អ្នកប្រដាល់ជើងខ្លាំងផល សោភ័ណ្ឌ ក្លិបតាឡីដំរីមានរិទ្ធ នឹងត្រូវជួបជាមួយអ្នកប្រដាល់ជើងខ្លាំងថៃលូកយ៉ត ស៊ិក ស.ក (Lukyod Site Sor.Kor) នាយប់ថ្ងៃសុក្រទី១៩ ខែតុលា ឆ្នាំ២០១៨នេះ នៅលើសង្វៀនខារ៉ាបាវបាយ័នស្ទឹងមានជ័យ។ ពួកគេទាំងពីរ នឹងប្រកួតគ្នាក្នុងទម្ងន់៦៣,៥០០គីឡូក្រាម។
លូកយ៉ត ស៊ិក ជាអ្នកប្រដាល់ជើងខ្លាំងនៅស្រុកថៃ។ តាមប្រវត្តិ លូកយ៉ត ស៊ិក ធ្លាប់មកប្រកួតនៅសង្វៀនស្រុកខ្មែរច្រើនលើកហើយកន្លងមក ។ ទោះជាយ៉ាងនេះក្តី អ្នកប្រដាល់ថៃរូបនេះ លើកនេះ ជួបប្រកួតជាមួយផលសោភ័ណ្ឌប្រហែលជាមានការលំបាកបន្តិចហើយ ព្រោះសោភ័ណ្ឌមានបច្ចេកទេសល្អ កណ្តាប់ដៃរហ័ស ខ្លាំង ហើយកែង ក៏មុតស្រួចទៀត ។
ប៉ុន្តែយ៉ាងណា អ្នកប្រដាល់ថៃនេះ គឺមិនអាចថា គេខ្សោយជាងសោភ័ណ្ឌនោះទេ ព្រោះ លូកយ៉ត ស៊ិក គេធ្លាប់វាយឈ្នះអ្នកប្រដាល់ខ្មែរយើងដែរ ។
ផល សោភ័ណ្ឌ គេមានប្រវត្តិប្រកួតចំនួន១៣១លើក ។ក្នុងនោះ ផល សោភ័ណ្ឌវាយឈ្នះ១១៥លើកហើយ ដោយចាញ់តែ១៤លើកនិងស្មើ០២លើក ហើយធ្លាប់ផ្តួលគូប្រកួតអោយសន្លប់លើរេញចំនួន៤២លើក ។ សោភ័ណ្ឌ ខ្លាំងកណ្តាប់ដៃ និងទាត់ ។ តែទោះជាយ៉ាងណា សោភ័ណ្ឌ ក៏ត្រូវប្រយ័ត្នដែរ សម្រាប់ការប្រកួតលើកនេះ។ ដូច្នេះចាំមើល តើនរណាឈ្នះរវាងផល សោភ័ណ្ឌ និងលូកយ៉ត ស៊ិក នេះ ? ។
ចំពោះ អ្នកប្រដាល់ជើងខ្លាំងចាន់ ប៊ុនលាភ ក្លិបនិរោធមានជ័យនោះ នឹងត្រូវជួបប្រកួតជាមួយអ្នកប្រដាល់ថៃឈ្មោះ ចក្រផេត ផ.ស៊ីវឡាក់ (Jakpetch Phor.Ziwluck)។ពួកគេជួបគ្នាក្នុងប្រភេទទម្ងន់៦៣,៥០០គីឡូក្រាម ។
ចក្រផេត ផ.ស៊ីវឡាក់ នេះ គេក៏ជាជើងខ្លាំងមួយរូបនៅស្រុកថៃដែរ តែគេមិនធ្លាប់មកប្រកួតនៅស្រុកខ្មែរទេកន្លងមក ។ ចក្រផេត ផ.ស៊ីវឡាក់ មានប្រវត្តិប្រកួតត៦៩លើក ឈ្នះ៤៦លើក ចាញ់២២លើក និងស្មើ០៣លើក ។ យ៉ាងណា ប៉ះជាមួយ ចាន់ ប៊ុនលាភ ចក្រផេត ផ.ស៊ីវឡាក់ ក៏មិនជាស្រួលខ្លួនប៉ុន្មានដែរ ។
ចាន់ ប៊ុនលាភ គេមានផ្លែល្អ ពិសេសគឺផ្លែកែង និងជង្គង់ ប៉ុន្តែអ្វីដែលគេបារម្ភជំនួសប៊ុនលាភនោះ គឺខ្លាចតែចាញ់កម្លាំងស៊ុហ្វ ចក្រផេត ផ.ស៊ីវឡាក់ មួយមុខប៉ុណ្ណោះ។ ចាន់ ប៊ុនលាភ ប្រកួតប៉ុន្មានចុងក្រោយនេះ រាងស្រុតធ្លាក់កម្លាំងកាយសម្បទា ដែលមើលទៅគឺមានលក្ខណះទន់ជ្រាយមែនទែន ។ គេមិនហ៊ានអះអាងមុនថា ប៊ុនលាភ ឈ្នះ ចក្រផេត ផ.ស៊ីវឡាក់ ក្នុងការប្រកួតនេះទេ ។ ចាំមើល តើប៊ុនលាភឈ្នះឬមួយក៏ ចក្រផេត ផ.ស៊ីវឡាក់ ឈ្នះសម្រាប់ការជួបគ្នាលើកដំបូងនេះ? ។
ចំណែក ការប្រកួតរវាងអ្នកប្រដាល់រួមជាតិវិញ នូវ ដារ៉ូ អ្នកប្រដាល់ក្លិបអាណាចក្រគុនខ្មែរ នឹងជួបប្រកួតជាមួយអ្នកប្រដាល់ ទី ពន្លែត ក្លិបអង្គរមានជ័យខេត្តសៀមរាប ។ ពីរនាក់នេះ ជួបគ្នាក្នុងប្រភេទទម្ងន់៦៥គីឡូក្រាម ។ យ៉ាងណា រវាងពួកគេពីរនាក់នេះ ពុំមាននរណាហ៊ានទស្សន៍ទាយមុនថា អ្នកណា ឈ្នះ អ្នកណាចាញ់នោះឡើយ ។ ចាំមើល តើ នូវ ដារ៉ូ អាចយកឈ្នះទី ពន្លែត បានឬអត់ ? ។
គីម សុខហេង អ្នកប្រដាល់ក្លិបកងពលតូចទ័ពឆ័ត្រយោង៩១១ ត្រូវគេផ្គូអោយជួបប្រកួតជាមួយ ចែម ចឺម អ្នកប្រដាល់ក្លិបរាជសីហ៍ខេត្តរតនគិរី ដោយប្រកួតក្នុងប្រភេទទម្ងន់៥៤គីឡូក្រាម៕
Source: Kampuchea Thmey Daily
0 Comments