ភ្នំពេញ ៖ អ្នកនាំពាក្យអយ្យការអមសាលាដំបូងរាជធានីភ្នំពេញ មនុស្សចំនួន៨នាក់ ដែលត្រូវបានឃាត់ខ្លួនពាក់ព័ន្ធករណីលាក់ទុកអាវុធ ដើម្បីធ្វើសកម្មភាពប្រឆាំងរាជរដ្ឋាភិបាលកម្ពុជានោះ ត្រូវបានតុលាការចោទប្រកាន់ផ្លូវការហើយ ពីបទរៀបចំចាត់តាំងក្រុមជនប្រដាប់អាវុធ និងរឿងផ្ទុះដោយគ្មានការអនុញ្ញាត ព្រមទាំងចូលរួមក្នុងក្រុមជនប្រដាប់អាវុធ តាមក្រមព្រហ្មទណ្ឌកម្ពុជា។
លោក លី សុផាណា បានបញ្ជាក់តាមសាអេឡិកត្រូនិកតេឡេក្រាម កាលពីវេលាម៉ោង១១ និង៣០ នាទីព្រឹក ថ្ងៃទី០២ ខែតុលា ឆ្នាំ២០១៨ ថា អយ្យការបានសម្រេចចោទប្រកាន់ និងបញ្ជូនទៅចៅក្រមស៊ើបសួរ ដើម្បីចាត់ការបន្តតាមនីតិវិធី ពីបទ ទី១, រៀបចំចាត់តាំងក្រុមជនប្រដាប់អាវុធ សន្និធិអាវុធ និងរឿងផ្ទុះដោយគ្មានការអនុញ្ញាត និងទី២, ចូលរួមក្នុងក្រុមជនប្រដាប់អាវុធ តាមមាត្រា៤៨៥ មាត្រា ៤៨៦ និងមាត្រា៤៨៨ នៃក្រមព្រហ្មទណ្ឌកម្ពុជា។
សូមបញ្ជាក់ថា មនុស្សចំនួន៨នាក់ ក្នុងនោះមានស្រីម្នាក់ ត្រូវបានឃាត់ខ្លួនជាបន្តបន្ទាប់ ពាក់ព័ន្ធករណីជួញដូរអាវុធខុសច្បាប់ ប្រឆាំងរាជរដ្ឋាភិបាលកម្ពុជា ហើយមេក្លោង និងបក្ខពួកមួយចំនួនទៀតសមត្ថកិច្ចកំពុងតែស្វែងរកចាប់ខ្លួន ដើម្បីយកមកផ្តន្ទាទោសតាមច្បាប់ ហើយជនសង្ស័យទាំងនោះ ត្រូវបានប៉ូលិសចាប់ខ្លួននៅខេត្តកំពង់ស្ពឺ កំពត និងពោធិ៍សាត់ កាលពីចុងខែកញ្ញា ឆ្នាំ២០១៨ ហើយត្រូវបានសមត្ថកិច្ចបញ្ជូនទៅសាលាដំបូងរាជធានីភ្នំពេញ កាលពីថ្ងៃទី៣០ ខែកញ្ញា ឆ្នាំ២០១៨។
បើតាមសេចក្តីរាយការណ៍បានឲ្យដឹងថា អាវុធដែលដកហូត គឺអាកាស្វាយបត់ចំនួន២៨ដើម ត្រូវបានដកហូត ដោយជនសង្ស័យកប់លាក់ទុកនៅក្នុងដី ស្ថិតនៅសង្កាត់ពន្សាំង ខណ្ឌព្រែកព្នៅ រាជធានីភ្នំពេញ ចំនួន២៥ដើម (អាកាស្វាយបត់)។ នៅភូមិតេជោក្បាលដំរី ឃុំតេជោអភិវឌ្ឍន៍ស្រុកឈូក ខេត្តកំពត រកឃើញកាំភ្លើងចំនួនពីរដើម (អាកាមួយដើម និងអឹមសីមួយដើម) និងនៅភូមិបឹងស្មុគ ឃុំស្វាយស ស្រុកក្រគរ ខេត្តពោធិ៍សាត់ រកឃើញកាំភ្លើងចំនួនមួយដើម (សេកាសេ)។ ក្រៅពីកាំភ្លើងមាន បង់ចំនួនពីរ គ្រាប់អាកាចំនួន១៧គ្រាប់ និង M16 ចំនួន២០គ្រាប់។ តាមចម្លើយរបស់ជនសង្ស័យបានសារភាពថា ក្រុមខ្លួនចង់ងើបបះបោរប្រឆាំងរាជរដ្ឋាភិបាល និងស្វះស្វែងប្រភពហិរញ្ញវត្ថុ។
ទាក់ទងបញ្ហានេះ លោកឧត្តមសេនីយ៍ឯក ឆាយ គឹមឃឿន អគ្គស្នងការរងនគរបាលជាតិ និងជានាយសេនាធិការ បានថ្លែងប្រាប់អ្នកសារព័ត៌មានកាលពីថ្ងៃទី០១ ខែតុលា ថា ពិតជាមានការឃាត់ខ្លួនមនុស្សចំនួន០៨ នាក់ និងដកហូតកាំភ្លើង២៨ដើម ពិតប្រាកដមែន ហើយនឹងមានការឃាត់ខ្លួនជាបន្តបន្ទាប់ទៀត។ លោកបញ្ជាក់ថា ចំពោះរឿងនេះ គឺមានជាប់ពាក់ព័ន្ធបញ្ហាច្រើនណាស់។
ចំពោះករណីខាងលើនេះ នៅមិនទាន់មានក្រុមណាមួយចេញមុខអះអាងថា មនុស្សចំនួន៨នាក់ ដែលត្រូវបានចាប់ខ្លួននោះ ជាបក្សពួករបស់ខ្លួននៅឡើយទេ ប៉ុន្តែគេនៅចាំបានថា សមាជិករណសិរ្សរំដោះជាតិខ្មែរ របស់លោក សម សេរី ត្រូវបានអាជ្ញាធររាជរដ្ឋាភិបាលចាប់ខ្លួនជាបន្តបន្ទាប់ ទាក់ទងការធ្វើសកម្មភាពបះបោរ និងបង្កើតកម្លាំងខុសច្បាប់ប្រឆាំងរាជរដ្ឋាភិបាលស្របច្បាប់៕
Source: Kampuchea Thmey Daily
0 Comments