ភ្នំពេញ ៖ ដោយសារតែការប្រើប្រាស់គ្រឿងញៀនហួសកម្រិត បណ្ដាលឲ្យបុរសជនជាតិអូស្ត្រាលីម្នាក់ គាំងបេះដូងស្លាប់ក្នុងសណ្ឋាគារយីហោ ប៊ី ឡាប៊ុង (Bills la bong ) បង្កការភ្ញាក់ផ្អើលដល់សមត្ថកិច្ចខណ្ឌដូនពេញ ចុះទៅត្រួតពិនិត្យកាលពីវេលាម៉ោង៦និង៣០នាទីព្រឹក ថ្ងៃពុធ ៧កើត ខែភទ្របទ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១៤ ខែវិច្ឆិកា ឆ្នាំ២០១៨ ចំណុចផ្ទះលេខ៥ ផ្លូវលេខ១៥៨ ភូមិ១០ សង្កាត់បឹងរាំង ខណ្ឌដូនពេញ។
មន្ត្រីនគរបាលខណ្ឌដូនពេញបានឲ្យដឹងថា ជនបរទេស ដែលស្លាប់នោះ ឈ្មោះ Luke Benjamin Brudenell ភេទប្រុស អាយុ៤២ឆ្នាំ ជនជាតិ អូស្ត្រាលី មុខរបរទេសចរណ៍ ស្នាក់នៅទីតាំងកើតហេតុខាងលើ។
ប្រភពព័ត៌មានបានបន្តថា ក្រោយពេលកើតហេតុ កម្លាំងជំនាញខណ្ឌ សហការជាមួយកម្លាំងប៉ុស្តិ៍បឹងរាំង ចុះទៅដល់កន្លែងកើតហេតុ និងកម្លាំងការិយាល័យនគរបាលបច្ចេកទេស វិទ្យាសាស្ត្រ ដើម្បីបង្កើតគណៈកម្មាធិការធ្វើកោសល្យវិច័យ ពិនិត្យសាកសព ជាលទ្ធផលតាមការពិនិត្យ ការិយាល័យជំនាញបច្ចេកទេសបានបញ្ជាក់ថា សពជនរងគ្រោះមានការប្រីប្រាស់សារធាតុញៀន បណ្ដាលឲ្យគាំងបេះដូងស្លាប់។
សមត្ថបញ្ជាក់ថា នៅកន្លែងកើតហេតុសម្ភារៈបន្សល់ទុក មានលិខិតឆ្លងដែន២ក្បាល PX 0810968 កាតATM ចំនួន០១ លុយដុល្លារ ចំនួន៣៩ដុល្លារ លុយបាត២០បាត លុយ នវ៉េ ១០០ លុយផោន១០ផោន លុយដុង២០.០០០ដុង លុយឡាវ៤.៥០០ឡាវ កាបូបដៃ០១ កាបូបស្ពាយ០១ និងខោអាវមួយចំនួន។
ក្រោយពីពិនិត្យសពរួចរាល់ហើយ ខាងជំនាញបច្ចេកទេស បានយកសពឲ្យទៅសមត្ថកិច្ចមូលដ្ឋានដឹកយកទៅតម្កល់ទុកនៅមន្ទីរពេទ្យរុស្ស៊ី៕
Source: Kampuchea Thmey Daily
0 Comments