ភ្នំពេញ ៖ បុរសម្នាក់ បានរងរបួសព្រោះតែរលាកភ្លើងដោយសារតែគាត់មានការធ្វេសប្រហែសខណៈដែលដាំបាយក្បែរប៊ីដុងសាំងបណ្ដាលឲ្យឆាបឆេះសន្ធោសន្ធៅ និងរាលដាលឆេះម៉ូតូអស់២គ្រឿងថែមទៀត បង្កការភ្ញាក់ផ្អើលកាលពីវេលាម៉ោង១០និង៣០នាទីព្រឹក ថ្ងៃទី១៥ ខែតុលា ឆ្នាំ២០១៨ នៅចំណុចក្នុងបរិវេណកំពង់ផែបណ្តែតផ្លូវព្រះស៊ីសុវត្ថិ ក្នុងសង្កាត់វត្តភ្នំ ខណ្ឌដូនពេញ។
សមត្ថកិច្ច បានឲ្យដឹងថា ជនរងគ្រោះ ដែលជាអ្នកបង្កហេតុខ្លួនឯងនោះ ឈ្មោះធូ ចែម ភេទប្រុស អាយុ២៧ឆ្នាំ ជនជាតិខ្មែរមុខរបរជាងផ្សារដែក ស្នាក់នៅកន្លែងកើតហេតុ បានរបួសរលាកមុខដៃ និងជើងកំពុងសម្រាកព្យាបាលនៅមន្ទីរពេទ្យកាលម៉ែត និងសម្ភារៈខូចខាតរួមមានម៉ូតូចំនួនពីរគ្រឿងទី១ម៉ូតូម៉ាកហុងដាសេ ១២៥ ពណ៌ខ្មៅផលិតឆ្នាំ២០១៧ ទី២ម៉ូតូស្មាស់ពណ៌ខ្មៅ ផលិតឆ្នាំ២០១៣ស្លាកលេខ 1BN 1674។
ប្រភពព័ត៌មានពីកន្លែងកើតហេតុ បានឲ្យដឹងថា បន្ទាប់ពីធ្វើការជាជាងផ្នែកផ្សារដែកដល់ម៉ោងកើតហេតុនោះ ជនរងគ្រោះគាត់បានដាំបាយដើម្បីហូបអាហារថ្ងៃត្រង់ តែគាត់មានការធ្វើធ្វេសប្រហែស ដោយការដាំបាយរបស់គាត់នោះគឺនៅជិតនឹងប៊ីដុងសាំង ក៏បណ្តាលឲ្យឆាបឆេះសន្ធោសន្ធៅរលាកខ្លួនគាត់ទៀតផង ព្រមទាំងរាលដាលឆេះខ្ទេចអស់ម៉ូតូចំនួន២គ្រឿងនៅក្បែរនោះផងដែរ។
ប្រភពព័ត៌មានបានបន្តទៀតថា ក្នុងពេលដែលហេតុការណ៍គ្រោះអគ្គិភ័យនោះ ភ្លាមៗលោកសុខ ពេញវុធ អភិបាលខណ្ឌដូនពេញបានបញ្ជាឲ្យកម្លាំងប្រជាការពារខណ្ឌប្រញាប់ចេញម៉ូតូទឹកខណ្ឌចំនួន២រ៉ឺម៉កមកជួយបាញ់ទឹកពន្លត់ភ្លើងរហូតរលត់ជាស្ថាពរវិញនៅវេលាម៉ោង១១និង០៥នាទីថ្ងៃដដែលផងដែរ៕
Source: Kampuchea Thmey Daily
0 Comments