អ្នក​ជំងឺ​ជនជាតិ​ចិន​ ទៅ​រក​គ្រូពេទ្យ​ចិន​ព្យាបាល​ បន្ទាប់ពី​ដាក់​ហ្សេ​រ៉ូម​ពី​កំប្លោក​រួច​ស្លាប់

ភ្នំពេញ ៖ បុរស​ជនជាតិ​ចិន​ម្នាក់​បាន​ស្លាប់​បន្ទាប់ពី​មាន​អាការៈ​ក្ដៅខ្លួន​ហើយ​គ្រូពេទ្យ​ជនជាតិ​ចិន​ដូចគ្នា​ដែល​បាន​បើក​គ្លីនិក​រកស៊ី​នៅ​ស្រុក​ខ្មែរ​បាន​ទទួល​ព្យាបាល​អ្នក​ជំងឺ​រូប​នោះ​មិនបាន​ជាសះស្បើយ​បែរជា​ដាច់ខ្យល់​ស្លាប់​ទៅវិញ បង្ក​ឲ្យ​មាន​ការ​ភ្ញាក់ផ្អើល​កាលពី​វេលា​ម៉ោង៥​និង​៣០នាទី​ល្ងាច ថ្ងៃទី១៥ ​ខែតុលា​ ឆ្នាំ​២០១៨ ​នៅ​មន្ទីរ​សំរាក​ព្យាបាល​និង​សម្ភព ផេង វុទ្ធី ស្ថិតនៅ ផ្ទះ​លេខ DD.១០ ភូមិ​ក្បាលដំរី ២​សង្កាត់​កា​កាប​ទី​២ ​ខណ្ឌ​ពោធិ៍​សែន​ជ័យ ចំណែក​លោកគ្រូ​ពេទ្យ​ជនជាតិ​ចិន​មាន​ឡាយ​សិន​ខ្មែរ​ពីរ​នាក់​ប្ដី​ប្រពន្ធ​ ត្រូវ​បាន​សមត្ថកិច្ច​ឃាត់ខ្លួន​រង់ចាំ​ធ្វើការ​ដោះស្រាយ​គ្នា​នៅពេល​ក្រោយ​។



សព​ឈ្មោះ​WANG ZHIQIANG អាយុ ៤៩​ឆ្នាំ​មុខរបរ លក់​គ្រឿង​ក្លែម នៅ​កំបូល ជា​ជនជាតិ ចិន ស្នាក់នៅ​ផ្ទះសំណាក់​មិត្តភាព​ភូមិ​កើតហេតុ​ខាងលើ​។ វេជ្ជបណ្ឌិត ជនជាតិ​ចិន​ជា​ម្ចាស់ ពេទ្យ​ឈ្មោះ LI XIAOYONG ភេទ​ប្រុស​ អាយុ​៣៩​ឆ្នាំ​ជា វេជ្ជបណ្ឌិត មាន​សញ្ញាប័ត្រ​ត្រឹមត្រូវ​នៅ​ប្រទេស​ចិន។

តាម​ប្រភព​ព័ត៌មាន​ពី​គ្រូពេទ្យ​ជនជាតិ​ចិន​តាន​រយៈ​អ្នកបកប្រែ​ភាសា បាន​ឲ្យ​ដឹង​ថា នៅ​មុន​ពេល​កើតហេតុ​ដោយ​ឃើញ ជនរងគ្រោះ​(​សព​) បាន​ជិះ​រ៉ឺម៉ក​កង់​បី​មកកាន់​មន្ទីរពេទ្យ​របស់គាត់ ហើយ ដោយ​ជនរងគ្រោះ មាន​អាការៈ​ក្តៅ​ខ្លួន​ខ្លាំង ឈឺ សន្លាក់ដៃ សន្លាក់ជើង​។ ភ្លាមៗ​នោះ​គ្រូពេទ្យ​បាន​ពិនិត្យ​ជនរងគ្រោះ ដោយសារ​ក្តៅ​ខ្លួន​ខ្លាំង គាត់​បាន​ពិនិត្យ​ទៅ ដឹង​ថា ជនរងគ្រោះ​មាន​ជំងឺ គ្រុនឈាម​។ បន្ទាប់មក គ្រូពេទ្យ​រូប​នេះ បាន​ដាក់​ហ្សេ​រ៉ូម​ឲ្យ​អ្នកជំងឺ បាន​មួយ​ប្លោក ជនរងគ្រោះ​មាន​អាការៈ​ធម្មតា រួច​ក៏​ដាក់​មួយ​ផ្លោក​ទៀត តែ​ថ្នាំ​ផ្សេង​ព្យាបាល​ដដែល​តែ​ដាក់​បាន​ពាក់កណ្តាល ជនរងគ្រោះ​ស្រាប់​តែ​មាន​អាការៈ​ខុសប្លែក​ពី ធម្មតា ស្លេកស្លាំង ហើយ​គ្រូពេទ្យ​និង​ប្រពន្ធ បាន​គាស់​មាត់​ជនរងគ្រោះ​ដើម្បី​បញ្ចូល​ខ្យល់​អុក​ស៊ី​ហ្ស៊ែ​ន​និង​ធ្វើ​ចលនា ដើមទ្រូង លុះ​មួយ សន្ទុះ​ក្រោយមក ជនរងគ្រោះ​ខាងលើ បាន​ដាច់ខ្យល់​ស្លាប់​បាត់ទៅ​។



បើ​តាម​ស្ត្រី​ម្នាក់​ ជា​អ្នកបកប្រែ​បាន​ឲ្យ​ដឹង​ថា ជនរងគ្រោះ​(​សព​)​ដោយ​ដឹង​ថា ឈឺ​ហើយ​មក មន្ទីរពេទ្យ​ព្រមទាំង ម្ចាស់ផ្ទះ សំណាក់​ខាងលើ បាន​នាំ​គ្នា​មក​មើល ជនរងគ្រោះ​នៅ​មន្ទីរពេទ្យ​ខាងលើ​ដែរ តែ​មកដល់ ជនរងគ្រោះ បាន​ស្លាប់​បាត់​ទៅ​ហើយ ហើយ​បាន​ទាក់ទង​ទៅ កូនប្រុស​របស់ សព​មានឈ្មោះ​wang gi long វ៉ង​ជី​ឡុង​ភេទ​ប្រុស ​អាយុ២៦ឆ្នាំ ​មុខរបរ​ជួយ​លក់​គ្រឿងខ្លែម​ឪពុក​នៅ​ម្តុំ​សង្កាត់​កំបូល ខណ្ឌ​ពោធិ៍​សែន​ជ័យ​ ឲ្យ​មក​កន្លែង​កើតហេតុ​ហើយ​ប្តឹង​សមត្ថកិច្ច​អន្តរាគមន៍​ផងដែរ​។



បើ​តាម​សមត្ថកិច្ច​និង​មន្ត្រី​យ​សុខាភិបាល​បាន​ឲ្យ​ដឹង​ថា មន្ទីរពេទ្យ​សំរាក​ព្យាបាល ផេង វុទ្ធី ខាងលើ​មិន​មាន​ផាសុកភាព​និង​ខ្វះ អនាម័យ​យ៉ាង​ខ្លាំង ព្រោះ​នៅក្នុង​បន្ទប់​ពិនិត្យ​និង​ពិសោធន៍ សំបូរ​ទៅ​ដោយ កន្ទុយបារី មិន​មាន​អនាម័យ និង​ម្យ៉ាង វេជ្ជបណ្ឌិត​ព្យាបាល​ខ្វះ​បច្ចេកទេស ត្រឹមត្រូវ​ទៀតផង។ ក្រោយពេល​កើតហេតុ​ក្រុម​គ្រួសារ​សព បាន​ប្តឹង និង​ទាមទារ​សំណង​ចំនួន​៥​ម៉ឺន​ដុល្លារ​តែ​លោកគ្រូ​ពេទ្យ​ចិន​ពីរ​នាក់​ប្ដី​ប្រពន្ធ​នោះ​មិន​ទាន់​មាន​លុយ​សង​និង​បាន​ឃាត់ខ្លួន​ជា​បណ្ដោះអាសន្ន​សិន​៕

Source: Kampuchea Thmey Daily