រតនគីរី ៖ ក្មេងប្រុសម្នាក់ បានស្លាប់ភ្លាមៗនៅនឹងកន្លែងកើតហេតុយ៉ាងអាណោចអាធ័មបំផុត ខណៈដែលហក់ឡើងជិះពីក្រោយគោយន្តកន្ត្រៃ ដែលកំពុងបើកបរ ស្រាប់តែរអិលជើងធ្លាក់បោកក្បាលមកដីតែម្ដង។
ហេតុការណ៍នេះ បានកើតឡើងនៅវេលាម៉ោង៥និង៣០នាទីល្ងាច ថ្ងៃព្រហស្បតិ៍ ១កើត ខែកត្តិក ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី០៨ ខែវិច្ឆិកា ឆ្នាំ២០១៨ ត្រង់ចំណុចផ្លូវលំក្រាលក្រួសក្រហម ស្ថិតនៅក្នុងភូមិប៉ាតត់ ឃុំសេដា ស្រុកលំផាត់ ខេត្តរតនគិរី។
បើតាមនគរបាលមូលដ្ឋានបានឲ្យដឹងថា ជនរងគ្រោះឈ្មោះ ខាំ ស ភេទប្រុស អាយុ១១ឆ្នាំ ជាសិស្ស ជនជាតិទំពួន។
នគរបាលបន្តថា ម្ចាស់គោយន្តកន្ត្រៃឈ្មោះ យាំង ខៀវ ភេទប្រុស អាយុ១៨ឆ្នាំ ជនជាតិខ្មែរ ទាំងជនរងគ្រោះ និងម្ចាស់គោយន្ត រស់នៅភូមិ/ឃុំកើតហេតុខាងលើដូចគ្នា។
នគរបាលបានបន្តទៀតថា ដោយយោងតាមការបំភ្លឺពីម្ចាស់គោយន្ត និងសាក្សីនៅកន្លែងកើតហេតុនោះ មុនពេលកើតហេតុគោយន្តកំពុងបើកបរតាមផ្លូវ ស្រាប់តែក្មេងប្រុសរងគ្រោះបានរត់តាមពីក្រោយ ហើយហក់ឡើងជិះ តែអកុសលបណ្ដាលឲ្យរអិលជើងធ្លាក់ផ្កាប់មុខ បាក់.ក ស្លាប់ភ្លាមៗនៅកន្លែងកើតហេតុតែម្ដង។
ក្រោយកើតហេតុ គោយន្តកន្ត្រៃ និងម្ចាស់ សមត្ថកិច្ចមិនបានឃាត់ខ្លួននោះឡើយ សំអាងលើទី១- ក្មេងប្រុសរងគ្រោះជាអ្នកបង្កដោយខ្លួនឯង។ ទី២-ម្ចាស់គោយន្តមិនបានបុកជនរងគ្រោះដែរ ឯសំណងអ្វីក៏មិនបានសងទៅជនរងគ្រោះដែរ គ្រាន់តែម្ចាស់គោយន្តជួយចេញធ្វើបុណ្យសពឲ្យអស់ជាងមួយលានរៀល។
នគរបាល ធ្វើការត្រួតពិនិត្យសាកសពរួច ក៏បានប្រគល់ឲ្យឪពុកម្ដាយធ្វើបុណ្យតាមប្រពៃណីជនជាតិដើមភាគតិចទំពួន៕
Source: Kampuchea Thmey Daily
0 Comments