តុលាការ​កូរ៉េខាងត្បូង​អនុញ្ញាត​ឲ្យ​មានការ​ជំទាស់​ដោយ​ផ្អែកលើ​ជំនឿ​សាសនា​ចំពោះ​ការចូល​បម្រើកងទ័ព

តុលាការ​ជាន់ខ្ពស់​របស់​ប្រទេស​កូរ៉េខាងត្បូង​បានសម្រេច​នៅ​ថ្ងៃ​ព្រហស្បតិ៍​ថា សីលធម៌​និង​ជំនឿ​ខាង​សាសនា​គឺជា​ហេតុផល​ត្រឹមត្រូវ​ដើម្បី​បដិសេធ​ការបំពេញ​កាតព្វកិច្ច​យោធា​របស់​ប្រទេស​ដែល​នេះ​ជា​ករណី​មួយ​ដែល​ជាប់​ពាក់ព័ន្ធ​នឹង​អ្នក​បដិសេធ​ចូល​បម្រើកងទ័ព​រាប់ពាន់​នាក់​។​
​ជិត​៦៥​ឆ្នាំ​បន្ទាប់ពី​ចប់​សង្គ្រាម​កូរ៉េ ស្ទើរតែ​គ្រប់​បុរស​កូរ៉េ​ទាំងអស់​ដែលមាន​អាយុ​ចន្លោះ​ពី​១៨​ឆ្នាំទៅ​៣៥​ឆ្នាំ​គឺ​ត្រូវតែ​បំពេញ​សេវា​យោធា​រយៈពេល​ពីរ​ឆ្នាំ។

​អ្នកណា​ដែល​មិន​ព្រម​ទទួល​ការហៅ​ចូល​គឺ​ត្រូវ​ទទួលទោស​ជាប់ពន្ធនាគារ​រយៈពេល​១៨​ខែ​ហើយ​អ្នក​បដិសេធ​ចូល​បម្រើ​ស​ប្រហែល​១៩,០០០​នាក់​បាន​ជាប់គុក​តាំងពី​ឆ្នាំ​១៩៥០​មក​ដោយ​ភាគច្រើន​នៃ​ពួកគេ​គឺជា​សាក្សី​របស់​ព្រះ​យេ​ហូ​វ៉ា​ឬ Jehovah's Witness ។​
​
ប៉ុន្តែ​តុលាការ​ជាន់ខ្ពស់​បាន​លុបចោល​ការផ្តន្ទាទោស​អ្នក​បដិសេធ​នៅ​ថ្ងៃ​ព្រហស្បតិ៍​ប៉ុន្មាន​ខែ​បន្ទាប់ពី​សេចក្តីសម្រេច​ជា​ប្រវត្តិសាស្ត្រ​របស់​តុលាការ​រដ្ឋធម្មនុញ្ញ​ដែលថា អាជ្ញាធរ​ត្រូវ​ផ្តល់​ជម្រើស​ជំនួស​ដល់​ការ​បម្រើកងទ័ព​។​
​
ក្នុងករណី​ថ្ងៃ​ព្រហស្បតិ៍​, Jehovah's Witness ម្នាក់​មានត្រកូល Oh គឺ​ត្រូវបាន​គេ​កោះហៅ​ឲ្យ​ចូល​បម្រើកងទ័ព​នៅ​ឆ្នាំ​២០១៣​ប៉ុន្ដែ​បាន​បដិសេធ​ហើយ​ត្រូវគេ​រកឃើញថា​មានទោស​និង​បាន​ចាញ់​បណ្តឹង​ដំបូង​ចំពោះ​តុលាការ​ជាន់ខ្ពស់​។​
​
ប្រធាន​ចៅក្រម Kim Myeong-su បាន​និយាយថា “​នេះ​គឺជា​គំនិត​ភាគច្រើន​របស់​តុលាការ​កំពូល​ដែលថា​ការជំទាស់​ដោយសារតែ​លទ្ធិ​គឺជា​ហេតុផល​ត្រឹមត្រូវ​ដើម្បី​បដិសេធ​ការចូល​បម្រើកងទ័ព​”​។ លោក​បាន​បន្ថែមថា​ការផ្តន្ទាទោស​អ្នក​ដែល​បដិសេធ​ដោយ​ផ្អែកលើ​មូលដ្ឋាន​នៃ​ជំនឿ​សាសនា​គឺ​ត្រូវបាន​ចាត់ទុកថា​ជា​ឧបសគ្គ​ហួសប្រមាណ​ចំពោះ​សេរីភាព​របស់​បុគ្គល​ម្នាក់ៗ​។​
​
ការសម្រេច​នេះ​បាន​ច្រានចោល​សេចក្តីសម្រេច​របស់​តុលាការ​កំពូល​កាលពី​១៤​ឆ្នាំមុន​។​
​យោងតាម Jehovah's Witnesses បាន​ឲ្យ​ដឹងថា មាន​ករណី​ស្រដៀង​គ្នា​នេះ​ជាង​៩០០​ករណី​កំពុងស្ថិត​ក្នុង​រង់ចាំ​ក្នុង​ប្រព័ន្ធ​យុត្ដិធម៌​របស់​ប្រទេស​កូរ៉េខាងត្បូង​ខណៈ​មនុស្ស​៩៦​នាក់​ផ្សេងទៀត​កំពុងតែ​ជាប់គុក​ដោយសារ​មិនបាន​បំពេញ​កាតព្វកិច្ច​របស់​ខ្លួន​៕ AFP

​

Source: Kampuchea Thmey Daily