ភ្នំពេញ ៖ បន្ទាប់ពីមានគ្រោះអគ្គីភ័យបានបំផ្លាញលំនៅឋានរបស់ប្រជាពលរដ្ឋរស់នៅក្នុងភូមិអូរអណ្តូង សង្កាត់ព្រែកប្រា នាវេលាម៉ោង៧ព្រឹកថ្ងៃទី១២ ខែវិច្ឆិកាមក គឺនៅព្រឹកថ្ងៃដដែលលោកអភិបាលខណ្ឌច្បារអំពៅបានផ្តល់អំណោយដល់ម្ចាស់ផ្ទះរងគ្រោះភ្លាមៗ។
អំណោយដែលត្រូវបានលោកចេង មុនីរ៉ា អភិបាលនៃគណៈអភិបាលខណ្ឌច្បារអំពៅផ្តល់ដល់ប្រជាពលរដ្ឋរងគ្រោះចំនួន៤គ្រួសារដែលក្នុងមួយគ្រួសារទទួលបានអង្ករចំនួន៣០គីឡូក្រាម មី២កេស ទឹកស៊ីអ៊ីវ២យួរ ទឹកបរិសុទ្ធ១កេស ត្រីខ១០កំប៉ុង សម្ភារៈផ្ទះបាយ២០មុខ និងថវិកាចំនួន១០ម៉ឺនរៀល។
យោងតាមប្រសាសន៍លោកចេង មុនីរ៉ា អភិបាលនៃគណៈអភិបាលខណ្ឌច្បារអំពៅបានឲ្យកម្ពុជាថ្មីដឹងថា កាលពីវេលាម៉ោង៧ព្រឹកថ្ងៃទី១២ខែវិច្ឆិកានេះ មានអគ្គីភ័យកើតឡើងនៅចំណុចក្រុមទី១១ភូមិអូរអណ្តូង សង្កាត់ព្រែកប្រា ខណ្ឌច្បារអំពៅ ដែលបណ្តាលឲ្យផ្ទះ៣ខ្នងត្រូវបំផ្លាញអស់។
មូលហេតុនៃគ្រោះអគ្គីភ័យនេះ បើតាមការស្រាវពីសមត្ថកិច្ចគឺផ្តើមឡើងដោយទុសេខ្សែភ្លើង។
លោកអភិបាលខណ្ឌបានបញ្ជាក់ទៀតថា ក្នុងហេតុការណ៍នេះ គឺរូបលោកនិងលោកអភិបាលរងខណ្ឌចំនួន២រូប បានចុះទៅដល់ចំណុចកើតហេតុ ហើយក្នុងនោះមានការអន្តរាគមន៍ពីរថយន្តពន្លត់អគ្គីភ័យចំនួន៦គ្រឿង បានចុះទៅបាញ់ពន្លត់បានទាន់ពេល ទើបមិនបង្កឲ្យឆាបឆេះជាបន្តទៅទៀត និង ម្យ៉ាងទៀតផ្ទះកើតហេតុនៅជាប់នឹងផ្លូវលេខ៣៦៩។
តាមសេចក្តីរាយការណ៍បានឲ្យដឹងថា អគ្គីភ័យនេះគឺផ្តើមចេញពីម្ចាស់ផ្ទះឈ្មោះច្រឹក ញៀប ភេទប្រុស អាយុ៧០ឆ្នាំ មុខរបរលក់ដូរដែលសង់ពីថ្មក្រោមឈើលើនិងមានទំហំ៦ម៉ែត្រគុណនិង៨.៥ម៉ែត្រ។ ដោយឡែកផ្ទះ២ខ្នងទៀត ដែលឆាបឆេះ២ខ្នងទៀតនោះ គឺសង់ពីឈើលើថ្មក្រោមដូចគ្នា។
លោកចេង មុនីរ៉ា បានបញ្ជាក់ទៀតថា អគ្គីភ័យនេះបានចំណាយពេលអស់៥០នាទីទើបរលត់ទៅវិញប៉ុន្តែមិនបណ្តាលឲ្យប៉ះពាល់ដល់អាយុជីវិតប្រជាពលរដ្ឋឡើយ។ ហើយបន្ទាប់ពីអគ្គីភ័យបានរលត់ទៅលោកចេងមុនីរ៉ា អភិបាលនៃគណៈអភិបាលខណ្ឌច្បារអំពៅបានរួសរាន់រៀបចំអំណោយមកផ្តល់ជូនដល់ដៃប្រជាពលរដ្ឋដែលរងគ្រោះចំនួន៤គ្រួសារស្មើនឹង៣ខ្នងផ្ទះ ដើម្បីជួយសម្រាលទុក្ខដល់គាត់ដោយមិនពន្យារពេលឡើយ៕
Source: Kampuchea Thmey Daily
0 Comments