បន្ទាយមានជ័យ ៖ បុរសជាជនសង្ស័យប្តីទី៣ ដែលសម្លាប់ប្រពន្ធ ហើយរត់គេចទៅរស់នៅផ្ទះបងប្អូននៅឯខេត្តពោធិ៍សាត់នោះ ត្រូវបានសមត្ថកិច្ចតាមចាប់ខ្លួនបានហើយនៅព្រឹក ថ្ងៃទី១ ខែតុលា ឆ្នាំ២០១៨។
សមត្ថកិច្ចបានប្រាប់អ្នកយកព័ត៌មានឲ្យដឹងថា ជនសង្ស័យមានឈ្មោះ ទុង ថា អាយុ៤៦ឆ្នាំ ចំណែកឯប្រពន្ធរងគ្រោះមានឈ្មោះថាធ្លោក ថាញ់ អាយុ៤៣ឆ្នាំ រស់នៅភូមិត្រសេកជ្រុំ ឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ។ សមត្ថកិច្ចបានបញ្ជាក់ឲ្យដឹងទៀតថា បុរសជាប្ដីបានរត់ទៅលាក់ខ្លួននៅភូមិសាស្ត្រ ស្រុកក្រវ៉ាញ ខេត្តពោធិ៍សាត់ បន្ទាប់បានធ្វើសកម្មភាពវាយសម្លាប់ប្រពន្ធខ្លួនឯងរួច។
សមត្ថកិច្ចបានបញ្ជាក់ឲ្យដឹងទៀតថា ពាក់ព័ន្ធករណីឃាតកម្មខាងលើនេះ ដោយសារតែជនសង្ស័យជាមនុស្សញៀនស្រា ពេលស្រវឹងស្រា ម្តងៗតែងតែប្រើអំពើហិង្សាវាយដំទៅលើប្រពន្ធមិនដែលលស់មួយថ្ងៃណាឡើយ។ មុនពេលកើតហេតុនោះបុរសជាប្តីបានស្រវឹងស្រា ហើយយកភ្លើងបារីអុជភ្លៅប្រពន្ធ វាយមុខប្រពន្ធ បណ្តាលឲ្យជាំភ្នែក និងមុខ ហើយពេលសមត្ថកិច្ចទៅនាំ ខ្លួនបែរជាស្ត្រីជាប្រពន្ធលាក់លៀមជាមួយសមត្ថកិច្ច។
លុះយប់កើតហេតុថ្ងៃទី២៧ ខែកញ្ញា ឆ្នាំ២០១៨ ប្តី ស្រវឹងស្រា ក៏មានការឈ្លោះប្រកែកគ្នាឈានដល់ការសម្លាប់ប្រពន្ធ តែដោយរឿងដដែលគ្មានអ្នកណាគេចាប់អារម្មណ៍ ក្រោយពីសម្លាប់ប្រពន្ធហើយជនសង្ស័យគេចខ្លួនបាត់ទើបមានការមានការភ្ញាក់ផ្អើល។
សមត្ថកិច្ចបានបញ្ជាក់ឲ្យដឹងទៀតថា តាមចម្លើយសារភាពរបស់ជនសង្ស័យជាប្ដីបានប្រាប់សមត្ថកិច្ចឲ្យដឹងថា ការដែលខ្លួនវាយសម្លាប់ប្រពន្ធខ្លួនឯងបណ្តាលព្រោះតែភ្លើងប្រចណ្ឌ ជាមួយនឹងអ្នកជិតខាង ហើយពេលខ្លួនហៅប្រពន្ធមកដេកជាមួយ បែរជាប្រពន្ធរបស់ខ្លួនមិនព្រម រូបគេក៏បានទាញយកញញួរមកវាយដើមទ្រូង និងយកខ្នើយខ្ទប់ច្រមុះ រហូតដល់នាងស្លាប់ បន្ទាប់មកក៏រត់គេចខ្លួនទៅផ្ទះអ៊ុំ នៅភូមិអូរឫស្សី ឃុំបាក់ចិញ្ចៀន ស្រុកក្រវ៉ាញ ខេត្តពោធិ៍សាត់ ហើយក៏ត្រូវបានសមត្ថកិច្ចចាប់ឃាត់ខ្លួនបានតែម្តង។ មកដល់ពេលនេះជនសង្ស័យត្រូវបានសមត្ថកិច្ចកសាងសំណុំរឿងបញ្ជូនទៅតលាការដើម្បីផ្តន្ទាទោសទៅតាមផ្លូវច្បាប់៕
Source: Kampuchea Thmey Daily
0 Comments