កីឡាករLuka Modrić ជនជាតិក្រូអាត សមាជិករបស់ក្លិបបាល់ទាត់ Real Madrid ប្រចាំប្រទេសអេស្ប៉ាញ បានឈ្នះពានរង្វាន់កីឡាករបាល់ទាត់ដែលឆ្នើមជាងគេនៅលើលោកប្រចាំឆ្នាំ២០១៨ (FIFA Best Player of the Year) ខណៈសំឡេង៣នាក់ពីកម្ពុជា សុទ្ធតែបានបោះឆ្នោតជូនកីឡាកររូបនេះ។
នៅកម្ពុជាមានមនុស្ស៣នាក់ ដែលមានសិទ្ធិបោះឆ្នោតដោយក្នុងនោះមាន លោក ប្រាក់ សុវណ្ណារ៉ា តំណាងគ្រូបង្វឹកបាល់ទាត់ជម្រើសជាតិកម្ពុជា កីឡាករ ធារី ចន្ថាប៊ីន ប្រធានក្រុមជម្រើសជាតិកម្ពុជា និងលោក អ៊ឹង ចំរើន តំណាងឲ្យអ្នកសារព័ត៌មាន។ លោក ប្រាក់ សុវណ្ណារ៉ា បានបោះឆ្នោតឲ្យកីឡាករ៣នាក់ជាជម្រើសរបស់ខ្លួនដោយក្នុងនោះមាន Luka Modric ជាជម្រើសទី១ Antoine Griezmann ជម្រើសទី២ និង Kylian Mbappe ជម្រើសទី៣ ហើយកីឡាករ ធារី ចន្ថាប៊ីន បានជ្រើសរើសកីឡាករ Ronaldo ជាជម្រើសទី១ ហើយកីឡាករ Kylian Mbappe ជាជម្រើសទី២និងកីឡាករ Luka Modrić ជាជម្រើសទី៣។ ចុងក្រោយលោក អ៊ុង ចំរើន គឺបានបោះឆ្នោតឲ្យកីឡាករ Vanane Rapheal ជាជម្រើសទី១ កីឡាករ Mohamed Salah ជាជម្រើសទី២និងកីឡាករ Luka Modrić ជាជម្រើសទី៣។
កម្មវិធីប្រគល់ពាន FIFA Football Awards ដែលធ្វើឡើងនៅ Royal Festival Hall ស្ថិតក្នុងទីក្រុងឡុង ប្រទេសអង់គ្លេស បានចប់សព្វគ្រប់កាលពីយប់ថ្ងៃអង្គារ សប្ដាហ៍នេះ ខណៈមានពានរង្វាន់ជាច្រើនបានប្រគល់ទៅឲ្យដៃកីឡាករកីឡាការិនី និងគ្រូបង្វឹកមានស្នាដៃសម្រាប់ឆ្នាំ២០១៨។
ចំណែកពានរង្វាន់ផ្សេងទៀតក្នុងព្រឹត្តិការណ៍ FIFA Football Awards មានដូចជាពានគ្រាប់បាល់ចូលទីល្អបំផុតធ្លាក់ទៅលើ Mohamed Salah របស់ Liverpool ដែលស៊ុតចូលទី Everton ក្នុងជំនួបដ៏កក្រើកនៅអង់គ្លេស Merseyside Derby។ នាង Marta Vieira da Silva លេងឲ្យក្រុមជម្រើសជាតិប្រេស៊ីល និងក្លឹបOrlando Pride របស់អាមេរិកបានឈ្នះពានកីឡាការិនីឆ្នើមរបស់ពិភពលោក។ អតីតអ្នកចាំទី Chelsea ដែលបច្ចុប្បន្នកំពុងលេងឲ្យ Real Madrid គឺ Courtois បានឈ្នះពានអ្នកចាំទីឆ្នើមប្រចាំឆ្នាំ។លោក Deschamps បានឈ្នះពានគ្រូបង្វឹកឆ្នើមប្រចាំឆ្នាំក្រោយជួយបារាំងលើកពាន World Cup នៅរុស្ស៊ីហើយលោក Reynald Pedros របស់ Lyonឈ្នះពានគ្រូបង្វឹកក្រុមបាល់ទាត់នារីឆ្នើមប្រចាំឆ្នាំ។ពាន FIFA Fair Play Award បានទៅលើកីឡាករ Lennart Thy ដែលបានបរិច្ចាគឈាមជួយសង្គ្រោះជីវិតអ្នកជំងឺមហារីក។ ចំពោះពាន FIFA FIFPro World11 មានអ្នកចាំទី David de Gea ខ្សែការពារគឺ Dani Alves, Raphaël Varane,Raphaël Varane, Marcelo ខ្សែបម្រើគឺ Luka Modric, N'Golo Kanté, Eden Hazard និងខ្សែប្រយុទ្ធ Kylian Mbappé, Lionel Messi និង Ronaldo៕
Source: Kampuchea Thmey Daily
0 Comments