ការប្រកួតជម្រុះដណ្តើមខ្សែក្រវាត់ជើងឯកCarabao ទម្ងន់៦០ គីឡូក្រាម នៅសង្វៀនទូរទស្សន៍SEATV នៅរសៀលថ្ងៃសៅរ៍ទី២០ ខែតុលា ឆ្នាំ២០១៨នេះ ជាការប្រកួតសប្ដាហ៍ទី៧ ជុំទី៣ រវាងអ្នកប្រដាល់កម្ពុជាសូត្រ ប៊ុនធី ក្លិបបក្សីស្លាបដែក និងអ្នកប្រដាល់ថៃ Phat Maha ហើយអ្នកប្រដាល់កម្ពុជា លី ភា ក្លិបសំរោងកោងខេត្តបាត់ដំបង និង អ្នកប្រដាល់ថៃ Phat Chhayak Phum។
សូត្រប៊ុនធី និង Phat Maha ពួកគេទាំងពីរនាក់នេះ ធ្លាប់ជួបគ្នាម្តងហើយមុនចូលរួមការប្រកួតដណ្តើមខ្សែក្រវាត់នេះ ដោយក្នុងការជួបគ្នាពេលនោះ Phat Maha ត្រូវសូត្រ ប៊ុនធី វាយអោយសន្លប់ក្នុងទឹកទី៣(១៩សីហា២០១៨)។ តែយ៉ាងណាសូត្រ ប៊ុនធី និង Phat Maha នេះ គេមានសមត្ថភាពប្រហាក់ប្រហែលគ្នាទេ គ្រាន់តែប៊ុនធីមានកំនត់ត្រាប្រកួតច្រើនជាងនិងមានកម្ពស់ខ្ពស់ជាងប៉ុណ្ណោះ។
Phat Maha គេមានកំនត់ត្រាប្រកួតចំនួន៦៩លើក ឈ្នះ៥៧លើកនិងចាញ់១១លើកនិងស្មើ០១លើក។ ចំណែកសូត្រ ប៊ុនធី គេមានកំនត់ត្រាប្រកួត១១២លើក ឈ្នះ៨៨លើក ចាញ់២០លើក និងស្មើ០៤លើក។ ប៊ុនធី គេប្រកួតជុំទី២ (២៩កញ្ញា២០១៨) គេវាយឈ្នះ Phat Ngen thong ដោយពិន្ទុ។ ចំណែក ការប្រកួតជុំទី២របស់ Phat Maha (២២កញ្ញា២០១៨) គឺចាញ់ឃីម បូរ៉ា ក្នុងទឹកទី២។
ដូច្នេះអ្នកប្រដាល់ថៃរូបនេះ វាយចាញ់ឃីម បូរ៉ា ហើយនោះ គឺមិនសង្ឃឹមថា វាយឈ្នះសូត្រ ប៊ុនធីនោះឡើយ សម្រាប់ការជួបគ្នាជុំទី៣នេះ ព្រោះថាសូត្រ ប៊ុនធីគេល្អនិងខ្លាំងជាងឃីម បូរ៉ា ទៅទៀត ។ ប៉ុន្តែយ៉ាងណា ពុំអាចសន្និដ្ឋានមុនថា អ្នកណាឈ្នះ អ្នកណាចាញ់នោះទេ ហើយពីរនាក់នេះ ក៏មិនអាចអ្នកណាមើលស្រាលអ្នកណាបានដែរ ។
ចំពោះការជួបគ្នារវាង លី ភា និង Phat Chhayak Phum វិញ ប្រហែលជាពិបាកបន្តិចហើយ បើទោះបីថា លីភា គេមានផ្លែល្អជាង Phat Chhayak Phum ក៏ដោយ ក៏អ្នកប្រដាល់ថៃ Phat Chhayak Phum ជាអ្នកប្រដាល់ជើងចាស់ ស៊ូ និងរឹងមាំដែរ ។
Phat Chhayak Phum គេធ្លាប់មកប្រកួតនៅស្រុកខ្មែរច្រើនលើកហើយកន្លងមក ។ តាមការកត់សម្គាល់ Phat Chhayak Phum គេវាយល្អនិងខ្លាំងគួរសមដែរ។ បើមើលពីប្រវត្តិប្រកួតរបស់គេ គឺប្រកួតបាន៨៧លើក ឈ្នះ៧០លើក និងចាញ់១៤លើក និងស្មើម្តង ។
លី ភា អ្នកប្រដាល់កម្ពុជាយើងនេះ គេមានប្រវត្តិប្រកួត៦៧លើក ឈ្នះ៥៥លើក ចាញ់១២លើក និងមិនដែលស្មើ ។ យ៉ាងណាសម្រាប់ការប្រកួតជុំទី៣នេះ គេរំពឹងថា លី ភា នឹងរកបាន៣ពិន្ទុបន្ថែមមិនខាន ក្នុងការជួប Phat Chhayak Phum នេះ ។ Phat Chhayak Phum កាលពីប្រកួតជុំទី២ គេវាយចាញ់សុខ សាវិនក្លិបឆ្មាសសែនសុខគុនខ្មែរ ក្នុងទឹកទី៣ ខណះលី ភា ជុំទី២គេវាយចាញ់ Phat Thana ក្នុងទឹកទី៣ដែរ ។
សូមបញ្ជាក់ថា ការប្រកួតជើងឯកខារ៉ាបាវរដូវកាលទី៧ ទម្ងន់៦០គីឡូក្រាមលើកនេះ មានអ្នកប្រដាល់ខ្លាំងៗចំនួន ៨ រូប ចូលរួមប្រកួត គឺខ្មែរ៤នាក់ ថៃ៤នាក់ ។ អ្នកប្រដាល់ខ្មែរទាំង៤នាក់នោះ រួមមានឃីម បូរ៉ា ក្លិបរស្មីភូមិគាបខេត្តបន្ទាយមានជ័យ , សុខ សាវិន ក្លិបឆ្មាសសែនសុខគុនខ្មែរ , លី ភា ក្លិបសំរោងកោងខេត្តបាត់ដំបង និងសូត្រ ខេវិន ក្លិបបក្សីស្លាបដែក។ ឯ អ្នកប្រដាល់ថៃ ៤ នាក់វិញ មាន Phat ChhayakPhum , Phat Maha , Phat Ngenthong និង Phat Thana ។
ចំពោះការប្រកួតរវាងអ្នកប្រដាល់រួមជាតិវិញ វៀត ប៊ុនឌឿន អ្នកប្រដាល់សមាគមកីឡាប្រដាល់ក្រសួងការពារជាតិ នឹងឡើងទូទាត់បំណុលជាមួយសារឿនច័ន្ទ អ្នកប្រដាល់ក្លិបតាព្រហ្មមានជ័យ ដោយជួបគ្នាក្នុងទម្ងន់៦០គីឡូក្រាម ។
ពីរនាក់នេះ ធ្លាប់ជួបគ្នាពីរលើកហើយកាលពីក្នុងឆ្នាំ២០១៣-២)១៤ ហើយវៀត ប៊ុនឌឿន គេចាញ់ទាំងពីរលើក ។ ចាំមើល ជួបគ្នាលើកនេះ តើវៀត ប៊ុនឌឿន អាចយកឈ្នះវៀត ប៊ុនឌឿន បានសម្រេចឬអត់ ? ។
ចំណែក អ្នកប្រដាល់ភុន សោភ័ណ្ឌ ក្លិបនាគរាជមានជ័យ ក៏នឹងឡើងសងសឹកធា នុរាជ អ្នកប្រដាល់ក្លិបមកុដរាជសីហ៍ ដោយជួបប្រកួតគ្នាក្នុងប្រភេទទម្ងន់៦៥គីឡូក្រាម ។សម្រាប់ការជួបសងសឹកនេះ ពុំដឹងថាភុន សោភ័ណ្ឌ សងសឹកបានសម្រេចឬអត់នោះទេ?៕
Source: Kampuchea Thmey Daily
0 Comments