ពោធិ៍សាត់ ៖ យុវជន៣នាក់បបួលគ្នាផឹកស៊ីរហូតដល់រសៀលស្រវឹងរៀងខ្លួនក៏ឈ្លោះប្រកែកទាស់សំដីគ្នាខ្លាំងៗរហូតដល់ប្រើអំពើហិង្សាដោយក្នុងចំណោម៣នាក់ម្នាក់ជាជនបង្កបានទាញពូថៅកាប់ទៅលើយុវជន២នាក់របួសធ្ងន់រួចគេចខ្លួនបាត់។
ហេតុការណ៍នេះបានកើតឡើងកាលពីវេលាម៉ោង១និង០០នាទីរសៀលថ្ងៃទី១ ខែតុលា ឆ្នាំ២០១៨ ស្ថិតនៅចំណុចភូមិកាប៉ះលើ ឃុំឈើតុំ ស្រុកក្រគរ ខេត្តពោធិ៍សាត់។
រដ្ឋបាលនគរបាលប៉ុស្តិ៍ឈើតុំឲ្យដឹងថា ជនសង្ស័យដែលបង្កហិង្សាដែលរត់គេចខ្លួននោះឈ្មោះ ណែម តុលា អាយុ២៣ឆ្នាំ។
ជនរងគ្រោះចំនួន២នាក់ ១-ឈ្មោះ សាំង វិសាល អាយុ ២០ឆ្នាំ រងរបួសធ្ងន់ (កាប់២ពូថៅចំលើត្រចៀកខាងស្តាំ១ពូថៅនិងស្មាខាងស្តាំ១ពូថៅ) ទី២-ឈ្មោះលីម កាត់ អាយុ២៩ ឆ្នាំ (កាប់ចំ២ពូថៅ ក្បាលខាងស្តាំ ១ពូថៅ និងឆ្អឹងជំនីខាងស្តាំ ១ ពូថៅ) ជនបង្កនិងជនរងគ្រោះជាជនជាតិខ្មែរ អ្នកទាំង៣រស់នៅភូមិកាប៉ះ ឃុំឈើតុំ ស្រុកក្រគរ ខេតុពោធិ៍សាត់។
បើតាមនគរបាលចុះដល់កន្លែងកើតហេតុក្រោយពេលបញ្ជូនជនរងគ្រោះទាំង២នាក់ ទៅកាន់មន្ទីរពេទ្យសង្គ្រោះ បានឲ្យដឹងថា យោងតាមសាក្សីបំភ្លឺពីហេតុការណ៍នេះ គឺពួកគេទាំង៣នាក់បានបបួលគ្នាផឹកស៊ី រហូតដល់ម៉ោងកើតហេតុខាងលើ។ ដោយស្រវឹងរៀងៗខ្លួនពួកគេក៍ចាប់ផ្ដើមប្រកែកទាស់សំដីគ្នារហូតដល់ហិង្សាដាក់គ្នាវៃគ្នាមួយប្រាវ ភ្លាមនោះជនបង្កម្នាក់ក្នុងចំណោម៣នាក់ បានស្ទុះទាញពូថៅ កាប់សំដៅទៅលើយុវជន២នាក់ទៀតរងរបួសធ្ងន់ធ្ងរ ត្រូវបានដឹកទៅសង្គ្រោះភ្លាមៗតែម្ដង ។ ដោយឡែកជនបង្កហិង្សាស្ថានទម្ងន់នោះបានរត់គេចខ្លួនបាត់ភ្លាមៗតែម្ដង។
លោក ឯម រុន អធិការនគរបាលស្រុកក្រគរប្រាប់ថា ជនបង្កនិងជនរងគ្រោះជាអ្នកភូមិជាមួយគ្នា ហើយសមត្ថកិច្ចជំនាញលោកបានធ្វើសាវតាជាតិជនបង្ក ដើម្បីតាមចាប់ខ្លួនបញ្ជូនទៅតុលាការហើយ៕
Source: Kampuchea Thmey Daily
0 Comments