ភ្នំពេញ ៖ ជនសង្ស័យ៣នាក់ ត្រូវបានសមត្ថកិច្ចខណ្ឌឫស្សីកែវដេញប្រផាប់ចាប់ប្រភីង បានជាបន្តបន្ទាប់ ក្រោយពីពួកគេធ្វើសកម្មភាពឆក់ទូរស័ព្ទពីជនរងគ្រោះមិនបានសម្រេច កាលពីវេលាម៉ោង០៨និង៣៩នាទីយប់ ថ្ងៃទី០៩ ខែវិច្ឆិកា ឆ្នាំ២០១៨ តាមបណ្ដោយផ្លូវជាតិលេខ០៥ ត្រង់ចំណុចក្រុមទី០៤ ភូមិឡកំបោរ សង្កាត់ស្វាយប៉ាក ខណ្ឌឫស្សីកែវ។
ករណីឆក់ទូរស័ព្ទដៃមិនបានសម្រេច បង្កឡើងដោយជនសង្ស័យទាំង៣នាក់នោះ ទី១-ឈ្មោះ ជា ហេង ភេទប្រុស អាយុ២១ឆ្នាំ ជនជាតិខ្មែរ ទីលំនៅផ្ទះជួល ភូមិស្ទឹងមានជ័យ សង្កាត់ស្ទឹងមានជ័យ ខណ្ឌមានជ័យ មុខរបរកម្មករសំណង់។ ទី២-ឈ្មោះ ឃន រ៉ាសាន់ ភេទប្រុស អាយុ១៨ឆ្នាំជនជាតិខ្មែរ មានទីលំនៅភូមិកំពង់ត្របែក ឃុំកំពង់ត្របែក ស្រុកកំពង់ត្របែក ខេត្តព្រៃវែង មុខរបរបុគ្គលិកហាង។ ទី៣-ឈ្មោះ ទី សុខគង់ ភេទប្រុស អាយុ២០ឆ្នាំ ជនជាតិខ្មែរ មានទីលំនៅផ្ទះជួល សង្កាត់សែនសុខ ខណ្ឌសែនសុខ មុខរបរកម្មកររោងចក្រ អ្នកទាំង៣មានសារធាតុញៀននៅក្នុងខ្លួន។
សមត្ថកិច្ចបានឲ្យដឹងថា នៅវេលាម៉ោងខាងលើ ជនរងគ្រោះ និងជនសង្ស័យ ធ្វើដំណើរស្របទិសគ្នាពីជើងទៅត្បូង ដោយជនរងគ្រោះជិះម្នាក់ឯង បានថតឡាយតាមទូរស័ព្ទដៃ លុះដល់ចំណុចកើតហេតុ ត្រូវបានជនសង្ស័យធ្វើសកម្មភាពឆក់ទូរស័ព្ទពីជនរងគ្រោះតែមិនសម្រេច ក៏ឮសំឡេងជនរងគ្រោះស្រែកចោរៗ ក៏បានកម្លាំងសមត្ថកិច្ចកំពុងធ្វើការល្បាតដេញតាមប្រផាប់ប្រភីងរហូតឃាត់ខ្លួនជាបន្តបន្ទាប់ នៅចំណុចផ្លូវជាតិលេខ០៥ ភូមិទួលសង្កែ សង្កាត់ទួលសង្កែទី១។ ជនរងគ្រោះពុំបានដាក់ពាក្យបណ្ដឹងឡើយ។
ចំណែកសម្ភារៈដកហូតរួមមាន ម៉ូតូ០២គ្រឿង ម៉ាកសេ១២៥ ពណ៌ខ្មៅ ពាក់ស្លាកលេខ ស្វាយរៀង ១J ៥៣១៥ មួយគ្រឿង និងម៉ាកសេ១២៥ ពណ៌ខ្មៅ ពាក់ស្លាកលេខ ស្វាយរៀង ១B ២២៥៧ មួយគ្រឿង។
បច្ចុប្បន្ន ជនសង្ស័យ ត្រូវបានសមត្ថកិច្ចកសាងសំណុំរឿងចាត់ការតាមនីតិវិធី៕
Source: Kampuchea Thmey Daily
0 Comments