អ្នកកាសែត Jamal Khashoggi ត្រូវបានគេរឹត.កភ្លាមៗនៅពេលដែលគាត់ចូលស្ថានកុងស៊ុលអារ៉ាប៊ីសាអ៊ូឌីតក្នុងទីក្រុងអ៊ីស្តង់ប៊ុល ហើយ បន្ទាប់មក “កាត់សាកសពជាបំណែក”។ នេះបើតាមការឲ្យដឹងពីរដ្ឋអាជ្ញារបស់ប្រទេសទួរគីកាលពីថ្ងៃពុធដែលនេះជាការធ្វើសេចក្ដីលម្អិតអំពីការសម្លាប់ជាសាធារណៈលើកដំបូង។
សេចក្តីថ្លែងការណ៍មួយពីការិយាល័យរដ្ឋអាជ្ញា Irfan Fidan បាននិយាយថា កិច្ចប្រជុំជាមួយសមភាគីអារ៉ាប៊ីសាអ៊ូឌីតរបស់គាត់ដែលបានធ្វើទស្សនកិច្ចទីក្រុងអ៊ីស្តង់ប៊ុលនៅសប្តាហ៍នេះគឺមិនបាននាំមកនូវលទ្ធផលជាក់ស្តែងទេស្តីពីការសម្លាប់នេះដែលវាត្រូវបានគេបាននិយាយថា គិតទុកជាមុន។
លោក Khashoggi ដែលជាអ្នកកាសែត Washington Post អាយុ៥៩ឆ្នាំត្រូវបានគេធ្វើឃាតបន្ទាប់ពីចូលក្នុងស្ថានកុងស៊ុលអារ៉ាប៊ីសាអ៊ូឌីតប្រចាំទីក្រុងអ៊ីស្តង់ប៊ុលកាលពីថ្ងៃទី២ខែតុលាដើម្បីទទួលយកឯកសារមុនពិធីរៀបមង្គលការនាពេលខាងមុខរបស់គាត់។ សាកសពរបស់គាត់មិនទាន់ត្រូវបានគេរកឃើញនៅឡើយទេ។
សេចក្តីថ្លែងការណ៍នេះបានកើតឡើងប៉ុន្មានម៉ោងបន្ទាប់ពីព្រះរាជអាជ្ញាសាធារណៈរបស់ប្រទេសអារ៉ាប៊ីសាអ៊ូឌីតបានបញ្ចប់ដំណើរទស្សនកិច្ចរបស់គាត់នៅទីក្រុងអ៊ីស្តង់ប៊ុល។
អគ្គមេធាវីអារ៉ាប៊ីសាអ៊ូឌីតលោក Sheikh Saud al-Mojeb ត្រូវបានគេរាយការណ៍ថា បានបដិសេធចែករំលែកព័ត៌មានពីការស៊ើបអង្កេតផ្ទាល់ខ្លួនរបស់ទីក្រុងរីយ៉ាដ។
ការិយាល័យរបស់រដ្ឋអាជ្ញាទីក្រុងអ៊ីស្តង់ប៊ុលបាននិយាយនៅក្នុងសេចក្តីថ្លែងការណ៍មួយថា “យោងតាមផែនការដែលបានគិតទុកជាមុន ជនរងគ្រោះឈ្មោះ Jamal Khashoggi ត្រូវបានគេរឹត.កដល់ស្លាប់ភ្លាមៗបន្ទាប់ពីចូលស្ថានកុងស៊ុលនៅថ្ងៃទី២ខែតុលា”។
ការិយាល័យបានបន្ថែមថា “សាកសពរបស់ជនរងគ្រោះត្រូវបានគេកាត់ជាបំណែកនិងកម្ទេចបន្ទាប់ពីការស្លាប់របស់គាត់ដោយសារថប់ដង្ហើមស្របតាមផែនការគិតទុកជាមុន”។
ស្របពេលជាមួយគ្នានោះ អាជ្ញាធរទួរគីបាននិយាយថា ពួកគេមិនពេញចិត្តទាល់តែសោះបន្ទាប់ពីកិច្ចចរចាជាមួយព្រះរាជអាជ្ញាអារ៉ាប៊ីសាអ៊ូឌីត។
លោកប្រធានាធិបតី Recep Tayyip Erdogan បានជំរុញម្តងហើយម្តងទៀតឲ្យទីក្រុងរីយ៉ាដបង្ហាញទីតាំងនៃសាកសពនិងអ្នកដែលបញ្ជាឲ្យធ្វើឡើងនេះ៕ AFP
Source: Kampuchea Thmey Daily
0 Comments