ភ្នំពេញ ៖ នៅក្នុងសម័យប្រជុំសភាលើកដំបូង នីតិកាលទី៦ ដែលធ្វើឡើងកាលពីព្រឹកថ្ងៃទី០៥ ខែកញ្ញា ឆ្នាំ២០១៨ មានតំណាងអង្គទូត២២ប្រទេស និងតំណាងអង្គការអន្តរជាតិធំៗចំនួន៥ ដែលភាគច្រើនក្រោមស្លាកអង្គការសហប្រជាជាតិ បានចូលរួមជាសាក្សី តាមការអញ្ជើញរបស់ភាគីកម្ពុជា ប៉ុន្តែតំណាងស្ថានទូត៩ផ្សេងទៀត ដែលភាគច្រើនជាតំណាងស្ថានទូតនៃប្រទេសលោកខាងលិច មិនបានចូលរួមនោះទេ នេះបើតាមការបញ្ជាក់របស់អ្នកនាំពាក្យ។
លោក ឡេង ប៉េងឡុង អគ្គលេខាធិការ និងជាអ្នកនាំពាក្យរដ្ឋសភា បានប្រាប់ក្រុមអ្នកសារព័ត៌មានថា នៅក្នុងកិច្ចប្រជុំសភាដំបូងនេះ កម្ពុជាបានអញ្ជើញស្ថានទូតចំនួន៣១ នៅក្នុងប្រទេសកម្ពុជា ដើម្បីចូលរួមកិច្ចប្រជុំ នៅក្នុងអាណត្តិថ្មីនេះ ប៉ុន្តែមានតែស្ថានទូតចំនួន២២ ប៉ុណ្ណោះ បានចូលរួម ចំណែកតំណាងស្ថានទូត៩ទៀត មិនបានឆ្លើយតបនឹងការអញ្ជើញនេះទេ ហើយលោកក៏មិនទាន់ដឹងអំពីមូលហេតុ ដែលតំណាងប្រទេសទាំងនោះ មិនចូលរួមនៅឡើយទេ។ ជាមួយគ្នានោះ លោកបានសម្តែងនូវការសោកស្តាយចំពោះការអវត្តមានរបស់តំណាងអង្គទូតទាំងនោះ ពីព្រោះកម្ពុជាចង់ទំនាក់ទំនងល្អជាមួយគ្រប់ប្រទេសទាំងអស់ ហើយកម្ពុជាបានខិតខំអនុវត្ត និងអភិវឌ្ឍលទ្ធិប្រជាធិបតេយ្យតាំងពីឆ្នាំ១៩៩៣មក ប៉ុន្តែការខិតខំនេះមានការលំបាក និងមានឧបសគ្គជាច្រើន។
តាមលោក ឡេង ប៉េងឡុង “លោកខាងលិចវាយតម្លៃមិនបានត្រឹមត្រូវទេ ចំពោះសភាពការណ៍នៅកម្ពុជា បើសិនជាពួកគេចង់ឲ្យកម្ពុជាដូចលោកខាងលិច គឺថាមិនអាចធ្វើបានភ្លាមៗទេ ព្រោះថា កម្ពុជា មិនមែនមានប្រពៃណីដូចលោកខាងលិចទេ អញ្ចឹងយើងខិតខំអនុវត្តលទ្ធិប្រជាធិបតេយ្យបានប៉ុណ្ណឹង គួរតែអបអរសាទរហើយ”។
ដោយឡែក សម្រាប់អង្គការអន្តរជាតិ មានអង្គការធំៗចំនួន៥ ក្នុងចំណោម១១ បានមកចូលរួមក្នុងកិច្ចប្រជុំនេះ ក្នុងនោះមាន អង្គការ UNDP ខុនរ៉ាតរបស់អាល្លឺម៉ង់ UNFPA យូនីសេហ្វ និង អង្គការពាណិជ្ជកម្មពិភពលោកជាដើម តំណាងអង្គទូត ដែលមិនបានចូលរួមដូចជាអូស្ត្រាលី ស៊ុយអែត ប៊ុលហ្គារី អឺរ៉ុប សហរដ្ឋអាមេរិក កាណាដា បារាំង អាល្លឺម៉ង់ និងប្រទេសអង់គ្លេស។
សូមបញ្ជាក់ថា សម័យប្រជុំលើកដំបូង បានធ្វើឡើងកាលពីព្រឹកថ្ងៃទី០៥ ខែកញ្ញា ឆ្នាំ២០១៨ ហើយបន្ទាប់ពីពិធីបើកសម័យប្រជុំដំបូងរួចរាល់ ពិធីបើកសម័យប្រជុំលើកទី១ ចាប់ផ្តើមការងាររបស់ខ្លួនក្រោមអធិបតីភាពសម្តេចអគ្គមហាពញាចក្រី ហេង សំរិន ព្រឹទ្ធសមាជិករដ្ឋសភា ដើម្បីសម្រេចអំពីសុពលភាពនៃអាណត្តិរបស់សមាជិកនីមួយៗ និងការអនុម័តបទបញ្ជាផ្ទៃក្នុងរបស់រដ្ឋសភានីតិកាលទី៦។ លុះនៅពេលរសៀលតំណាងរាស្ត្រទាំង១២៥រូប ចូលទៅកាន់ព្រះបរមរាជវាំង ដើម្បីធ្វើពិធីសច្ចាប្រណិធាននៅចំពោះព្រះភក្ត្រមហាក្សត្រខ្មែរ មុននឹងចាប់ផ្តើមបំពេញការងាររបស់ខ្លួន៕
Source: Kampuchea Thmey Daily
0 Comments