កីឡាករខ្មែរ-បារាំង ធារី ចន្ថាប៊ីន ត្រូវបានក្លិបចាស់របស់ខ្លួនគឺTerengganu FAសមាជិកនៅលីគកំពូលរបស់ប្រទេសម៉ាឡេស៊ី (Malaysia Super League) បន្តកិច្ចសន្យា១រដូវកាលទៀត ក្រោយផុតរដូវកាលឆ្នាំ២០១៨ថ្មីៗនេះ ខណៈរូបនឹងទទួលបានប្រាក់ខែខ្ពស់ជាងរដូវកាលមុន ពោលគឺក្បែរៗខ្ទង់ម៉ឺនដុល្លារអាមេរិក។
ប្រភពបានបញ្ជាក់ថា កីឡាករ ធារី ចន្ថាប៊ីន ទទួលបានប្រាក់ខែច្រើនជាងឆ្នាំចាស់ ដោយទទួលបានប្រហែល ៥ ពាន់ដុល្លារតែប៉ុណ្ណោះ ប៉ុន្តែក្រោយបន្តកិច្ចសន្យាថ្មីរួចរូបគេនឹងទទួលបានប្រាក់ខែប្រមាណចន្លោះពី ៧ ពាន់ ទៅ ១ ម៉ឺនដុល្លារអាមេរិក។ កីឡាកររូបនេះទើបតែបានជួយក្រុមឈានដល់វគ្គផ្ដាច់ព្រ័ត្រ Malaysian FA Cup ទៀតប៉ុន្តែចាញ់គ្រាប់បាល់ប៉េណាល់ទីកាត់សេចក្ដីទល់នឹងក្រុម Perak ក្នុងគ្រាប់បាល់ ៤-១ (ថែមម៉ោង ១៥ នាទី ២ដងស្មើ ៣-៣)។ ចំណែកនៅក្នុងលីគកំពូលម៉ាឡេស៊ីវិញ រូបគេបានជួយក្រុមឲ្យស្ថិតនៅលំដាប់ទី៥ នៃលីគកំពូលរដូវកាលកន្លងទៅ។
សូមរំលឹកថា កីឡាករ ធារី ចន្ថាប៊ីន បានធ្វើដំណើរមកកម្ពុជា ដោយចុះកិច្ចសន្យាជាក្លិបភ្នំពេញក្រោនលើកដំបូងកាលពីខែតុលា ឆ្នាំ២០១២ កន្លងទៅ ដំណាលគ្នានឹងមិត្តភក្ដិមកពីបារាំងជាមួយគ្នា កុក បូរីស និង គួច ដានី បន្ទាប់ពីពួកគេបានធ្វើដំណើរជាមួយក្រុមបាល់ទាត់កូនខ្មែរ-អឺរ៉ុប ដែលដឹកនាំដោយអតីតវីរបុរសបាល់ទាត់ខ្មែរ ប៉ែន ផាត មកប្រកួតនៅកម្ពុជា អំឡុងពាក់កណ្ដាលឆ្នាំ២០១២។ រូបគេជាប់ឈ្មោះក្នុងក្រុមជម្រើសជាតិកម្ពុជា តាំងពីឆ្នាំ២០១៤ រហូតដល់ខែតុលា ឆ្នាំ២០១៧ ថ្មីៗនេះ។
នៅដើមរដូវកាលឆ្នាំ២០១៧ រូបគេបានចេញទៅចូលរួមជាមួយក្លិប Krabi FC សមាជិកពានរង្វាន់លីគលំដាប់ទី២នៅប្រទេសថៃ ខណៈនៅពាក់រដូវកាលរូបគេបានផ្លាស់មកលេងនៅកម្ពុជា វិញជាមួយក្លិបអគ្គីសនីកម្ពុជា។ បើនិយាយពីការប្រកបអាជីពក្នុងក្លិប អំឡុងពេលរួមរស់ជាមួយភ្នំពេញក្រោន កីឡាករ ធារី ធ្លាប់លើកពានរង្វាន់មិត្តហ្វូនខេមបូឌានលីគចំនួន២ឆ្នាំជាប់គ្នាមកហើយ គឺនៅឆ្នាំ២០១២ និង ២០១៦ ក្រោយប្រកបអាជីពនៅកម្ពុជា ជាង៤ ឆ្នាំហើយគេក៏ជាផ្នែកមួយជួយឲ្យភ្នំពេញក្រោន ឈ្នះចំណាត់ថ្នាក់លេខ៣ នៃពានរង្វាន់ Toyota Mekong Club Championship 2014 ផងដែរ៕
Source: Kampuchea Thmey Daily
0 Comments