ពោធិ៍សាត់ ៖ ជនល្មោភកាមម្នាក់ បានភូតកុហកកូនស្រីចុងវ័យក្រមុំយកទៅរំលោភក្នុងព្រៃក្បែរអូរ រហូតសម្រេច តែត្រូវបែកការនាងរងគ្រោះប្ដឹងនគរបាលឲ្យចាប់ខ្លួនចាត់ការតាមផ្លូវច្បាប់។
ហេតុការណ៍ភូតកុហកចាប់កូនស្រីចុងយកទៅចាប់រំលោភនេះ បានកើតឡើងកាលពីវេលាម៉ោង២និង២០នាទីរសៀលថ្ងៃទី១ ខែសីហា ឆ្នាំ២០១៨ ត្រង់ម្ដុំខ្នងភ្នំចេកក្បែរអូ ស្ថិតក្នុងភូមិខ្សាច់ល្អិត ឃុំអន្សាចំបក់ ស្រុកក្រគរ ខេត្តពោធិ៍សាត់។
លោក ឯម រុន អធិការនគរបាលស្រុកក្រគរបានឲ្យដឹងថា នាងក្រមុំរងគ្រោះឈ្មោះ ទ.ស.ណ ភេទស្រី អាយុ១៧ឆ្នាំ ឯជនសង្ស័យជាឪពុកចុងនាងក្រមុំឈ្មោះ ចេន អង់ ភេទប្រុស អាយុ៣៩ឆ្នាំ អ្នកទាំង២រស់នៅក្នុងភូមិថ្គោលតូច ឃុំអន្សាចំបក់ ស្រុកក្រគរ ខេត្តពោធិ៍សាត់។
បើតាមនាយប៉ុស្តិ៍រដ្ឋបាលអន្សាចំបក់ បានឲ្យដឹងថា នៅថ្ងៃខាងលើមុនពេលកើតហេតុនោះ វេលាម៉ោងប្រមាណជា១រសៀល ឪពុកចុងនាងបានភូតកុហកនាងថា ជិះម៉ូតូទៅជាមួយគាត់ទៅមើលចំការល្ងនៅក្បែរខ្នងភ្នំចេក នាងក៏ជិះទៅជាមួយដោយស្មានថា គាត់ទៅមើលចំការមែន។
នាងបន្តថា នៅពេលទៅដល់ខ្នងភ្នំចេកក្បែរចំការល្ងប្រហែល១០០ម៉ែត្រពីចំការ ឪពុកជាជនសង្ស័យបានបបួលនាងដើរទៅលើខ្នងភ្នំចេក រួចហើយចុះទៅផឹកទឹកក្នុងអូរក្បែរនោះ ដែលមានព្រៃស្ងាត់ ក៏ចាប់នាងរំលោភរហូតបានសម្រេច ទោះពេលនោះនាងស្រែកឲ្យគេជួយនិងលើកដៃសំពះអង្វរគាត់ក៏មិនព្រមដែរ។
នាងរងគ្រោះរៀបរាប់ទៀតថា ក្រោយពេលរំលោភនាងរួចហើយ ឪពុកចុងនោះបានដឹកដៃនាងមកឡើងជិះម៉ូតូឌុបមកផ្ទះ ដោយដកលុយពីហោប៉ៅឲ្យនាងចំនួន៣ម៉ឺនរៀល ហើយមិនឲ្យនាងប្រាប់ម្ដាយនិងនរណាឡើយ។ ក្រោយពេលដល់ផ្ទះភ្លាមនាងបានប្ដឹងម្ដាយតែម្ដាយធ្វើហី នាងក៏រត់ទៅប្ដឹងតារបស់នាងមិនហ៊ាននិយាយទៀត នាងក៏សម្រេចចិត្តមកប៉ុស្ដិ៍នគរបាលឃុំអន្សាចំបក់តែម្ដង។
លោកនាយប៉ុស្តិ៍មូលដ្ឋាននោះបញ្ជាក់ថា ក្រោយពេលលោកទទួលបណ្ដឹងពីនាងក្រមុំត្រូវឪពុកចុងភូតកុហកដឹកតាមម៉ូតូចាប់រំលោភរហូតសម្រេចភ្លាម លោកក៏បានរៀបចំកម្លាំងហើយរាយការណ៍ឲ្យលោកអធិការដឹង ដោយមានការសម្របសម្រួលពីព្រះរាជអាជ្ញាសាលាដំបូងខេត្ត ក៏ចាប់ខ្លួនជនសង្ស័យនោះយកមកកាន់ប៉ុស្តិ៍ ហើយសួរចម្លើយជននេះបានឆ្លើយសារភាពដូចនាងក្រមុំរងគ្រោះជាកូនចុងរៀបរាប់ក្នុងបណ្ដឹងស៊ីចង្វាក់គ្នា លោកក៏ចាត់ការបន្តបញ្ជូនទៅតុលាការចាត់ការតាមនីតិវិធី៕
Source: Kampuchea Thmey Daily
0 Comments