កាលពីថ្ងៃចន្ទ ក្រុមអ្នកស្ម័គ្រចិត្តឥណ្ឌូនេស៊ីបានចាប់ផ្តើមកប់សាកសពនៅក្នុងផ្នូរដ៏ធំមួយដែលមានទំហំអាចដាក់សាកសពបានជាងមួយពាន់នាក់បន្ទាប់ពីការរញ្ជួយដីនិងរលកយក្សស៊ូណាមិបានបំផ្លិចបំផ្លាញកោះ Sulawesi និងបណ្តាលឲ្យអាជ្ញាធរត្រូវតស៊ូជាមួយនឹងផលលំបាកក្រោយគ្រោះមហន្តរាយនេះ។
គ្មានអ្វីជារឿងចម្លែកទេដែលប្រទេសឥណ្ឌូនេស៊ីជួបប្រទះនឹងគ្រោះធម្មជាតិហើយរដ្ឋាភិបាលក្រុងហ្សាការតាចង់បង្ហាញថា ខ្លួនអាចដោះស្រាយជាមួយមហន្តរាយមួយនេះដែលបានសម្លាប់មនុស្សយ៉ាងតិច៨៣២នាក់បើគិតមកដល់ពេលនេះដោយយោងតាមតួលេខផ្លូវការ។
ប៉ុន្តែនៅតាមតំបន់ដាច់ស្រយាលមួយចំនួនមិនទាន់ទាក់ទងបាននៅឡើយទេហើយថ្នាំពេទ្យកំពុងអស់ខណៈអ្នកជួយសង្គ្រោះកំពុងជួបប្រទះនឹងការខ្វះខាតសម្ភារៈធុនធ្ងន់នៅពេលពួកគេព្យាយាមស្វែងរកជនរងគ្រោះដែលស្រែកចេញពីសំណង់អគារបាក់បែក។
ជាការឆ្លើយតប លោកប្រធានាធិបតី Joko Widodo បានបើកទ្វារសម្រាប់ភ្នាក់ងារជំនួយអន្ដរជាតិនិងអង្គការក្រៅរដ្ឋាភិបាលជាច្រើនដែលត្រៀមខ្លួនផ្តល់ជំនួយសង្គ្រោះជីវិត។
ក្រុមមន្ត្រីបារម្ភថា ចំនួនអ្នកស្លាប់នឹងកើនឡើងយ៉ាងខ្លាំងក្នុងរយៈពេលប៉ុន្មានថ្ងៃខាងមុខនេះហើយឥណ្ឌូនេស៊ីបានប្រកាសដាក់រដ្ឋក្នុងគ្រាអាសន្នរយៈពេល១៤ថ្ងៃ។
នៅតំបន់ Poboya, ក្រុមអ្នកស្ម័គ្រចិត្តបានចាប់ផ្តើមកប់សាកសពជាមួយនឹងការណែនាំឲ្យត្រៀមខ្លួនសម្រាប់ជនរងគ្រោះចំនួន១,៣០០នាក់។
អាជ្ញាធរមានភាពអស់សង្ឃឹមក្នុងការទប់ស្កាត់ការផ្ទុះឡើងនៃជំងឺណាមួយដែលបណ្តាលមកពី សាកសពដែលស្អុយរលួយ។
ក្រុមអ្នកជួយសង្គ្រោះកំពុងតស៊ូជាមួយពេលវេលានិងកង្វះខាតឧបករណ៍ដើម្បីជួយសង្គ្រោះអ្នកដែលនៅតែជាប់ក្នុងគំនរបាក់បែកខណៈមនុស្សរហូតដល់ទៅ៦០នាក់ត្រូវបានគេព្រួយបារម្ភថាត្រូវជាប់នៅក្រោមសណ្ឋាគារ Palu។
អ្នករស់រានមានជីវិតដែលអស់សង្ឃឹមបានលួចទំនិញក្នុងហាងជាច្រើនដូចជាម្ហូបអាហារ ទឹកនិងប្រេងឥន្ធនៈនៅពេលប៉ូលិសបានត្រឹមតែសម្លឹងមើលនិងមិនអាចធ្វើអន្តរាគមន៍បានទេ។
ទន្ទឹមនឹងនេះដែរ មន្ត្រីរដ្ឋាភិបាលបាននិយាយថា អ្នកទោសចំនួន១,២០០នាក់បានភៀសខ្លួនចេញពីពន្ធនាគារយ៉ាងហោចណាស់បីនៅក្នុងតំបន់៕ AFP
Source: Kampuchea Thmey Daily
0 Comments