លោក Brett Kavanaugh ដែលជាតុលាការកំពូលតែងតាំងដោយលោក Donald Trump ត្រូវរងការចោទប្រកាន់ជាលើកទីពីរពីបទប្រព្រឹត្តិខុសឆ្គងខាងផ្លូវភេទកាលពីថ្ងៃអាទិត្យ។
ពាក្យបណ្តឹងចុងក្រោយនៃភាពមិនប្រក្រតីក្នុងកំឡុងពេលយុវវ័យរបស់លោក Kavanaugh បានកើតឡើងខណៈគាត់កំពុងប្រឈមមុខនឹងសវនាការដ៏គួរឲ្យចាប់អារម្មណ៍មួយរួចទៅហើយដែលគាត់ត្រូវផ្តល់សក្ខីកម្មលើការចោទប្រកាន់របស់សាស្ត្រាចារ្យសាកលវិទ្យាល័យម្នាក់ពីបទរំលោភបំពាន។
ព្រឹទ្ធសមាជិកគណបក្សប្រជាធិបតេយ្យកំពុងស៊ើបអង្កេតលើការអះអាងមួយដែលធ្វើឡើងដោយលោកស្រី Deborah Ramirez អាយុ៥៣ឆ្នាំដែលនិយាយថា លោក Kavanaugh បានលាតត្រដាងខ្លួនគាត់បង្ហាញនាងអំឡុងពិធីជប់លៀងមហាវិទ្យាល័យមួយកាលពីទសវត្សរ៍ឆ្នាំ១៩៨០នៅសាកលវិទ្យាល័យ Yale។
ទោះបីជាយ៉ាងណាក៏ដោយ លោក Kavanaugh បានបដិសេធការចោទប្រកាន់នេះដោយហៅវាថាជាការបង្ខូចកេរ្តិ៍ឈ្មោះនិងលាបពណ៌។
ដូចជាលោកស្រី Christine Blasey Ford ដែលជាសាស្ត្រាចារ្យចោទប្រកាន់គាត់ពីបទរំលោភបំពាននាងនៅពេលពួកគេជាក្មេងជំទង់ដែរ, លោកស្រី Ramirez ចង់ឲ្យ FBI ស៊ើបអង្កេតលើហេតុការណ៍នេះហើយតំណាងរាស្ត្រគណបក្សប្រជាធិបតេយ្យបានគាំទ្រការទាមទាររបស់ពួកគេ។
លោកស្រី Ford បានយល់ព្រមផ្តល់សក្ខីកម្មកាលពីថ្ងៃព្រហស្បតិ៍បន្ទាប់ពីការប្រឈមមុខដាក់គ្នាកាន់តែខ្លាំងឡើងដ៏អាក្រក់មួយសប្តាហ៍ដែលនាំឲ្យនាងត្រូវបង្ខំចិត្តចាកចេញពីផ្ទះនៅរដ្ឋកាលីហ្វ័រនីញ៉ារបស់នាងនៅពេលនាងប្រឈមនឹងការគំរាមកំហែងដល់អាយុជីវិត។
លោក Kavanaugh ដែលបានបដិសេធការចោទប្រកាន់ទាំងនេះបាននិយាយថា គាត់មានបំណងផ្តល់សក្ខីកម្មឲ្យបានឆាប់តាមដែលអាចធ្វើទៅបានដើម្បីលាងឈ្មោះរបស់គាត់បន្ទាប់ពីការអះអាងរបស់លោកស្រី Ford ថា គាត់បានរំលោភបំពាននាងនៅឯពិធីជប់លៀងវិទ្យាល័យមួយក្នុងទសវត្ស១៩៨០។
គណៈកម្មាធិការព្រឹទ្ធសភាបានបញ្ជាក់ថា ភាគីទាំងពីរនឹងផ្តល់សក្ខីកម្មដាច់ដោយឡែកពីគ្នាដោយលោកស្រី Ford ជាអ្នកផ្តល់ដំបូងហើយបន្តដោយការឆ្លើយតបរបស់លោក Kavanaugh ៕ AFP
Source: Kampuchea Thmey Daily
0 Comments