ក្នុងនាមជាម្ចាស់ជើងឯកនៃពានរង្វាន់លីគកំពូលកម្ពុជា (Metfone Cambodian League 2018) ក្លិបណាហ្គាវើល មានឈ្មោះចេញទៅចូលរួមប្រកួតក្នុងពានរង្វាន់កម្រិតទី២ប្រចាំទ្វីបអាស៊ី គឺAFC Cup 2019 ដែលនឹងប្រកួតនៅឆ្នាំក្រោយ ខណៈក្រុមមួយនេះនឹងទទួលបានប្រាក់ឧបត្ថម្ភរហូតដល់៤ម៉ឺនដុល្លារអាមេរិកដូចក្រុមផ្សេងៗដែរ រាល់ពេលចេញទៅប្រកួតម្តងៗ។
យោងតាមលោក ឆាំង ពិសិដ្ឋ លេខាធិការប្រតិបត្តិនៃគណៈកម្មការប្រកួតបាល់ទាត់ជាតិ បានលើកឡើងថា ការធ្វើដំណើរទៅប្រកួតក្រៅដីរបស់ ណាហ្គាវើល នៅពាន AFC Cup ទទួលបានប្រាក់ឧបត្ថម្ភចំនួន ៤ម៉ឺនដុល្លារអាមេរិក ពីសហព័ន្ធកីឡាបាល់ទាត់ទ្វីបអាស៊ី (AFC)។ លោកបញ្ជាក់ថា ប្រាក់ឧបត្ថម្ភការធ្វើដំណើរនៅក្រៅដី ឬ ហៅថា Travel Subsidy កើនឡើងទ្វេដង ព្រោះឆ្នាំមុន ទទួលបានត្រឹមតែ ២ ម៉ឺនដុល្លារប៉ុណ្ណោះ។ ចំណែកការប្រកួតនៅក្នុងផ្ទះ មិនទទួលបានប្រាក់ឧបត្ថម្ភនេះពី AFC នោះទេ។ រីឯ ប្រាក់រង្វាន់ជើងឯក AFC Cup 2019 ក្រុមដែលឈ្នះពាននឹងទទួលបាន ១,៥ លានដុល្លារ ហើយ ជើងឯករងទទួលបាន ៧៥០,០០០ ដុល្លារ ដូចឆ្នាំមុនដែរ។
យោងតាមការចាប់ឆ្នោតដែលបានធ្វើនៅទីក្រុងកូឡាឡាំពួរ ប្រទេសម៉ាឡេស៊ី ថ្មីៗនេះសង្កេតឃើញថា ក្រុមណាហ្គាវើលស្ថិតនៅពូល F ជាមួយក្រុម Hanoi FC ( ម្ចាស់ជើងឯកលីគកំពូលវៀតណាម ) Tampines Rovers ( ជើងឯករងលីគកំពូលសិង្ហបុរី ) និង Yangon United ( ជើងឯកលីគកំពូលមីយ៉ាន់ម៉ា) ឬ Zwekapin United ក្រុមលេខ៣នៅលីគមីយ៉ាន់ម៉ាដូចគ្នា។
តាមគម្រោងការប្រកួតនឹងចាប់ផ្ដើមនាខែ កុម្ភៈ ដើមឆ្នាំក្រោយតាមរូបមន្តវិលជុំសន្សំពិន្ទុ សរុបស្មើ៦ប្រកួត (ក្នុងដីនិងក្រៅដី) ដើម្បីយកតែមួយក្រុមឡើងទៅវគ្គបន្ត ដោយគ្រោងនឹងបញ្ចប់ការប្រកួតទាំងមូលនៅដើមខែតុលា ឆ្នាំ២០១៩។ នេះជាឆ្នាំទី១ សម្រាប់ណាហ្គាវើល ក្នុងការប្រកួតនៅវគ្គបែងចែកពូលបន្ទាប់ពីបានក្លាយជាម្ចាស់ជើងឯកលីគកំពូលកម្ពុជា ឆ្នាំ២០១៨ ខណៈកាលពីឆ្នាំ២០១៧ ធ្លាប់បានចូលរួមប្រកួតម្តង តែត្រូវប្រកួតជម្រុះនៅវគ្គជម្រុះបឋម។
សម្រាប់ឆ្នាំ ២០១៨ក្នុងពានរង្វាន់ AFC Cup ជើងឯកបានទៅក្លិប Al-Quwa Al-Jawiya របស់អ៊ីរ៉ាក់ក្រោយឈ្នះក្លិប Altyn Asyr របស់ទួរមេនីស្ថាន ក្នុងលទ្ធផល ២-០ នាវគ្គផ្ដាច់ព្រ័ត្រលើទីលានកីឡដ្ឋានBasra Sports City ក្នុងទីក្រុង Basraក្រោមក្រសែភ្នែកទស្សនិកជនប្រមាណជាង២ម៉ឺននាក់ កាលពីចុងខែតុលាកន្លងទៅថ្មីៗនេះ៕
Source: Kampuchea Thmey Daily
0 Comments