ភ្នំពេញ ៖ ក្រុមហ៊ុនដៃគូ សមាគមអ្នក បញ្ជាទិញ និងសមាគមយុត្ដិធម៌ការងារសហរដ្ឋអាមេរិក បានសន្យាថានឹងបន្ដកិច្ចសហប្រតិបត្តិការជាមួយ កម្ពុជាលើការបញ្ជាទិញទំនិញ ផលិតផលសម្លៀកបំពាក់និងស្បែកជើង ដើម្បីនាំចេញទៅកាន់សហរដ្ឋ អាមេរិក និងសហគមន៍អឺរ៉ុបជាបន្តទៀត។
ការអះអាងរបស់អ្នកបញ្ជាទិញរបស់សហរដ្ឋអាមេរិកនេះបានធ្វើឡើងនៅក្នុងជំនួបពិភាក្សាការងារជាមួយលោកបណ្ឌិតអ៊ិត សំហេង រដ្ឋមន្ដ្រីក្រសួងការងារ និងបណ្ដុះបណ្ដាលវិជ្ជាជីវៈកាលពីព្រឹកថ្ងៃទី១៩ ខែតុលា ឆ្នាំ២០១៨ នៅទីស្តីការក្រសួងការងារ។
ថ្លែងប្រាប់ក្រុមអ្នកសារព័ត៌មានក្រោយពីជំនួបពិភាក្សាការងារជាមួយសមាគមអ្នកបញ្ជាទិញ ដឹកនាំដោយលោក Mechael Posner ប្រធានក្រុមប្រឹក្សាភិបាលនៃសមាគមយុត្ដិធម៌ការងារសហរដ្ឋអាមេរិក លោករដ្ឋមន្ត្រីបានមានប្រសាសន៍ ថា ក្រុមហ៊ុនដៃគូ និងសមាគមអ្នកបញ្ជាទិញទាំងអស់ ប្រកាសនៅតែបន្ដគាំទ្រដល់កម្ពុជា ដើម្បី ធានាដល់ការប្រកួតប្រជែងរបស់កម្ពុជាសម្រាប់ការនាំចេញទំនិញ និងផលិតផលនាំចេញសម្លៀកបំពាក់ និងស្បែកជើង។
លោករដ្ឋមន្ត្រីបានបញ្ជាក់ថា ការជួបពិភាក្សាគ្នានេះគឺ ដើម្បីពិនិត្យមើលអំពីវឌ្ឍនភាពទាក់ទងនឹងលក្ខខណ្ឌការងារ ការរៀបចំប្រាក់ឈ្នួល យន្ដការដោះស្រាយវិវាទ និងការអនុវត្ដច្បាប់សហជីពនៅក្នុងប្រទេសកម្ពុជា។
លោករដ្ឋមន្ដ្រីបានបញ្ជាក់ទៀតថា ដៃគូអ្នកបញ្ជាទិញចង់ដឹងពីវឌ្ឍនភាព បញ្ហាប្រឈមនានា ដែលកម្ពុជាបាននិងកំពុងតែជួបប្រទះ ដើម្បីរួមគ្នាធ្វើយ៉ាងណាស្វែងរកដំណោះស្រាយ និងពង្រឹង កិច្ចសហប្រតិបត្តិការឲ្យកាន់តែរឹងមាំទៅមុខទៀត។
លោករដ្ឋមន្ត្រីសង្ឃឹមថា បញ្ហាប្រឈមនានាដែលបានកើតឡើងនាពេលបច្ចុប្បន្ននេះ ទាក់ទងនឹងពាណិជ្ជកម្មនៅក្នុងពិភពលោក នឹងមិនប៉ះពាល់ដល់កិច្ច សហប្រតិបត្តិការរវាងកម្ពុជា និងក្រុមហ៊ុនដៃគូបញ្ជាទិញផលិតសម្លៀកបំពាក់ និងស្បែកជើង ដែលនាំចេញទៅសហរដ្ឋអាមេរិក និងសហគមន៍អឺរ៉ុបនោះទេ។
លោក Mechael Posner ប្រធានក្រុមប្រឹក្សាភិបាលនៃសមាគមយុត្ដិធម៌ការងារសហរដ្ឋអាមេរិក បានលើកឡើងថា ការជួបពិភាក្សាជាមួយភាគីកម្ពុជានេះ គឺដើម្បីចង់ដឹងអំពីដំណើរការ និងការខិតខំប្រឹងប្រែង របស់រាជរដ្ឋាភិបាលកម្ពុជាដែលបានអនុវត្ដន៍លក្ខខណ្ឌការងារ ការរៀបចំប្រាក់ឈ្នួល យន្ដការដោះស្រាយវិវាទ និងការអនុវត្ដច្បាប់សហជីព ជាពិសេសការទទួលបាននូវព័ត៌មានដោយ ផ្ទាល់ពីភាគីរាជរដ្ឋាភិបាល។
លោកបានបន្ដថា ក្រុមហ៊ុនដៃគូទាំងអស់ ប្រកាសធានាដល់ការប្រកួតប្រជែង និងការបញ្ជាទិញទំនិញ ផលិតសម្លៀកបំពាក់ និងស្បែកជើងពីកម្ពុជាបន្ដទៀត៕
Source: Kampuchea Thmey Daily
0 Comments