ភ្នំពេញ ៖ លោក សែម បូរ៉ា អគ្គនាយកទូរទស្សន៍អនឡាញ TNM ត្រូវបានដោះលែងហើយ កាលពីវេលាម៉ោង៤រសៀល ថ្ងៃទី៣១ ខែតុលា ឆ្នាំ២០១៨ តែត្រូវបានដាក់ឲ្យស្ថិតនៅក្រោមការត្រួតពិនិត្យតាមផ្លូវតុលាការ នេះបើតាមការបញ្ជាក់ពីសាមីខ្លួន។
អគ្គនាយកទូរទស្សន៍អនឡាញ TNM ត្រូវបានប៉ូលិសចាប់ខ្លួនកាលពីរសៀលថ្ងៃ២៦ ខែតុលា ឆ្នាំ២០១៨ នៅខេត្តកំពង់ចាម បន្ទាប់ពីមានពាក្យបណ្ដឹងរបស់ប្រជាពលរដ្ឋប្ដឹងទៅស្នងការនគរបាលខេត្តកំពង់ចាម ពីបទ “ឆបោកប្រាក់” ពាក់ព័ន្ធបញ្ហាដីធ្លី។
ទោះយ៉ាងណា ក្រោយពីការដោះលែងឲ្យនៅក្រៅឃុំ គេក៏ឃើញមានប្រជាពលរដ្ឋមួយចំនួន ដែលអះអាងថា រស់នៅភូមិចុង ឃុំសំបូរ ស្រុកបាធាយ ខេត្តកំពង់ចាម បានចេញមកអបអរសាទរផងដែរ។
លោក សែម បូរ៉ា បានថ្លែងក្រោយពីចាកចេញពីតុលាការថា “នៅថ្ងៃនេះខ្ញុំបានចេញក្រៅឃុំ សម្រេចដាក់ឲ្យនៅក្រៅឃុំ ឲ្យស្ថិតនៅក្រោមការត្រួតពិនិត្យតាមផ្លូវតុលាការ ហើយជាចុងក្រោយខ្ញុំអត់មានពាក្យពេចន៍អ្វី ដែលត្រូវថ្លែងអំណរគុណយ៉ាងណានោះទេ គ្រាន់តែអគុណអ្នកដែលបារម្ភពីខ្ញុំបាទ ជាពិសេសសូមអគុណដល់ក្រុមគ្រួសាខ្ញុំ ភរិយាខ្ញុំ ព្រមទាំងបងប្អូនមិត្តរួមអាជីពទាំងអស់ ហើយខ្ញុំសប្បាយចិត្ត សុំតែលើកដៃថា ខ្ញុំមានសេរីភាពនៅក្រៅឃុំហើយបាទ មាសសុទ្ធមិនខ្លាចភ្លើង...ថ្ងៃពុធ ម៉ោង៤ ខ្ញុំបាននៅក្រៅឃុំជាបណ្ដោះអាសន្ន ទៅតាមនីតិវិធី តាមផ្លូវច្បាប់តុលាការ”។
សូមបញ្ជាក់ថា លោក សែម បូរ៉ា អគ្គនាយកទូរទស្សន៍អនឡាញ TNM ក្រោយពីចាប់ខ្លួន ត្រូវបានព្រះរាជអាជ្ញាសម្រេចចោទប្រកាន់ ពីបទ “ឆបោក” នេះបើតាមការបញ្ជាក់របស់ លោក ហួត វុទ្ធី ព្រះរាជអាជ្ញាអមសាលាដំបូងខេត្តកំពង់ចាម ដែលបានថ្លែងប្រាប់កម្ពុជាថ្មីតាមទូរស័ព្ទ កាលពីល្ងាចថ្ងៃទី៣០ ខែតុលា ឆ្នាំ២០១៨។ រហូតមកដល់ថ្ងៃទី០១ ខែវិច្ឆិកា ឆ្នាំ២០១៨ ការិយាល័យកម្ពុជាថ្មី មិនទាន់អាចស្វែងរកការបញ្ជាក់បន្ថែមពី លោក សែម បូរ៉ា អគ្គនាយកស្ថាប័នទូរទស្សន៍អនឡាញ TNM បាននៅឡើយទេ។
តាមរបាយការណ៍របស់សមត្ថកិច្ចខេត្តកំពង់ចាម ដែលបានដាក់ជូននាយឧត្ដមសេនីយ៍សន្តិបណ្ឌិត អគ្គស្នងការនគរបាលជាតិ ក្រោយពីការចាប់ខ្លួននេះ លោក សែម បូរ៉ា បានឆ្លើយសារភាពថា ខ្លួនពិតជាបានយកលុយចំនួន៣លើកពីលោក ទេព្យ ភារម្យ មែន ដែលមានចំនួន៦៥.៥០០ដុល្លារ។
តាមរបាយការណ៍ប៉ូលិស លោក សែម បូរ៉ា បានឆ្លើយសារភាពយ៉ាងនេះថា “ខ្លួនពិតជាបានធ្វើជាអ្នកតំណាងឲ្យប្រជាពលរដ្ឋទាំង៨គ្រួសារខាងលើ ដើម្បីលក់ដីទំហំ៧,៩៧ហិកតា នៅតំបន់អញ្ចាញ ស្ថិតក្នុងភូមិចុង ឃុំសំបូរ ស្រុកបាធាយ ខេត្តកំពង់ចាម។
បន្ទាប់មកនៅថ្ងៃទី១៨ ខែឧសភា ឆ្នាំ២០១៨ ក៏ទទួលបានប្រាក់កក់ចំនួន៨.០០០ដុល្លារ បន្ទាប់មកនៅថ្ងៃទី២១ ខែកក្កដា ឆ្នាំ២០១៨ ឈ្មោះ សែម បូរ៉ា បានទទួលប្រាក់កក់ពីឈ្មោះ ទេព ភារម្យ ៣៩.៥០០ដុល្លារ និងនៅក្នុងខែកក្កដាដដែលនេះ ក្រោយ៤ថ្ងៃ បានទទួលប្រាក់កក់១៨.០០០ដុល្លារទៀត ពីឈ្មោះ ទេព ភារម្យ។ សរុបទាំងអស់ប្រាក់ដែលទទួលបានពីឈ្មោះ ទេព ភារម្យ ទាំង៣លើកមានចំនួន៦៥.៥០០ដុល្លារ...”។
ទាក់ទងបញ្ហានេះ ក្រោយពីដោះលែង គេឃើញមានប្រជាពលរដ្ឋមួយក្រុម ដែលអះអាងថា រស់នៅភូមិចុង ឃុំសំបូរ ស្រុកបាធាយ ខេត្តកំពង់ចាម និងបានពឹងពាក់ឲ្យលោក សែម បូរ៉ា ជួយដោះស្រាយបញ្ហាដីធ្លី បានចេញមកអបអរសាទរផងដែរ និងបានលើកឡើងថា លោក សែម បូរ៉ា ត្រូវបានតុលាការដោះលែងមកវិញហើយ។ ជាមួយគ្នានោះ ពួកគាត់បានថ្លែងអំណរគុណអភិបាលខេត្តកំពង់ចាម និងប្រធានតុលាការផងដែរ ដែលបានរកយុត្តិធម៌ដល់លោក សែម បូរ៉ា ក៏ដូចជាពួកគាត់ទាំង៨គ្រួសារ៕
Source: Kampuchea Thmey Daily
0 Comments