ប្រទេសឥណ្ឌូនេស៊ីបាននិយាយកាលពីថ្ងៃអង្គារថា មនុស្សជាង១,២០០នាក់ត្រូវបានគេដឹងថា ស្លាប់ដោយសាររលកយក្សស៊ូណាមិដែលវាយប្រហារកោះ Sulawesi ខណៈដែលប៉ូលិសបានសន្យារារាំងការលួចរបស់របរដោយអ្នករស់រានមានជីវិត។
មានសេចក្តីរាយការណ៍ពីមន្ដ្រីបាញ់ព្រមាននិងប្រើឧស្ម័នបង្ហូរទឹកភ្នែកដើម្បីរារាំងមនុស្សពីការចូលលុកលុយហាងជាច្រើននៅទីក្រុង Palu ដែលជាទីក្រុងឆ្នេរសមុទ្រត្រូវបានបំផ្លិចបំផ្លាញដោយការរញ្ជួយដីកម្រិត៧.៥រ៉ិចទ័រនិងរលកយក្សស៊ូណាមិ។
អង្គការសហប្រជាជាតិបាននិយាយថា ប្រជាជនជិត២០០,០០០នាក់កំពុងត្រូវការជំនួយជាបន្ទាន់ដោយក្នុងចំណោមនោះមានកុមាររាប់ពាន់នាក់។
អ្នករស់រានមានជីវិតកំពុងប្រយុទ្ធនឹងភាពស្រេកឃ្លានដោយសារតែការផ្គត់ផ្គង់អាហារនិងទឹកស្អាតមានភាពខ្វះខាតហើយមន្ទីរពេទ្យក្នុងស្រុកត្រូវបានហូរហៀរដោយចំនួនអ្នករងរបួស។
ប៉ូលិសបាននិយាយកាលពីថ្ងៃអង្គារថា ពួកគេធ្លាប់អត់ឱនដល់អ្នករស់រានមានជីវិតពីការយកអាហារនិងទឹកពីហាងបិទទ្វារប៉ុន្តែឥឡូវនេះបានចាប់ខ្លួនមនុស្សចំនួន៣៥នាក់ដោយសារលួចកុំព្យូទ័រនិងសាច់ប្រាក់។
អនុប្រធានប៉ូលិសជាតិលោក Ari Dono Sukmanto បាននិយាយថា “នៅថ្ងៃទី១និងទី២មិនមានហាងទំនិញបើកទ្វារទេ។ មនុស្សជាច្រើនស្រេកឃ្លាន។ នោះមិនមែនជាបញ្ហាទេ។ ប៉ុន្តែនៅថ្ងៃទី៣ ការផ្គត់ផ្គង់ស្បៀងអាហារបានចាប់ផ្តើមហើយឥឡូវនេះយើងកំពុងអនុវត្តច្បាប់ឡើងវិញ។
កិច្ចខិតខំប្រឹងប្រែងជួយសង្គ្រោះត្រូវបានរារាំងដោយការខ្វះខាតគ្រឿងចក្រធុនធ្ងន់ ខ្សែដឹកជញ្ជូនត្រូវបានកាត់ផ្តាច់ ទំហំនៃការខូចខាតនិងការស្ទាក់ស្ទើររបស់រដ្ឋាភិបាលឥណ្ឌូនេស៊ីក្នុងការទទួលយកជំនួយបរទេស។
យោងតាមរដ្ឋាភិបាលបានឲ្យដឹងថា អ្នកស្លាប់ជាផ្លូវការពីសោកនាដកម្មនៅកោះ Sulawesi គឺមានចំនួន១,២៣៤នាក់។
យោធាឥណ្ឌូនេស៊ីកំពុងដឹកនាំកិច្ចខិតខំប្រឹងប្រែងជួយសង្គ្រោះប៉ុន្ដែបន្ទាប់ពីលោកប្រធានាធិបតី Joko Widodo បានទទួលយកជំនួយទាំងស្ទាក់ស្ទើរ អង្គការមិនមែនរដ្ឋាភិបាលអន្តរជាតិក៏ដាក់ពង្រាយក្រុមការងារនៅទីក្រុង Palu ផងដែរ៕ AFP
Source: Kampuchea Thmey Daily
0 Comments