ភ្នំពេញ ៖ ព្រះមហាក្សត្រខ្មែរ ព្រះករុណា ព្រះបាទសម្តេចព្រះបរមនាថ នរោត្តម សីហមុនីនៅក្នុងទិវាបុណ្យ ឯករាជ្យជាតិខួប ៦៥ ឆ្នាំ ថ្ងៃ ៩ វិច្ឆិកា ២០១៨ បានថ្លែងការកោតសរសើរចំពោះសម្តេចអគ្គមហាសេនាប តីតេជោ ហ៊ុន សែន នាយករដ្ឋមន្ត្រីកម្ពុជាថា ជាប្រមុខដឹកនាំរាជរដ្ឋាភិបាលដ៏ឆ្លាតវៃ បានដាក់ចេញនូវគោលនយោបាយដ៏ត្រឹមត្រូវបាននាំមកនូវសុខសន្តិភាព សាមគ្គីភាព ឯកភាពជាតិមានកិត្យានុភាពល្បីរន្ទឺលើឆាកអន្តរជាតិ។
នៅក្នុងព្រះរាជសុន្ទរកថាពីលើវេទិកាច័ន្ទឆាយា ព្រះមហាក្សត្រខ្មែរព្រះករុណា ព្រះបាទសម្តេចព្រះបរមនាថ នរោត្តម សីហមុនី បានមានព្រះរាជបន្ទូលថា៖ «រយៈពេលកន្លងមកនេះមាតុភូមិកម្ពុជា និងប្រជាពលរដ្ឋយើងមានការប្រែប្រួលមុខមាត់ថ្មីគួរឲ្យកោតសរសើរ។ សម្តេចអគ្គមហាសេនាបតីតេជោ ហ៊ុន សែន ជាប្រមុខដឹកនាំរាជរដ្ឋាភិបាល ដ៏ឆ្លាតវៃ បានដាក់ចេញនូវគោលនយោបាយដ៏ត្រឹមត្រូវបាននាំមកនូវសុខសន្តិភាព សាមគ្គីភាព ឯកភាពជាតិ មានកិត្យានុភាពល្បីរន្ទឺលើឆាកអន្តរជាតិ»។
ក្នុងព្រះរាជសុន្ទរកថាប្រកបដោយអត្ថន័យខ្លឹមសារនោះ ព្រះមហាក្សត្រខ្មែរ បានរំលឹកពីព្រះរាជស្នាព្រះហស្ថ និងព្រះបូជនីយកិច្ចរបស់ព្រះមហាវីរក្សត្រខ្មែរ វររាជបីតាឯករាជ្យជាតិខ្មែរ ព្រះករុណា ព្រះបរមរតនកោដ្ឋ នរោត្តម សីហនុ ក្នុងការតស៊ូទាមទារឯករាជ្យជាតិ និងសិទ្ធិសេរីភាពរបស់ប្រជាពលរដ្ឋខ្មែរពីនឹមអាណានិគមបារាំង។
ព្រះករុណា ព្រះបាទសម្តេចព្រះបរមនាថ នរោត្តម សីហមុនី ក៏បានមានព្រះរាជបន្ទូលបង្ហាញការពេញទឹកព្រះទ័យចំពោះវឌ្ឍនភាពជាតិ សេចក្តីសុខក្សេមក្សាន្ត និងការរក្សាបាននូវសុខសន្តិភាពក្នុងមាតុភូមិកម្ពុជានាពេលបច្ចុប្បន្នផងដែរ។ ជាពិសេសព្រះមហាក្សត្របានបង្ហាញការពេញព្រះទ័យចំពោះការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលបានធ្វើឲ្យជាតិកម្ពុជាទទួលបានសុខសន្តិភាពពេញលេញ នាំមកនូវភាពរីកចម្រើន និងការរស់នៅប្រកបដោយសេចក្តីសុខរបស់ប្រជាពលរដ្ឋខ្មែរ។
នៅក្នុងព្រះរាជសុន្ទរកថាថ្លែងទៅកាន់ជនរួមជាតិពីលើវេទិកា ព្រះករុណាព្រះមហាក្សត្រនៃព្រះរាជាណាចក្រកម្ពុជាបានមានព្រះរាជបន្ទូលវាយតម្លៃខ្ពស់ចំពោះសុន្ទរកថារបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា ថា គឺមានអត្ថន័យនិងខ្លឹមសារជ្រាលជ្រៅណាស់ ដែលព្រះអង្គសូមអបអរសាទរ និងកោតសរសើរនិងគាំទ្រហើយសូមចាត់ទុកថា នេះជាសារនយោបាយមួយមានលក្ខណៈគ្រប់ជ្រុងជ្រោយក្នុងការវាយតម្លៃសភាពការណ៍សង្គមជាតិយើង និងសភាពការណ៍អន្តរជាតិ ជាពិសេសលើវិស័យសេដ្ឋកិច្ច សង្គមកិច្ច ក្នុងការអភិវឌ្ឍ កែប្រែមាតុភូមិកម្ពុជានិងជីវភាពរស់នៅរបស់ប្រជាពលរដ្ឋសំដៅកាត់ បន្ថយភាពក្រីក្រជាបន្តបន្ទាប់។
ក្នុងមហាអង្គមីទ្ទីងដ៏មហោឡារឹកនាព្រឹកមិញនេះ អង្គព្រះមហាក្សត្រខ្មែរ ក៏បានបង្ហាញទឹកព្រះទ័យសង្ឃឹមនិងជឿជាក់ មាតុភូមិ និងប្រជាជនកម្ពុជា នឹងទទួលបានអនាគតភ្លឺស្វាងក្នុងក្តីសង្ឃឹមខ្ពស់រស់នៅក្រោមដំបូលរដ្ឋធម្មនុញ្ញតែមួយ ដែលធានាបានឯកភាពជាតិដ៏រឹងមាំក្រោមទង់ដ៏ជាញជ័យ នៃមហាសាមគ្គីជាតិ ក្រោមទង់ដ៏សុខសាន្តនៃព្រះពុទ្ធសាសនា និងបារមីព្រះបរមក្សត្រដែលជាបុព្វបុរសជាតិ ជាស្ថាបនិកដ៏ល្បីល្បាញនៃការកសាងប្រាង្គប្រាសាទដ៏ល្អប្រណីតស្ថិតនៅស្កឹមស្កៃស្ថិតនៅគ្រប់ទិសទីនៅទូទាំងប្រទេសកម្ពុជា។ ជាពិសេសមាតុភូមិដែលជាកេរមរតកដ៏លមានតម្លៃមិនអាចកាត់ថ្លៃបាននេះ នឹងពុំអាចមានសត្រូវណាមួយរំលោភឈ្លានពានលើបូរណភាពទឹកដីបានឡើយ។
សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាក្នុងមហាអង្គមិទ្ទីងនេះ ក៏បានអញ្ជើញឡើងថ្លែងសុន្ទរកថាទៅកាន់មន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋខ្មែរផងដែរ។ សម្តេចនាយករដ្ឋមន្ត្រី បានគូសរំលេចពីស្នាព្រះមហាវីរក្សត្រខ្មែរ ព្រះវររាជ្យបិតាជាតិខ្មែរ ព្រះបរមរតនកោដ្ឋ នរោត្តម សីហនុ ក្នុងព្រះរាជបូជនីយកិច្ចដឹកនាំតស៊ូទាមទារឯករាជ្យ និងសិទ្ធិសេរីភាពពីអាណានិគមបារាំង។ ដោយសារតែថ្ងៃនេះជាថ្ងៃកំណើតកងកម្លាំងប្រដាប់អាវុធដែរនោះ សម្តេចតេជោ បានថ្លែងអំណរគុណដល់កងកម្លាំងប្រដាប់អាវុធទាំងអស់ ដែលបានប្រឹងប្រែងរួមគ្នាជាមួយរាជរដ្ឋាភិបាលថែរក្សាការពារបាននូវសុខសន្តិភាព ស្ថិរភាព និងសន្តិសុខសណ្តាប់ធ្នាប់របស់ប្រទេសជាតិ។
នៅចំពោះព្រះភក្ត្រព្រះមហាក្សត្រខ្មែរ មន្ត្រីរាជការ កងកម្លាំងប្រដាប់អាវុធ និងមហាជននោះ សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា ក៏បានប្រកាសប្តេជ្ញាបន្តប្រឹងប្រែងអស់កម្លាំងកាយចិត្ត ដើម្បីជំរុញការអភិវឌ្ឍជាតិ ឲ្យកាន់តែរីកចម្រើន និងនាំមកនូវការរីកចម្រើនសម្រាប់ជាតិកម្ពុជា ដោយឈរលើស្មារតី និងគោលការណ៍សំខាន់ៗចំនួន៤រួមមាន៖
ទី១. បន្តកសាងប្រទេសជាតិឲ្យមានវឌ្ឍនភាពលើគ្រប់វិស័យ មានសាមគ្គីជាតិរឹងមាំ សីលធម៌សង្គម សមធម៌ សេរីភាព និងយុត្តិធម៌ លទ្ធិប្រជាធិបតេយ្យ និង សិទ្ធិមនុស្ស ដើម្បីជីវភាពសម្បូរណ៍សប្បាយរុងរឿងរបស់ប្រជាជន និងភាពសុខដុមរមនាទាំងក្នុងគ្រួសារ សហគមន៍ និងសង្គមជាតិទាំងមូល
ទី២. ការពារឯករាជ្យជាតិ សន្តិភាព អធិបតេយ្យ និងបូរណភាពទឹកដី ការពារសមិទ្ធផលសង្គមជាតិ លើកកម្ពស់កិត្យានុភាពជាតិ ទប់ស្កាត់ការជ្រៀតជ្រែកកិច្ចការផ្ទៃក្នុងកម្ពុជា និងប្រឆាំងដាច់ខាតរាល់សកម្មភាពដែលពាក់ព័ន្ធបដិវត្តន៍ពណ៌ ឬការញុះញង់ណាមួយ ដែលបង្កឲ្យមានអស្ថេរភាពនយោបាយ ឬចលាចលក្នុងសង្គមជាតិកម្ពុជា។
ទី៣. បន្តដោះស្រាយព្រំដែនគោក និងទឹកជាមួយប្រទេសជិតខាងដោយផ្អែកលើមូលដ្ឋានច្បាប់អន្តរជាតិ និងជំរុញអនុវត្តន៍យុទ្ធសាស្ត្រអភិវឌ្ឍន៍តំបន់ព្រំដែនឲ្យទៅជាព្រំដែនសន្តិភាព សន្តិភាព និងសហប្រតិបត្តិការ និងមិនអនុញ្ញាតឲ្យបរទេសប្រើប្រាស់ទឹកដីកម្ពុជា ដើម្បីប្រឆាំងនឹងប្រទេសជិតខាង។
ទី៤. ទប់ស្កាត់ និងបង្ក្រាបបទល្មើសគ្រប់ប្រភេទរួមមាន៖ ហិរញ្ញប្បទានភេវរកម្ម ការសំអាតប្រាក់ ការជួញដូរមនុស្ស អាជីវកម្មផ្លូវភេទ ឧក្រិដ្ឋកម្មឆ្លងដែនគ្រប់ប្រភេទ និងបន្តជំរុញអនុវត្តន៍គោលនយោបាយភូមិឃុំមានសុវត្ថិភាពឲ្យមានប្រសិទ្ធភាព៕
Source: Kampuchea Thmey Daily
0 Comments