ភ្នំពេញ ៖ ក្រសួងសុខាភិបាលបានបើកមជ្ឈមណ្ឌលបង្ការជំងឺឆ្កែឆ្កួតទី៣នៅខេត្តបាត់ដំបងខណៈពីរ២កន្លែង ទៀតនៅរាជធានីភ្នំពេញគឺនៅវិទ្យាស្ថានប៉ាស្ទ័រកម្ពុជា និងនៅវិទ្យាស្ថានជាតិស្រាវជ្រាវសុខភាពសាធារណ។
លោកស្រីវេជ្ជបណ្ឌិត ឱ វណ្ណឌីន អគ្គនាយកបច្ចេកទេសសុខាភិបាល តំណាងដ៏ខ្ពង់ខ្ពស់លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាលដែលបានចូលរួមនៅក្នុងពិធីសម្ពោធមជ្ឈមណ្ឌលបង្ការជំងឺឆ្កែឆ្កួតកាលពីពេលថ្មីៗនេះបានមានប្រសាសន៍ថា ការដាក់ឲ្យប្រើប្រាស់មជ្ឈមណ្ឌលបង្ការជំងឺឆ្កែឆ្កួតនេះ គឺជាការអនុវត្តទៅតាមគោលនយោបាយរបស់រាជរដ្ឋាភិបាលក្នុងអាណត្តិទី៦នៃរដ្ឋសភាក្នុងការបង្ខិតសេវាបង្ការជំងឺ ឲ្យកាន់តែខិតទៅជិតប្រជាពលរដ្ឋនៅពេលដែលពួកគាត់ត្រូវការ អាចមកមជ្ឈមណ្ឌលនេះបានដោយពុំចាំបាច់ធ្វើដំណើរទៅឆ្ងាយដូចពេលមុនៗទៀតនោះឡើយ។
លោកស្រីវេជ្ជបណ្ឌិតបានបន្តថា កន្លងមកអ្នករងគ្រោះដោយសត្វខាំ នៅក្នុងបណ្តាខេត្តនានា ដូចជាខេត្តបាត់ដំបង ខេត្តប៉ៃលិន ខេត្តបន្ទាយមានជ័យ ខេត្តឧត្តរមានជ័យ និងខេត្តពោធិ៍សាត់ ពិបាកក្នុងការស្វែងរកសេវាដល់រាជធានីភ្នំពេញដែលមានចម្ងាយឆ្ងាយ ហើយត្រូវការពេលធ្វើដំណើរក៏យូរដែរ។
លោកស្រីវេជ្ជបណ្ឌិតបានបន្តទៀតថា ក្រសួងសុខាភិបាល បានដាក់គោលដៅកាត់បន្ថយឲ្យនៅកំរិតអប្បបរមានូវជំងឺដែលចម្លងតាមរយៈសត្វឆ្កែឆ្កួតដ៏គួរឲ្យខ្លាចនេះ ដោយជំងឺនេះនឹងបន្តសម្លាប់ជីវិតមនុស្សជាច្រើននាក់ក្នុង១ឆ្នាំៗ។ ជាក់ស្តែងវិទ្យាស្ថានប៉ាស្ទ័រកម្ពុជាបានផ្តល់ថ្នាំបង្ការដល់អ្នករងគ្រោះដោយសត្វខាំប្រមាណជាង ២២០០០នាក់ក្នុង១ឆ្នាំ ដែលក្នុងនោះភាគច្រើនជាកុមារ។
លោកស្រីវេជ្ជបណ្ឌិតបានបន្ថែមទៀតថា ថ្នាំបង្ការជំងឺឆ្កែឆ្កួតមានប្រសិទ្ធភាពខ្ពស់ណាស់ ប៉ុន្តែក្នុងករណីឆ្លងជំងឺឆ្កែឆ្កួត ហើយមានចេញជារោគសញ្ញានោះ គឺការវិវត្តន៍ទៅរកសេចក្តីស្លាប់ក៏ខ្ពស់ណាស់ដែរ ប្រសិនបើមិនបានទទួលថ្នាំបង្ការក្រោយសត្វខាំទេនោះ។
លោកស្រីវេជ្ជបណ្ឌិតបានថ្លែងអំណរគុណដល់វិទ្យាស្ថានប៉ាស្ទ័រ ចំពោះកិច្ចសហការដ៏មានសារប្រយោជន៍នេះ ដែលជាប្រយោជន៍ដល់ប្រជាជនកម្ពុជា ព្រោះថាមជ្ឈមណ្ឌលនេះក៏មានគោលដៅបណ្តុះបណ្តាល ផ្តល់ចំណេះដឹង និងផ្សព្វផ្សាយជូនដល់អាជ្ញាធរ និងប្រជាពលរដ្ឋអំពីជំងឺឆ្កែឆ្កួត និងអំពីវិធីចៀសវាងផ្សេងៗអំពីជំងឺនេះផងដែរ។
លោកស្រីវេជ្ជបណ្ឌិតបានជំរុញឲ្យ មានការគាំទ្រពីផ្នែកផ្សេងៗទៀត និងពីប្រជាពលរដ្ឋក្នុងការប្រើប្រាស់មជ្ឈមណ្ឌលនេះ ឲ្យបានច្រើនដើម្បីជាផលប្រយោជន៍ការពារជំងឺឆ្កែឆ្កួតនៅក្នុងព្រះរាជាណាចក្រកម្ពុជា។
លោកបណ្ឌិត Didier FONTENILLE ប្រធានវិទ្យាស្ថានប៉ាស្ទ័រកម្ពុជា ក៏បានសំដែងនូវអំណរគុណជូនលោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល ដែលជានិច្ចកាលតែងតែគាំទ្រ លើកទឹកចិត្ត និងជំរុញកិច្ចសហប្រតិបត្តិការចេញជាផ្លែផ្កាដូចយើងបានឃើញនូវសមិទ្ធផលនាថ្ងៃនេះស្រាប់ ហើយនឹងបន្តសកម្មភាពបង្ការជំងឺឆ្កែឆ្កួតនេះឲ្យកាន់តែទូលំទូលាយលាយថែមទៀត។
គួរកត់សម្គាល់ថា មជ្ឈមណ្ឌលបង្ការជំងឺឆ្កែឆ្កួតនៅខេត្តបាត់ដំបងនេះ គឺជាការសហការរវាងវិទ្យាស្ថានប៉ាស្ទ័រកម្ពុជាជាមួយមន្ទីរសុខាភិបាលខេត្ត និងអនុវត្តតាមនិយាមបច្ចេកទេសបង្ការជំងឺដូចនៅវិទ្យាស្ថានប៉ាស្ទ័រនៅភ្នំពេញដែរ ដើម្បីអាចការពារប្រជាជនក្នុងខេត្តបាត់ដំបងផ្ទាល់ ក៏ដូចជាខេត្តដែលនៅជាប់៕
Source: Kampuchea Thmey Daily
0 Comments