ភ្នំពេញ ៖ កាលពី ថ្ងៃទី២៩ ខែកញ្ញា ឆ្នាំ២០១៨ កន្លងមកនេះ ក្រោមកិច្ចសហការរវាងក្រុមហ៊ុន ជីប ម៉ុង អ៊ិនស៊ី ស៊ីមេន ខបភើរេសិន (CMIC) និង វិទ្យាស្ថានពហុបច្ចេកទេសកម្ពុជា (NPIC) វគ្គបណ្តុះបណ្តាលស្តីពីជំនាញជាងសំណង់ សម្រាប់ជាង និងមេជាងសំណង់ នៅឯវិទ្យាស្ថានពហុបច្ចេកទេសកម្ពុជា ដើម្បីលើកកម្ពស់ជំនាញបច្ចេកទេស និងជំនាញទន់របស់ពួកគេ។
ជាង និងមេជាងសំណង់ ៣០នាក់ ដែលជា សមាជិកក្លឹបស៊ីម៉ងត៍អូដ្ឋ មកពីរាជធានីភ្នំពេញ បានចាប់ផ្តើមចូលរៀនវគ្គដំបូងដែលមានរយៈពេល៤ខែ ចាប់ពីខែតុលា ២០១៨ រហូតទៅដល់ខែមករា ២០១៩។ ក្រៅពីការចូលរៀនដោយឥតគិតថ្លៃ សិក្ខាកាមទាំងអស់ក៏បានទទួលបានការគាំទ្រផ្នែកថវិកាសម្រាប់ការចាយវាយប្រចាំថ្ងៃ និងការធ្វើដំណើរ។ ការសិក្សានេះ ប្រព្រឹត្តិទៅនៅចុងសប្តាហ៍ ហើយមានការអនុវត្តផ្លាល់នៅនឹងកន្លែងការងារពីថ្ងៃចន្ទ ដល់ថ្ងៃសុក្រ ។
ថ្លែងនៅក្នុងពិធីបើកវគ្គបណ្តុះបណ្តាលនៅឯវិទ្យាស្ថានពហុបច្ចេកទេសកម្ពុជា លោក ទៀង សុភៈវិជ្ជា តំណាងឲ្យក្រុមហ៊ុនជីប ម៉ុង អ៊ិនស៊ី ស៊ីមេន បានមានប្រសាសន៍ថា វគ្គបណ្តុះបណ្តាលនេះ គឺស្របទៅនឹងគោលនយោបាយរបស់រាជរដ្ឋាភិបាលនៃប្រទេសកម្ពុជា ដែលចង់ឲ្យមានកិច្ចសហការរវាងស្ថាប័នរដ្ឋ និងស្ថាប័នឯកជនក្នុងការរៀបចំវគ្គបណ្តុះបណ្តាលបង្កើនសមត្ថភាព និងជំនាញ។
លោកបានសង្កត់ធ្ងន់ថា “ពួកគេត្រូវតែអភិវឌ្ឍខ្លួនឲ្យស្របទៅតាមការវិវឌ្ឍន៍នៃជំនាញបច្ចេកទេសសំណង់ ដែលកំពុងតែរីកចម្រើន និងមានតម្រូវការខ្ពស់។ ប្រសិនបើពួកគាត់មានជំនាញផ្នែកសំណង់ដែលប្រកបដោយស្តង់ដារ នោះពួកគេនឹងអាច សាងសង់លំនៅឋាន អគារ ឬហេដ្ឋារចនាសម្ព័ន្ធផ្សេងៗ ប្រកបដោយគុណភាព និរន្តរភាព និងមោទនភាព”។ ជំនាញ ដែលសិក្ខាកាមត្រូវរៀន ចែកចេញជាពីរ គឺជំនាញសំណង់ រួមមានជំនាញរៀបឥដ្ឋ ជំនាញបូកជញ្ជាំង លាយស៊ីម៉ងត៍ ការរៀបចំការដ្ឋាន និងជំនាញទន់ ដូចជាជំនាញទំនាក់ទំនង ដោះស្រាយបញ្ហា ការធ្វើការងារជាក្រុម សុវត្ថិភាពនៅកន្លែងការងារ ការរៀបចំផែនការ ការគ្រប់គ្រងពេលវេលា និងថវិកាជាដើម។
លោក មួង ផាស៊ី នាយករងសិក្សានៃវិទ្យាស្ថានជាតិពហុបច្ចេកទេសកម្ពុជា បានមានប្រសាសន៍ថា វិទ្យាស្ថានមានក្តីរីករាយ និងសោមន្ស ដែលក្រុមហ៊ុនសហការជាមួយ។
លោក ខន ដារ៉ា អាយុ ៣៧ ឆ្នាំ ជាមេជាងម្នាក់មកពីខណ្ឌព្រែកភ្នៅ រាជធានីភ្នំពេញ បានមានប្រសាសន៍ថា លោកពិតជា សប្បាយចិត្តជាខ្លាំងដែលក្រុមហ៊ុនបានជ្រើសរើសរូបលោកមកសិក្សាជំនាញនេះ។ លោកបន្តថា លោកធ្វើជាជាង និងមេជាងសំណង់អស់រយៈពេល ២០ឆ្នាំមកហើយ តែលោកមិនដែលបានចូលរួមវគ្គបណ្តុះបណ្តាលជំនាញជាងសំណង់នោះទេ គឺលោករៀនសូត្រពីឪពុករបស់លោកតែប៉ុណ្ណោះ។ លោកសង្កត់ធ្ងន់ថា “បន្ទាប់ពីរៀនចេះពីវគ្គនេះហើយ ខ្ញុំនឹងអាចបង្កើនសមត្ថភាពការងាររបស់ខ្ញុំ និងបន្តបណ្តុះបណ្តាលកូនជាងរបស់ខ្ញុំជាង២០នាក់ផ្សេងទៀតដើម្បីបង្កើនជំនាញ និងសមត្ថភាពរបស់ពួកគេក្នុងការងារជាងសំណង់នេះ”។
ក្រុមហ៊ុនជីប ម៉ុង អ៊ិនស៊ី ស៊ីមេន និងវិទ្យាស្ថានពហុបច្ចេកទេសកម្ពុជា នឹងរៀបចំវគ្គបណ្តុះបណ្តាលនេះ ៣ដងក្នុងមួយឆ្នាំ ដែលសិក្ខាកាមនីមួយៗ ត្រូវចូលរៀនវគ្គទ្រឹស្តីនៅសាលា និងការអនុវត្តផ្ទាល់នៅការដ្ឋាននានា។ សព្វថ្ងៃក្លឹបស៊ីម៉ងត៍អូដ្ឋ មានសមាជិកដែលជាជាង និងមេជាងសំណង់ចំនួន ១២០០ នាក់មកពីខេត្ត និងរាជធានីចំនួនដប់នៅប្រទេសកម្ពុជា៕
Source: Kampuchea Thmey Daily
0 Comments