រតនគិរី ៖ ប្រជាពលរដ្ឋជាច្រើននាក់ រស់នៅក្នុងភូមិល្អើនក្រើន និងភូមិល្អើនជន ស្ថិតក្នុងឃុំអូរជុំ ស្រុកអូរជុំ ខេត្តរតនគិរី ដែលកើតមានអាការៈរាគក្អួត និងធេងធោង ចាប់តាំងពីថ្ងៃទី០១ ដើមខែវិច្ឆិកានេះ បានបន្តកើនឡើងកាន់តែច្រើនដល់ចំនួន២០៣នាក់ ដែលបានបង្កការព្រួយបារម្ភកាន់តែខ្លាំងដល់ប្រជាពលរដ្ឋទាំងចាស់ និងក្មេង ក្នុងភូមិទាំងនេះ ជាពិសេសគឺភូមិល្អើនក្រើន ដែលមានចំនួនអ្នកកើតមានអាការៈដូចនេះរហូតដល់១៧៩នាក់។
នេះបើតាមការបញ្ជាក់ពី លោក យន ជាង មានអាយុ៣០ឆ្នាំ ជាបងប្អូនជនជាតិដើមភាគតិចទំពួន មានតួនាទីជាអនុប្រធានភូមិល្អើនក្រើន ដែលបានរៀបរាប់ប្រាប់សារព័ត៌មានយើងដឹងនាថ្ងៃទី០៩វិច្ឆិកានេះ។
អនុប្រធានភូមិល្អើនក្រើនរូបនេះ បានរៀបរាប់ទៀតថា កាលពីដើមខែវិច្ឆិកានេះ ដំបូងឡើយ អ្នកដែលកើតមានអាការៈដូចនេះមានចំនួនតិចតួចនោះទេ ប៉ុន្តែរហូតដល់ថ្ងៃទី០៨វិច្ឆិកា ក្នុងពិធីបុណ្យសព អាការៈដូចនេះបានបង្កកើតឡើងដល់អ្នកភូមិរហូតដល់ចំនួន១៧៣នាក់ ហើយនៅព្រឹកថ្ងៃទី០៩វិច្ឆិកានេះដែរ ក៏បន្តកើនឡើងដល់ចំនួន២០៣នាក់តែម្ដង។
អនុភូមិដែលជាជនជាតិទំពួនរូបនេះបានឲ្យដឹងទៀតថា បន្ទាប់ពីមានករណីបែបនេះកើតឡើងហើយនោះ អាជ្ញាធរមានសមត្ថកិច្ច រួមទាំងមន្ត្រីសុខាភិបាលខេត្ត ក៏បានជួយអន្តរាគមន៍ ជួយដឹកបញ្ជូនជនរងគ្រោះទាំងនោះទៅកាន់មណ្ឌលសុខភាព ដើម្បីជួយសង្គ្រោះបានទាន់ពេលវេលាផងដែរ ដោយពុំមាននរណាម្នាក់រងគ្រោះដល់បាត់បង់ជីវិតនោះទេ។
ទន្ទឹមហ្នឹងមានករណីនេះកើតឡើងហើយនោះ អនុប្រធានភូមិល្អើនក្រើនរូបនេះ ក៏បានអំពាវនាវដល់អាជ្ញាធរគ្រប់លំដាប់ថ្នាក់ រួមទាំងមន្ទីរសុខាភិបាលខេត្ត ឲ្យជួយធ្វើសិក្សាស្រាវជ្រាវ និងកោសល្យវិច័យ ថាតើមកពីបញ្ហាអ្វីឲ្យពិតប្រាកដ។
ទន្ទឹមហ្នឹងការអំពាវនាវនេះ រូបលោក ក៏បានទទួលស្គាល់ថា ប្រជាពលរដ្ឋក្នុងភូមិរបស់គាត់មានការយល់ដឹងអំពីសុវត្ថិភាពចំណី និងអនាម័យ នៅមានកម្រិត។
លោក ប៉ាវ ប៉េងហ៊ួត អាយុ៣៧ឆ្នាំ ជាបងប្អូនជនជាតិទំពួន រស់នៅក្នុងភូមិល្អើនក្រើន បានលើកឡើងឲ្យដឹងដែរថា កន្លងមក ក្នុងភូមិរបស់ពួកគាត់ពុំដែលកើតមានបញ្ហាដូចនេះកើតឡើងនោះទេ នេះគឺជាលើកទី១ហើយ។
ទាក់ទងទៅហ្នឹងករណីខាងលើនេះ លោក អ៊ុង រតនា ប្រធានមន្ទីរសុខាភិបាលខេត្តរតនគិរី បានឲ្យដឹងតាមការសន្និដ្ឋានជាបឋមថា ជាករណីកង្វះអនាម័យម្ហូបអាហារ ខណៈដែលអ្នកភូមិទាំងពីរខាងលើ បាននាំគ្នាចូលរួមពិធីបុណ្យសព ដោយបានរៀបចំពិធីសែនព្រេងតាមបែបប្រពៃណីរបស់បងប្អូនជាតិដើមភាគតិច ដោយមានការចម្អិនអាហារដោយការកាប់ក្របី និងម្ហូបចំណីផ្សេងទៀត ដើម្បីស្រស់ស្រូបអាហារជុំគ្នានាពិធីបុណ្យសពនោះ។
ទន្ទឹមហ្នឹងនោះ ប្រធានមន្ទីរសុខាភិបាលខេត្តរូបនេះ ក៏បានអំពាវនាវដល់ប្រជាពលរដ្ឋទាំងអស់ សូមឲ្យបង្កើនការប្រុងប្រយ័ត្នខ្ពស់ចំពោះសុវត្ថិភាពចំណីអាហារ ដោយចាំបាច់ត្រូវតែអនុវត្តន៍ឲ្យបានជាប្រចាំនូវការ ហូបស្អាត ផឹកស្អាត និងរស់នៅស្អាត៕
Source: Kampuchea Thmey Daily
0 Comments