសម្រួលពីស្ថាប័នអយ្យការអមសាលាដំបូងរាជធានីភ្នំពេញ កម្លាំងជំនាញបានធ្វើឃាត់ខ្លួនជនជាតិអាមេរិកម្នាក់នោះ រួមទាំងដកហូតថ្នាំញៀនប្រមាណ(១២៣៧.៥ក្រាម)ជាង១គីឡូក្រាម ដែលគេដាក់តាមវ៉ាលីចូលមកប្រទេសកម្ពុជា។
លោកឧត្តមសេនីយ៍ទោ ឡឹក វណ្ណៈ បន្តថា ក្រោយពេលសមត្ថកិច្ចយើងឃាត់ខ្លួនជនសង្ស័យរូបនេះ នឹងដកហូតថ្នាំញៀននោះហើយ យើងបាននាំជនសង្ស័យទៅឆែកទីកន្លែងដែលគេស្នាក់នៅ ប៉ុន្តែមិនមានថ្នាំញៀនទៀតទេ ទើបជនសង្ស័យត្រូវបាននាំទៅសាកសួរនៅមន្ទីរប្រឆាំងគ្រឿងញៀន។
ទោះជាការចាប់ខ្លួនជនសង្ស័យបានម្នាក់នេះហើយក្តី ការស្រាវជ្រាវរបស់សមត្ថកិច្ចនៅបន្ត រហូតដល់ថ្ងៃទី២ កញ្ញា ស្រាប់នៅថ្ងៃទី២ កញ្ញា តែមានជនសង្ស័យ២នាក់ ម្នាក់ជាជនជាតិនីហ្សេរីយ៉ា នឹងម្នាក់ជាជនជាតិថៃ បានទៅគោះទ្វារបន្ទប់សណ្ឋាគារ ដែលស្ត្រីជនជាតិអាមេរិកស្នាក់នៅក្នុងគោលបំណងទៅទទួលយកថ្នាំញៀននោះបន្ត ក៏ត្រូវបានកម្លាំងសមត្ថកិច្ចរបស់មន្ទីរប្រឆាំងគ្រឿងញៀនដែលឃ្លាំមើលឃាត់ខ្លួនតែម្តងទៅ៕
Source: Kampuchea Thmey Daily
0 Comments