សេក​ គឹម​សាន្ត​,​កំពែង​ខ្មៅ​,​ធន់ អៀង​ឡៃ​ និង ​វុត្ថា លាន់​លិញ តើ​នរណា​នៅ នរណា​ជ្រុះ​ធ្លាក់?

ការ​ប្រកួត​ប្រដាល់​ដណ្ដើម​ពាន​រង្វាន់​ជើងឯក​TV5 Knock Out Series by K.cement ទម្ងន់​៥៧​គីឡូក្រាម លើ​សង្វៀន​TV5 ព្រែកកំពឹស នៅ​ថ្ងៃ​សៅរ៍​ ទី​១៧ ខែ​វិច្ឆិកា​ ឆ្នាំ​២០១៨​នេះ ជា​ការ​ប្រកួត​លើក​ទី​៤ ក្នុង​ជម្រុះ​ដំណាក់កាល​ទី​១ ដែលមាន​អ្នក​ប្រដាល់​៤​រូប ដើម្បី​ប្រជែង​យក​កៅអី​សម្រាប់​ដំណាក់​កាល​ទី​២​បន្តទៀត​នោះ។​
​
សម្រាប់​ការប្រកួត​ជម្រុះ​លើក​ទី​៤​នេះ សេក គឹម​សាន្ត អ្នក​ប្រដាល់​ក្លិប​អង្គរ​មានជ័យ ខេត្ត​សៀមរាប នឹង​ជួប​ប្រកួត​ជាមួយ ​កំពែង ខ្មៅ អ្នក​ប្រដាល់​សមាគម​កីឡាប្រដាល់​ក្រសួងកសិកម្ម។
​
ការជួបគ្នា​រវាង​ សេក គឹម​សាន្ត និង កំពែង ខ្មៅ នេះ តាម​ក្រុម​អ្នក​វិភាគ​ប្រដាល់​អះអាង​នោះ​ថា សេក គឹម​សាន្ត ប្រហែលជា​មិន​ឈ្នះ​ កំពែង ខ្មៅ នោះឡើយ។ ព្រោះ ​កំពែង ខ្មៅ គេ​ជា​អ្នក​ប្រដាល់​មាន​ឈ្មោះ​បោះ​សំឡេង និង​ឆ្លងកាត់​ការប្រកួត​ច្រើន​ទាំង​ជាមួយ​ខ្មែរ​គ្នាឯង ក៏ដូចជា​ជាមួយ​ថៃ​ដែរ ។ ហើយ​មួយទៀត កំពែង ខ្មៅ វាយ​បុក​ខ្លាំង​ និង​មាន​ផ្លែ​ល្អ​ជាង​ គឹម​សាន្ត។ ចាំ​មើល តើ​ កំពែង ខ្មៅ អាច​យកឈ្នះ​ សេក គឹម​សាន្ត បានដែរ​ឬ​អត់?។​
​
ការប្រកួត​ក្នុង​ដំណាក់​ទី​១​នេះ គឺ​ប្រកួត​តែ​បី​ទឹក​ទេ ដោយ​ក្នុង​មួយ​ទឹក​មាន​៣​នាទី សម្រាក​២​នាទី ហើយ​អ្នក​ដែល​ឈ្នះ​បាន​ឡើង និង​អ្នក​ដែល​ចាញ់​ត្រូវ​ជ្រុះ​ធ្លាក់​ត្រឹមនេះ។
​
​ចំពោះ​ការប្រកួត​មួយគូ​ទៀត​នោះ ជាការ​ជួបគ្នា​រវាង ធន់ អៀង​ឡៃ អ្នក​ប្រដាល់​សមាគម​កីឡា​ប្រដាល់​ក្រសួងការពារជាតិ និង វុត្ថា លាន់​លិញ អ្នក​ប្រដាល់​ក្លិប​អង្គរ​ធំគុន​ខ្មែរ។ ពីរ​នាក់​នេះ មិន​ធ្លាប់​ប៉ះ​គ្នា​ទេ​កន្លងមក ដោយសារ​ពួកគេ​ទាំងពីរ មាន​កម្រិត​ទីតាំង​សមត្ថភាព​ខុសគ្នា គឺ ​វុត្ថា លាន់​លិញ ជា​អ្នក​ប្រដាល់​ស្រករ​មុន ឯ ធន់ អៀង​ឡៃ​ ជា​អ្នក​ប្រដាល់​ស្រករ​ក្រោយ។
​
ទោះជា​យ៉ាង​នេះ​ក្តី សម្រាប់​ការ​ជួប​គ្នា​លើក​នេះ មិន​ដឹង​ថា លាន់​លិញ​ អាច​យកឈ្នះ​ ធន់ អៀង​ឡៃ បាន​ឬ​អត់​នោះ​ទេ? ព្រោះថា អៀង​ឡៃ គេ​មាន​ស្នៀត​ប្រដាល់​ល្អ និង​មាន​កម្លាំង​កាយសម្បទា​ខ្លាំង​ជាង​លាន់​លិញ ហើយ​ណាមួយ​លើក​នេះ ជាការ​ប្រកួត​ដែល​មិនអាច​ធ្វេសប្រហែស​បាន គឺ​ត្រូវ​មាន​ការ​ប្រយ័ត្ន​រៀងៗ​ខ្លួន។ យ៉ាងណា ការប្រកួត​រវាង​អ្នក​ប្រដាល់​ទាំងពីរ ពុំ​ដឹងថា នរណា​ជា​អ្នកមាន​សំណាង​បាន​ឡើងទៅ​ប្រកួត​បន្តទៀត​នោះទេ?​។​
​
ព្រឹត្តិការណ៍​ប្រកួត​ប្រដាល់​ដណ្ដើម​ពាន​រង្វាន់​ជើងឯក TV5 Knock Out Series by K.cement ទម្ងន់​៥៧​គីឡូក្រាម មាន​អ្នក​ប្រដាល់​ចំនួន​៣២​នាក់​ចូលរួម ហើយ​ចែកចេញជា​៤ ដំណាក់កាល និង​មាន​រូបមន្ត​ប្រកួត គឺ​ដំណាក់​ទី​១​ជាការ​ប្រកួត​ជម្រុះ​ក្នុងចំណោម​៣២​នាក់ ទុក​តែ​១៦​នាក់។​

ដំណាក់​ទី​២ ជាការ​ជម្រុះ​ក្នុងចំណោម​១៦​នាក់ ទុក​៨​នាក់ ហើយ​ដំណាក់កាល​ទី​៣ គឺ​ជម្រុះ​ក្នុង​៨​នាក់​ទុក​៤​នាក់ និង​ដំណាក់កាល​ទី​៤ ជាការ​ប្រកួត​ដំណាក់កាល​ផ្ដាច់ព្រ័ត្រ គឺ​ពាក់កណ្ដាល​ផ្ដាច់ព្រ័ត្រ ​និង​ផ្ដាច់ព្រ័ត្រ។​
​
គិត​មកដល់ពេលនេះ មាន​អ្នក​ប្រដាល់​ចំនួន​៦​រូប​ហើយ ដែល​បាន​កក់​កៅអី​សម្រាប់​ការប្រកួត​ជុំ​ទី​២​នោះ គឺមាន ឆាយ មាស ក្លិប​សំរោង​កោង​ខេត្ត​បាត់ដំបង ,​បឺត សង្ឃឹម ក្លិប​រ៉ា​ហាប់​ស្វាយប៉ាក ,​អេ រដ្ឋា អ្នក​ប្រដាល់​ក្លិប​អេ​ភូ​ថង​កីឡា , វ៉ាន់ វឿន ក្លិប​ឃ្លាំងមឿង​កីឡា​, សៀវ ង៉ុ​យ ក្លិប​កងពលធំ​អន្តរាគមន៍​លេខ​២ និង ពុទ្ធ ធា​រិន្ទ ក្លិប​ពុទ្ធ​សេរី​វង្ស៕


Source: Kampuchea Thmey Daily