ភ្នំពេញ ៖ ចៅក្រមសាលាដំបូងរាជធានីភ្នំពេញ លោកពេជ្រ វិជ្ជាធរ ប្រធានក្រុមប្រឹក្សាជំនុំជំរះសាលាដំបូងរាជធានីភ្នំពេញ នារសៀលថ្ងៃទី ០២តុលា ឆ្នាំ២០១៨នេះ បានប្រកាសសាលក្រមសម្រេចផ្ដន្ទាទោសបុរសជនជាតិឡាវម្នាក់ជាអ្នកដឹកជញ្ជូនគ្រឿងញៀន៥៤គីឡូក្រាមមកលក់ចែកចាយលើទីផ្សារគ្រឿងញៀនក្នុងរាជធានីភ្នំពេញ ដាក់ពន្ធនាគារអស់មួយជីវិត ក្រោមការចោទប្រកាន់ពីបទដឹកជញ្ជូន រក្សាទុក និងជួញដូរសារធាតុញៀន តាមមាត្រា៤០នៃច្បាប់ប្រឆាំងគ្រឿងញៀនកម្ពុជា។
ចំណែកជនជាប់ចោទម្នាក់ទៀតឈ្មោះស៊ី ឡាឡយ ដែលស្លាប់ក្នុងពេលឃុំខ្លួនបណ្ដោះអាសន្នត្រូវបានរំលត់បណ្ដឹងអាជ្ញា។
អតីតឧកញ៉ា ស៊ី ឡាឡយ ជាម្ចាស់គ្រឿងញៀនទម្ងន់៥៤គីឡូក្រាម ដែលកំពុងជាប់ការស៊ើបអង្កេតនៅក្នុងពន្ធនាគារព្រៃស បានទទួលមរណភាពកាលពីល្ងាចថ្ងៃទី២២ ខែសីហា ឆ្នាំ២០១៧ នៅឯមន្ទីរពេទ្យរុស្ស៊ីដោយសាររោគាពាធ។
តាមការបញ្ជាក់ពីមន្ត្រីពន្ធនាគារបានឲ្យដឹងថា ជនជាប់ចោទឈ្មោះ ស៊ី ឡាឡយ ពិតជាបានស្លាប់នៅក្នុងមន្ទីរពេទ្យរុស្ស៊ីមែន បន្ទាប់ពីជំងឺបានធ្វើទុក្ខ ហើយខាងពន្ធនាគារបានបញ្ជូនមកសង្គ្រោះនៅឯមន្ទីរពេទ្យរុស្ស៊ីកាលពីថ្ងៃទី២១ ខែសីហា។
សូមរំឭកថា កាលពីថ្ងៃទី១៨ ខែឧសភា ឆ្នាំ២០១៧ សមត្ថកិច្ចក្រសួងមហាផ្ទៃបានចាប់ខ្លួនឧកញ៉ា ស៊ី ឡាឡយ អាយុ៤៣ឆ្នាំ និងឈ្មោះ លួន សុផា អាយុ៣០ឆ្នាំ ជាជនជាតិឡាវខណៈពួកគេនាំយកគ្រឿងញៀនទម្ងន់សរុប៥៤គីឡូក្រាមចូលមកក្រុងភ្នំពេញដើម្បីលក់ដូរ។
បន្ទាប់មកកាលពីថ្ងៃទី១៦ ខែសីហា ឆ្នាំ២០១៧ ថ្មីៗនេះនគរបាលមន្ទីរប្រឆាំងគ្រឿងញៀនក្រសួងមហាផ្ទៃ បានសហការជាមួយនគរបាលខេត្តស្ទឹងត្រែង បានចុះអនុវត្តន៍ដីកាបង្គាប់ឲ្យនាំខ្លួន របស់ចៅក្រមសាលាដំបូងរាជធានីភ្នំពេញ លោក ធាម ច័ន្ទពិសិដ្ឋ ចុះថ្ងៃទី២៥ ខែកក្កដា ឆ្នាំ២០១៧ បានឃាត់ខ្លួនឈ្មោះ ថង វ៉ាង ពីបទជួញដូរ និង រក្សាទុកដោយខុសច្បាប់នូវសារធាតុញៀន។
ជនសង្ស័យឈ្មោះ ថង វ៉ាង មានមុខរបរជានាយកក្រុមហ៊ុនដឹកជញ្ជូន ថង វ៉ាង គឺជាអ្នកដឹកជញ្ជូនគ្រឿងញៀនពីខេត្តស្ទឹងត្រែងយកមកឲ្យឈ្មោះ ស៊ី ឡាឡយ នៅរាជធានីភ្នំពេញ៕
Source: Kampuchea Thmey Daily
0 Comments