ក្រុម​អង្គ​រថា​យ​ហ្គឺ​រ ប្រកាស​រៀបចំ​ទិវា​បាល់ទាត់​នៅ​ខេត្តសៀមរាប ដើមខែ​ធ្នូ​

ក្រុមបាល់ទាត់​ខេ​ម​បូ​ឌា​ន​ថា​យ​ហ្គឺ​រ (Cambodian Tiger FC) សមាជិក​ក្នុង​ពានរង្វាន់​ជម្រើស​ជើងឯក​ជាតិ (Metfone Cambodian League 2018) ដែលមាន​មូលដ្ឋាន​នៅ​ខេត្តសៀមរាប បាន​ប្រកាស​ត្រៀម​រៀបចំ​ព្រឹត្តិការណ៍​ទិវា​បាល់ទាត់ (Football Clinic) នៅលើ​ទឹកដី​របស់ខ្លួន​នៅ​ដើមខែ ធ្នូ ឆ្នាំ​២០១៨ ខាងមុខ​។

យោងតាម​សេចក្តីបញ្ជាក់​របស់​ក្លិប​ដែលមាន​ថៅកែ​ជា​ជនជាតិ​ជប៉ុន មួយ​នេះ​បាន​បញ្ជាក់​ថា «​នៅ​ថ្ងៃអាទិត្យ ទី​០២ ខែធ្នូ ឆ្នាំ​២០១៨ ខាងមុខនេះ ក្លឹប​បាល់ទាត់ អង្គ​រថា​យ​ហ្គឺ​រ នឹង​រៀបចំ​កម្មវិធី Football Clinic ក្នុង​គោលបំណង​ចែករំលែក​ពី​មូលដ្ឋានគ្រឹះ​នៃ​ការលេង​បាល់ទាត់ ហើយ​ប្អូនៗ​មានឱកាស​ហ្វឹកហាត់​ជាមួយ​គ្រូ​អង្គ​រថា​យ​ហ្គឺ​រ ផ្ទាល់ និង​លេង​ជា​ហ្គេម​កម្សាន្ត​ទាំងអស់​ជាមួយ​កីឡាករ​ពួកយើង​ផងដែរ​»​។



​តាម​គម្រោង​កម្មវិធី Football Clinic នេះ​នឹង​បែង​ចែកជា ២​វគ្គ​ក្នុងនោះ​វគ្គ​ទី​១ ត្រូវ​ចាប់ផ្តើម​ពី​ម៉ោង ៣និង១៥នាទី​រសៀល ដល់​ម៉ោង ៥និង៣០ នាទី​ល្ងាច នៅ​តារាង​បាល់ទាត់ HOME SPORTS ហើយ​វគ្គ​ទី​២ ចាប់ផ្តើម​ពី​ម៉ោង ៦និង៣០ នាទី​ល្ងាច ដល់​ម៉ោង ៨និង៤៥ នាទី​យប់ នៅ​តារាង​បាល់ទាត់​វត្ត​បូ​។ សម្រាប់​អ្នកចូលរួម​នឹង​ទទួលបាន​ភេសជ្ជៈ​និង​ទឹក ដោយ​ឥតគិតថ្លៃ ប៉ុន្តែ​អ្នកចូលរួម​ត្រូវតែ​រៀបចំ​ស្បែកជើង​និង​ស្រោមជើង​ដោយ​ខ្លួនឯង​។ បេក្ខជន​ម្នាក់ៗ​អាច​ចូលរួមបាន​តែមួយ​វគ្គ​តែប៉ុណ្ណោះ​ចាប់ផ្តើម​ទទួល​ចុះឈ្មោះ​តាមរយៈ​លេខ​ទូរស័ព្ទ​086 691 947 ឬ​089 767 897​។

ក្រុម​អង្គ​រថា​យ​ហ្គឺ​រ បាន​ប្តូរ​ឈ្មោះ​មកពី​ក្រុម​ត្រាយ​អាស៊ី​ភ្នំពេញ កាលពី​ចុងរដូវ​កាល​២០១៤ ហើយ​នៅ​រដូវ​កាល​២០១៥ គឺជា​កំណត់ត្រា​ល្អ​របស់​ក្លិប​ពោលគឺ អាច​ឡើងដល់​វគ្គ​៤​ក្រុម​ចុងក្រោយ​ទាំង​ពានរង្វាន់​សម្តេច ហ៊ុន សែន និង​ពានរង្វាន់​មិត្ត​ហ្វូ​ន​ខេ​ម​បូ​ឌា​ន​លី​ក ក្រោយ​ឈរ​ចំណាត់ថ្នាក់​លេខ​៣​ដូចគ្នា​។ ក្រុម​នេះ ទទួលបាន​សិទ្ធិ​ប្រើប្រាស់​កីឡដ្ឋាន​ខេត្តសៀមរាប ពី​ក្រសួង​អប់រំ​យុវជន​និង​កីឡា កាលពី​រដូវ​កាល​ឆ្នាំ​២០១៧ កន្លង​ធ្វើជា​ទឹកដី​របស់ខ្លួន​រាល់​ការប្រកួត​នានា​។

ចំណែក​លទ្ធផល​ក្នុង​រដូវ​កាល​ឆ្នាំ​២០១៨ កន្លងទៅ​ក្រុម​អង្គ​រថា​យ​ហ្គឺ​រ បាន​បញ្ចប់​យុទ្ធនាការ​របស់​ខ្លួន​ដោយ​ឈរ​ចំណាត់ថ្នាក់​លេខ​៨ ក្នុងចំណោម​ក្លិប​ទាំង​១២ ក្រោយ​ប្រកួត​បាន​២២​លើក​ឈ្នះ​បាន​៧​លើក ហើយ​ស្មើគ្នា​បាន​៧​លើក​និង​បរាជ័យ​៨​លើក​។ ចំណែក​នៅក្នុង​ពានរង្វាន់​សម្តេច​តេ​ជោ ហ៊ុន សែន វិញ​បាន​ឈរ​ចំណាត់ថ្នាក់​លេខ​៣​ស្ទួន ក្រោយ ប្រកួត​បរាជ័យ​នៅ​វគ្គ​ពាក់កណ្ដាល​ផ្តាច់ព្រ័ត្រ​ដោយ​ថ្វី​ជើង​ក្រុម​អគ្គស្នងការដ្ឋាន​នគរ​បាល​ជាតិ​២​ទល់​០៕

Source: Kampuchea Thmey Daily