កីឡាករ នួន បូរី ទើបតែ​ឈ្នះ​ពានរង្វាន់​៤​ម្នាក់ឯង​បង្ហើប​ពី​មូល​ហេតុដែល​នៅក្រៅ​បញ្ជី​ក្រុម​ជម្រើសជាតិ​កម្ពុជា

​ខ្សែប្រយុទ្ធ នួន បូរី ប្រចាំ​ក្លិប​អគ្គស្នងការដ្ឋាន​នគរ​បាល​ជាតិ (​ប៉ូលីស​) ទើបតែ​ឈ្នះ​ពានរង្វាន់​ឯកត្តជន​៤​ម្នាក់ឯង​នៅក្នុង​ព្រឹត្តិការណ៍​កម្មវិធី​«​ពានរង្វាន់​បាល់ទាត់​កម្ពុជា​» ឬ Cambodian Football Award លើក​ទី​២ ប្រចាំ​រដូវ​កាល​២០១៨ ដែល​រៀបចំឡើង​ដោយ​គណៈកម្មការ​ប្រកួត​បាល់ទាត់​ជាតិ​កម្ពុជា (CNCC) សេនាធិការ​របស់​សហ​ព័ន្ធ​កីឡាបាល់ទាត់​កម្ពុជា ខណៈ​កីឡាករ​រូបនេះ​បាន​សម្លឹង​ឃើញ​ពី​មូលហេតុ​ដែល​ខ្លួន​នៅក្រៅ​បញ្ជី​ក្រុម​ជម្រើសជាតិ​កម្ពុជា ក្នុង​យុទ្ធនា​ការប្រកួត​ពានរ​ង្វាន់ AFF Suzuki Cup 2018 ថ្មីៗ​នេះ​។



​ពានរង្វាន់​ទាំង​៤​ដែល​កីឡាករ​មកពី​ខេត្តកណ្ដាល​រូបនេះ​ទទួលបាន​រួមមាន ពានរង្វាន់​កីឡាករ​ល្អ​ជាងគេ​,​កីឡាករ​ទាត់​បញ្ចូល​ទី​ច្រើនជាងគេ (​ចំនួន​៧​គ្រាប់​) ក្នុង​ពានរង្វាន់​សម្ដេច​តេ​ជោ ហ៊ុន សែន ឆ្នាំ​២០១៨ ។ រីឯ​ពាន ២​ទៀត គឺជា​ពាន​រៀបចំ​ដោយ CNCC ដែល​សម្រេច​ដោយ​គណៈកម្មកា​រ​ជំនាញ ដោយ​ផ្អែកលើ​ការប្រកួត​លី​គ​កំពូល​កម្ពុជា និង​ពានរង្វាន់​សម្ដេច​តេ​ជោ ហ៊ុន សែន រួមមាន​ពាន​កីឡាករ​ក្នុងស្រុក​ទាត់​បញ្ចូល​ទី​ច្រើនជាងគេ អាយុ​ក្រោម​២៣​ឆ្នាំ និង​ពាន​កីឡាករ​ក្នុងស្រុក​ទាត់​បាល់​បញ្ចូល​ទី​ច្រើនជាងគេ​។



កីឡាករ នួន បូរី បាន​បញ្ជាក់ថា «​ដោយសារ​យើង​ខ្វះ​តាក់​តិច​ដែល​គ្រូ​ជម្រើសជាតិ​ចង់បាន​។ តែ​ខ្ញុំ​មិន​សោកស្ដាយ​ទេ​ដែល​មិនបាន​ជាប់​ជម្រើសជាតិ តែ​នឹង​ខំប្រឹង​ព្យាយាម​បំពេញ​នូវ​អ្វីដែល​គ្រូ​ជម្រើសជាតិ​គាត់​ចង់បាន និង​ឆ្ពោះទៅ​គោលដៅ​របស់ខ្លួន​»​។ កីឡាករ​រូបនេះ​ធ្លាប់មាន​ឈ្មោះ​ក្នុង​ក្រុម​ជម្រើសជាតិ​កម្ពុជា​នាពេល​កន្លងទៅ​គឺ​ជំនាន់​គ្រូ​បង្គោល​ប្រេស៊ី​ល Leonardo Vitorino នៅ​ជា​គ្រូបង្វឹក​ក្រុម​ជម្រើសជាតិ​កម្ពុជា តែ​ក្រោយមក​ក៏​ខកខាន​ទៅវិញ​។



សូម​បញ្ជាក់​ថា​ កីឡាករ នួន បូរី វ័យ​២១ ឆ្នាំ​ជា​ម្ចាស់​អាវ​លេខ​៩​បាន​ចូលរួម​ជាមួយ​ក្លិប​អគ្គស្នងការដ្ឋាន​នគរ​បាល​ជាតិ នៅ​ឆ្នាំ​២០១១​។ រូបគេ​ជា​ផ្នែក​មួយ​ជួយ​ឲ្យ​ក្រុម​ធ្លាប់​ឈ្នះ​ពានរង្វាន់​សម្តេច​តេ​ជោ ហ៊ុន សែន ឆ្នាំ​២០១៤ និង​ពានរង្វាន់​ប៉ូលីស​តំបន់​អាស៊ាន នៅ​វៀតណាម ក្នុង​ឆ្នាំ​២០១៣ ផងដែរ​។ រូបគេ​ក៏​ធ្លាប់មាន​ឈ្មោះ​ក្នុង​ក្រុម​ជម្រើសជាតិ​កម្ពុជា ដែរ​ពោលគឺ​ធ្លាប់​ជាប់​ឈ្មោះ​ក្នុង U21 ដល់​ឈុត​ធំ​ផងដែរ​៕

Source: Kampuchea Thmey Daily