ជិះ​ម៉ូតូ​ធំ​តម្លៃ​រាប់ពាន់​ដុល្លារ​ មក​ឆក់​កាបូប​របស់​ជនបរទេស​ត្រូវ​អស់លក្ខណ៍​

ភ្នំពេញ​ ៖ ​ជន​សង្ស័យ​ជំនាញ​ខាង​ឆក់​ទ្រព្យសម្បត្តិ​របស់​ជនបរទេស​ម្នាក់ ​ខណៈ​ជិះ​ម៉ូតូ​ធំ​ម៉ាក​XR ដែល​មាន​តម្លៃ​រាប់ពាន់​ដុល្លារ​ ត្រូវ​ជាប់អន្ទាក់​របស់​កម្លាំង​នគរបាល​ខណ្ឌ​ដូនពេញ​ ក្រោយពី​ធ្វើ​សកម្មភាព​បានសម្រេច​ហើយ​ តែ​ព្រះ​មិន​ជួយ​ ពេល​បើក​រត់​ទៅ​បុក​នឹង​ម៉ូតូ​អ្នកដំណើរ​១​គ្រឿង​ទៀត​ដួល​ប្រកាច់​ត្រូវ​ចាប់​បាន​ភ្លាមៗ​។​

សមត្ថកិច្ច​បាន​ឲ្យ​ដឹងថា ​ក្នុង​កិច្ចប្រតិបត្តិការ​បង្ក្រាប​ករណី​លួច​មាន​ស្ថាន​ទម្ងន់ទោស​ប្រើ​អំពើ​ហិង្សា (​ជិះ​ម៉ូតូ​ឆក់​កាបូប​)​នេះ​ បាន​កើតឡើង​វេលា​ម៉ោង​១៣​និង​៣០​នាទី ថ្ងៃ​ទី​០៩ ខែ​វិច្ឆិកា ឆ្នាំ​២០១៨ ស្ថិត​នៅ​ចំណុច​មុខផ្ទះ​លេខ​៣៦៩​អឺ​០ នៅ​ផ្លូវ​ព្រះស៊ីសុវត្ថិ ភូមិ​១ សង្កាត់​ជ័យជំនះ ខណ្ឌ​ដូនពេញ រាជធានី​ភ្នំពេញ​​ ដែល​បង្កឡើង​ដោយ​ជនសង្ស័យ​មាន​បក្ខពួក​ចំនួន​០៣​នាក់ ជិះ​ម៉ូតូ​ចំនួន​០៣​គ្រឿង (​ម្នាក់​០១​គ្រឿង​) ដោយ​ពេលនោះ​ ជនសង្ស័យ​ម្នាក់​ឈ្មោះ​ ជា អ៊ាង ភេទ​ប្រុស ​អាយុ​២៨​ឆ្នាំ​ ដែល​ជិះ​ម៉ូតូ XR ពណ៌​ក្រហម បាន​ធ្វើ​សកម្មភាព​ឆក់​កាបូប​ពី​ជនជាតិ​កូរ៉េ​ម្នាក់ ភេទ​ប្រុស អាយុ​៤៦​ឆ្នាំ ដែល​កំពុង​ធ្វើ​ដំណើរ​តាម​បណ្ដោយ​ផ្លូវ​ព្រះស៊ីសុវត្ថិ​ ពី​ទិស​ខាងត្បូង​ទៅ​ជើង ​បានសម្រេច​ដាក់​លើ​ម៉ូតូ។ ពេល​នោះ​ជនរងគ្រោះ​បាន​ស្រែក​ឆោឡោ​ត្រូវបាន​កម្លាំង​ប៉ុស្តិ៍​ និង​ខណ្ឌ​ នៃ​អធិការដ្ឋាន​នគរបាល​ខណ្ឌ​ដូន​ពេញ​ដែល​កំពុង​ល្បាត​នៅក្បែរនោះ​ឃើញ​ បាន​ជិះ​ម៉ូតូ​ដេញតាម​ពីក្រោយ​ធ្វើការ​ឃាត់ខ្លួន​បាន​ជន​សង្ស័យ​០១​នាក់​ឈ្មោះ ​ជា អ៊ាង ភេទ​ប្រុស អាយុ​២៨​ឆ្នាំ ដែលជា​អ្នកជិះ​ម៉ូតូ​ធ្វើ​សកម្មភាព​ឆក់ រួមជា​មួយ​វត្ថុតាង​កាបូប​ជនរងគ្រោះ និង មធ្យោបាយ​ម៉ូតូ​ម៉ាក XR ពណ៌​ក្រហម របស់​ជនសង្ស័យ​ជិះ​ធ្វើ​សកម្មភាព នាំមក​អធិការដ្ឋាន​នគរបាល​ខណ្ឌ​ដូនពេញ ដើម្បី​ធ្វើការ​សាកសួរ ចំណែក​បក្ខពួក​ចំនួន​០២​នាក់​ទៀត​ជា​អ្នក​ជិះ​ម៉ូតូ​បិទ​គូថ​បាន​ជិះ​គេចខ្លួន​។​

សមត្ថកិច្ច​ផ្នែក​ជំនាញ​បាន​ឲ្យ​ដឹង​ទៀតថា ​ជា​លទ្ធផល​ឃាត់ខ្លួន​ជនសង្ស័យ​ចំនួន​០១​នាក់​ ឈ្មោះ ជា អ៊ាង ភេទ​ប្រុស អាយុ​២៨​ឆ្នាំ ជនជាតិ​ខ្មែរ មុខរបរ​មិន​ពិតប្រាកដ ស្នាក់​នៅផ្ទះ​លេខ​១២២​បេ ផ្លូវ​លំ ភូមិ​ក្បាលដំរី សង្កាត់​កា​កាប ខណ្ឌ​ពោធិ៍​សែន​ជ័យ រាជធានី​ភ្នំពេញ។​ ចំណែក​វត្ថុតាង​ចាប់យក ម៉ូតូ​មួយ​គ្រឿង​ម៉ាក XR ពណ៌​ក្រហម ពាក់​ស្លាក​លេខ ភ្នំពេញ​1FS-3148 លេខ​តួ​២០០១៩៧៩ លេខ​ម៉ា​ស៊ីន​៤៤០៥២៣២​ កាបូបដៃ​ពណ៌​សូកូឡា​មួយ និង​អត្តសញ្ញាណប័ណ្ណ​សញ្ជាតិ​ខ្មែរ​មួយ​(​ជា​របស់​ជន​សង្ស័យ​)​។ ​កាបូប ពណ៌​ខ្មៅ​មួយ មាន​Ipad4 ពណ៌​ប្រផេះ​មួយ​,​កាស​ទូរស័ព្ទ​ដៃ ពណ៌​ខ្មៅ ម៉ាក​JABRA មួយ​,​កាបូប​លុយ ពណ៌​ខ្មៅ​មួយ (​បានប្រគល់​ជូន​ជនរងគ្រោះ​ជា​បណ្ដោះអាសន្ន​វិញ​)​។​

ជនរងគ្រោះ​ឈ្មោះ KIM JAEMOON ភេទ​ប្រុស អាយុ​៤៦​ឆ្នាំ ជនជាតិ​កូរ៉េខាងត្បូង​ កាន់​លិខិតឆ្លង​ដែន​លេខ M62106352 ស្នាក់នៅ​ផ្ទះសំណាក់​អូ​ហា​ណា​ ផ្ទះ​លេខ​០៤ ផ្លូវ​លេខ​១៤៨ ភូមិ​៦ សង្កាត់​ផ្សារ​កណ្តាល​ទី​១ ខណ្ឌ​ដូនពេញ រាជធានី​ភ្នំពេញ​។​

សមត្ថកិច្ច​បញ្ជាក់​ថា​ ចំពោះមុខ​ សមត្ថកិច្ច​ បាន​និង​កំពុង​ប្រើប្រាស់​វិធានការ​ជំនាញ​សួរចម្លើយ បន្ត​យក​បក្ខពួក​នៅ​សេសសល់​ ព្រមទាំង​ប្រវត្តិ​សកម្មភាព​ប្រព្រឹត្ត​បទល្មើស​នៅ​តាម​ភូមិសាស្ត្រ បណ្ដា​ខណ្ឌ​ផ្សេងៗ​កន្លងមក។ ទិសដៅ​បន្ត កម្លាំង​ជំនាញ​ខណ្ឌ​ប៉ុស្តិ៍​ បន្ត​ពង្រឹង​ និង​ជំរុញ​ ការអនុវត្ត​ទប់​ស្កាត់​បទល្មើស​គ្រប់​ប្រភេទ​តាម​បទបញ្ជា​ដ៏​ខ្ពង់ខ្ពស់​របស់​ លោក ស ថេត អគ្គ​ស្នងការ​រង និង​ជា​ស្នង​ការ​នគរបាល​រាជធានី​ភ្នំពេញ​ជាប់​ជាប្រចាំ​៕

Source: Kampuchea Thmey Daily