ការប្រកួតជម្រុះដណ្តើមខ្សែក្រវាត់ជើងឯកWurkz ទម្ងន់៦៧គីឡូក្រាម នៅសង្វៀនទូរទស្សន៍SEATV នារសៀលថ្ងៃអាទិត្យ ទី១១ ខែវិច្ឆិកា ឆ្នាំ២០១៨នេះ ជាការប្រកួតជុំចុងក្រោយរបស់អ្នកប្រដាល់កម្ពុជា ពុទ្ធ ឆាយរិទ្ធី ក្លិបពុទ្ធសេរីវង្សកីឡា និងអ្នកប្រដាល់ថៃKao Ah ខណៈដែលអ្នកប្រដាល់កម្ពុជា មាជ សុខរ៉ា ក្លិបតាព្រហ្មមានជ័យ ត្រូវជួបជាមួយអ្នកប្រដាល់ថៃ Pheach Aroun។
សម្រាប់ជំនួបក្នុងជុំចុងក្រោយនេះ រវាង ពុទ្ធ ឆាយរិទ្ធី និង Kao Ah នេះ ពួកគេទាំងពីរនាក់នេះ មិនធ្លាប់ជួបគ្នាទេកន្លងមក។
ពុទ្ធ ឆាយរិទ្ធី និង Kao Ah នេះ បើតាមការកត់សម្គាល់នោះ Kao Ah ប្រហែលជាពុំអាចឈ្នះ ពុទ្ធ ឆាយរិទ្ធី នោះទេ ដោយសារKao Ah គេមិនជាខ្លាំងប៉ុន្មាននោះ។ គេមានប្រវត្តិប្រកួតចំនួន៦៥លើក ឈ្នះ៥៤លើក ចាញ់១១លើក មិនដែលស្មើ ខណៈដែល ពុទ្ធ ឆាយរិទ្ធី គេមានកំណត់ត្រាប្រកួត១១០លើក ឈ្នះ៨៤លើក ចាញ់២៤លើក និងស្មើ០២លើក។
Kao Ah ជាអ្នកប្រដាល់ចំណូលថ្មី ឆ្លងកាត់៣ប្រកួតដូចគ្នាKao Ah ឈ្នះបានតែ១ប្រកួតប៉ុណ្ណោះ ដោយចាញ់២ប្រកួត បាន៥ពិន្ទុ។ ទោះជាយ៉ាងណាក្តី សម្រាប់ការជួបគ្នានេះ ពុំអាចសន្និដ្ឋានមុនថា អ្នកណាឈ្នះ អ្នកណាចាញ់នោះឡើយ ហើយពីរនាក់នេះ ក៏មិនអាចអ្នកណាមើលស្រាលអ្នកណាបានដែរ។
កាលពីប្រកួតជុំទី៣ ពុទ្ធ ឆាយរិទ្ធី ឈ្នះ Pheach Aroun ដោយពិន្ទុ ដែលសរុបបីប្រកួតឈ្នះ២ចាញ់១ បាន៧ពិន្ទុ ឯ Kao Ah គេវាយចាញ់ មាជ សុខរ៉ា ក្លិបតាព្រហ្មមានជ័យ ក្នុងទឹកទី១ សរុបបីប្រកួត សុខរ៉ាបាន៥ពិន្ទុ គឺឈ្នះ១ ចាញ់២ប្រកួត។ ចាំមើល ក្នុងជុំទី៤ដែលជាជុំចុងក្រោយនេះ តើនរណារកបាន៣ពិន្ទុនោះ?។
ចំពោះ មាជ សុខរ៉ា និង Pheach Arounវិញ មិនដឹងថានរណារកបាន៣ពិន្ទុនោះដែរ?។ សុខរ៉ា និង Pheach Aroun ពួកគេក៏មិនធ្លាប់ជួបគ្នាដែរកន្លងមក។
មាជ សុខរ៉ា ក្នុង៣ប្រកួតកន្លងមក បាន៥ពិន្ទុ គឺឈ្នះ១ ចាញ់ពីរប្រកួត។ សម្រាប់ការជួប Pheach Aroun លើកនេះ ពុំដឹងថា មាជ សុខរ៉ា អាចយកឈ្នះ Pheach Aroun បានឬអត់នោះទេ?។
មាជ សុខរ៉ា គេហាក់ដូចជាឡើងចុះៗ។ ទោះបីរបៀបវាយរបស់គេ នៅតែល្អ និងនៅរហ័សក៏ពិតមែន តែកម្លាំង និងទឹកចិត្តរបស់គេស្រុតចុះ។ សុខរ៉ា គេមានប្រវត្តិប្រកួតចំនួន៦៣លើក ឈ្នះ៥៣លើក ចាញ់០៩លើក និងស្មើ០១លើក។
ចំពោះ Pheach Aroun វិញ គេជាជើងខ្លាំង។ Pheach Aroun គេមានកំណត់ត្រាប្រកួតចំនួន៩៣លើក ឈ្នះ៨២លើក ចាញ់១១លើក មិនដែលស្មើ។ ចាំមើល ការប្រកួតក្នុងជុំចុងក្រោយនេះ រវាង មាជ សុខរ៉ា និង Pheach Aroun តើនរណារកបាន៣ពិន្ទុនោះ?។
ដោយឡែក ការប្រកួតក្រៅពីគូខ្សែក្រវាត់នេះ ធន់ អៀងឡៃ អ្នកប្រដាល់សមាគមកីឡាប្រដាល់ក្រសួងការពារជាតិ ត្រូវគេផ្គូឲ្យជួបប្រកួតជាមួយ ម៉ន ភារម្យ អ្នកប្រដាល់ក្លិបការិយាល័យទី៥ កងទ័ពជើងគោក ដោយជួបគ្នាក្នុងប្រភេទទម្ងន់៥៤គីឡូក្រាម។ អ្នកប្រដាល់ពីរនាក់នេះ មិនធ្លាប់បានប៉ះគ្នាទេកន្លងមក។
ម៉ន ភារម្យ ថ្វីត្បិតតែជាអ្នកប្រដាល់ចាស់វស្សា ប៉ុន្តែគេវាយមិនសូវច្បាស់ប៉ុន្មានឡើយ។ ដូច្នេះសម្រាប់ការប្រកួតជាមួយធន់ អៀងឡៃ ដែលជាអ្នកប្រដាល់ស្រករក្រោយនោះ ពុំដឹងថា ផារម្យ អាចយកឈ្នះ អៀងឡៃ បានឬអត់នោះទេ?។
ឈាន រស្មី អ្នកប្រដាល់ក្លិបរាជសីហ៍ខេត្តរតនគិរី នឹងជួបសាកកណ្ដាប់ដៃជាមួយ ចាន់ រក្សា អ្នកប្រដាល់ក្លិបអេភូថងកីឡា។ សម្រាប់ការជួបគ្នារវាងអ្នកប្រដាល់ទាំងពីរនាក់នេះ ត្រូវបានគេរំពឹងថា ម៉ន ភារម្យ ប្រហែលជាពុំអាចយកឈ្នះ ធន់ អៀងឡៃ នោះឡើយ៕
Source: Kampuchea Thmey Daily
0 Comments