ភ្នំពេញ ៖ ក្រុមយុវជនចំនួន៧នាក់ ដែលងប់ងុលនឹងការសេពថ្នាំញៀន ត្រូវបានសមត្ថកិច្ចនគរបាលខណ្ឌសែនសុខចាប់ខ្លួន កាលពីរំលងអធ្រាត្រថ្ងៃទី៣០ ខែកញ្ញា ឈានចូលថ្ងៃទី០១ និងថ្ងៃទី០២ ខែតុលា ឆ្នាំ២០១៨ នៅតាមបណ្តោយផ្លូវលេខ២០០៤ ក្នុងសង្កាត់អូរបែកក្អម និង សង្កាត់ភ្នំពេញថ្មី។
តាមការបង្ហាញប្រាប់របស់ក្រុមសមត្ថកិច្ចបានឲ្យដឹងថា មុនពេលកើតហេតុសមត្ថកិច្ចកំពុងយាមល្បាតតាមផ្លូវលេខ២០០៤ ក្នុងភូមិស្លែងរលើង សង្កាត់ អូរបែកក្អម ខណ្ឌសែនសុខ បានប្រទះឃើញជនក្រុមជនសង្ស័យខាងលើមានគ្នា៤នាក់ជិះម៉ូតូ១គ្រឿងម៉ាកហុងដា ឌ្រីម ស៊េរីឆ្នាំ២០១៨ ពាក់ស្លាកលេខ ៣២៨៤ នៅវេលាម៉ោង១កន្លះរំលងអធ្រាត្រថ្ងៃទី៣០ ខែកញ្ញា ឆ្នាំ២០១៨ ដោយមានការសង្ស័យក៏ឃាត់អោយឈប់ធ្វើការត្រួតពិនិត្យមិនឃើញមានសម្ភារៈល្មើសច្បាប់ទេក៏នាំពួកគេមកត្រួតពិនិត្យទឹកនោមរកឃើញមានផ្ទុកសារធាតុញៀន ទាំងអស់គ្នាទើបឃាត់ខ្លួនតែម្តង។
ក្រុមទី២ ត្រូវបានប៉ូលិសយាមល្បាតប្រទះឃើញពួកគេទាំង៣នាក់ជិះម៉ូតូម៉ាកវីវ៉ា តាមផ្លូវ១៩៨៦ នៅវេលាម៉ោង៣រំលងអធ្រាត្រឈានចូលថ្ងៃទី០២ ខែតុលា ឆ្នាំ២០១៨ នាំយកមកត្រួតពិនិត្យទឹកនោមរកឃើញមានផ្ទុកសារធាតុញៀនទាំងអស់គ្នាទៀតទើបឃាត់ខ្លួនតែម្តង។
ជនសង្ស័យក្រុមទី១មានគ្នា៤នាក់ដែលត្រូវឃាត់ខ្លួនខាងលើ ១.ឈ្មោះ សៀង ឌី អាយុ២៣ឆ្នាំ នៅផ្ទះជួលភូមិដំណាក់ សង្កាត់គោកឃ្លាង ខណ្ឌសែនសុខ។ ២. ឈ្មោះ ឈុំ វណ្ណា អាយុ២៥ឆ្នាំ មានទីលំនៅភូមិត្រពាំងឈូក សង្កាត់ទឹកថ្លា ខណ្ឌសែនសុខ។ ៣.ឈ្មោះ ឈុំ វណ្ណៈ អាយុ២០ឆ្នាំ ស្នាក់នៅភូមិត្រពាំងឈូក។ ៤.ឈ្មោះ ចាន់ រ៉ា អាយុ២២ឆ្នាំ ស្នាក់នៅផ្ទះជួលភូមិដំណាក់។ ពួកគេទាំង៤នាក់មានមុខរបរជាងសំណង់ផ្នែកពិដាន និងដំបូលឆ្អឹងដែក។ ក្រុមទី២ មានគ្នា៣នាក់១.ឈ្មោះ អ៊ូ សុផានី អាយុ៣២ឆ្នាំ គ្មានមុខរបរមានទីលំនៅ សង្កាត់ផ្សារដើមគរខណ្ឌទួលគោក។ ២.ឈ្មោះ រ៉ា ឌី អាយុ២០ឆ្នាំ គ្មានមុខរបរ មានទីលំនៅភូមិក្រាំងអង្ក្រង សង្កាត់ក្រាំងធ្នង់ ខណ្ឌសែនសុខ។ ៣.ឈ្មោះ ភឿន រតនា អាយុ២៦ឆ្នាំ មានទីលំនៅសង្កាត់បឹងសាឡាង ខណ្ឌទួលគោក។
ប៉ូលិសនិយាយថា ជនសង្ស័យទាំង៧នាក់ខាងលើ មានទោសពីបទប្រើ (សេព) គ្រឿងញៀនខុសច្បាប់ នឹងត្រូវបញ្ជូនទៅតុលាការវិនិច្ឆ័យទោស ដែលតាមច្បាប់ប្រើប្រាស់ឃាត់ខ្លួនលើកទី១ត្រូវយកទៅធ្វើការអប់រំនិងបន្សាបគ្រឿងញៀន នៅមណ្ឌលកែប្រែឱកាសខ្ញុំ យ៉ាងតិចរយៈពេល៣ខែ ឬ៦ខែ ឬ១ឆ្នាំ រហូតលុះត្រាអស់សារជាតិថ្នាំញៀននៅក្នុងខ្លួន ទើបអាចដោះលែងបាន៕
Source: Kampuchea Thmey Daily
0 Comments