គ្រួសារនារីរងគ្រោះ ទាមទារឲ្យតារាចម្រៀងសាន់ដេ យឿន អនុស្សាវរីយ៍ ចេញមុខទទួលខុសត្រូវលើទង្វើអាម៉ាស់របស់ខ្លួន

ភ្នំពេញ ៖ ថ្មីៗនេះ មានការទម្លាយរឿងរ៉ាវដ៏អាម៉ាស់របស់តារាចម្រៀងប្រុស ប្រចាំផលិតកម្មសាន់ដេនិងជាអតីតបេក្ខជនប្រឡងចម្រៀងស្ថានីយទូរទស្សន៍អាស៊ីអាគ្នេយ៍ លោក យឿន អនុស្សាវរីយ៍ ក្រោយពេលតារាចម្រៀងប្រុសរូបនេះបានប្រព្រឹត្តទង្វើដ៏ស្មោកគ្រោក លួងលោមបោកយកខ្លួនប្រាណនារីម្នាក់ រហូតមានកូនជាមួយគ្នា ប៉ុន្តែលទ្ធផលចុងក្រោយ បែរជាមិនទទួលខុសត្រូវទៅវិញ។

ការទម្លាយដំណឹងដ៏រសើបនេះ បានធ្វើឲ្យទស្សនិកជន និងមជ្ឈដ្ឋានអ្នកនិយមលេងបណ្ដាញសង្គមហ្វេសប៊ុក មានការភ្ញាក់ផ្អើល និងចាប់អារម្មណ៍គ្រប់គ្នា ខណៈមានមតិជាច្រើនបានបញ្ចេញទស្សនៈរិះគន់តារាចម្រៀង លោក យឿន អនុស្សាវរីយ៍ យ៉ាងចាស់ដៃលើទង្វើមិនទទួលខុសត្រូវរបស់ខ្លួនដែលបណ្ដាលឲ្យនារីម្នាក់រងគ្រោះ(មានកូន) ខណៈដែលលោកក៏មានប្រពន្ធរួចមកហើយផងនោះ។

ស្របពេលដែលមានការបែកធ្លាយរឿងរ៉ាវអាស្រូវរបស់តារាចម្រៀងប្រុសសាន់ដេ លោក យឿន អនុស្សាវរីយ៍ យ៉ាងកក្រើកពេញបណ្ដាញសង្គមហ្វេសប៊ុក រហូតមានបណ្ដាញសារព័ត៌មានមួយចំនួនយកទៅចុះផ្សាយនេះដែរ ភ្លាមៗនោះ ក៏មានប្រភពពីមិត្តភ័ក្ដិ និង ក្រុមគ្រួសារនារីរងគ្រោះ បានចេញមុនទម្លាយព័ត៌មានបន្ថែមជុំវិញរឿងដ៏អាម៉ាស់របស់ លោក យឿន អនុស្សាវរីយ៍ ព្រមជាមួយការទទូចឲ្យតារាប្រុសរូបនេះត្រូវតែចេញទទួលខុសត្រូវនូវទង្វើរបស់ខ្លួនទៀតផង។

ផ្អែកតាមប្រភពពីនារីម្នាក់ដែលអះអាងត្រូវជាបងប្អូនរបស់ជនរងគ្រោះ(នារីមានកូន) បានប្រាប់ឲ្យដឹងបន្ថែមថា តារាចម្រៀងប្រុស លោក យឿន អនុស្សាវរីយ៍ មិនត្រឹមតែប្រើល្បិចស្មោកគ្រោកបោកប្រាស់នារីរងគ្រោះ រហូតឲ្យមានកូននោះទេ គឺបុគ្គលរូបនេះ ថែមទាំងឲ្យប្រពន្ធ និងប្អូនគំរាម និងជេរប្រមាថដល់ជនរងគ្រោះទៀតផង។ មិនតែប៉ុណ្ណោះ រាល់ពេលដែលបងប្អូន ឬនារីរងគ្រោះ ទាមទារឲ្យតារាប្រុសរូបនេះចេញមុខទទួលខុសត្រូវរាល់ទង្វើរបស់ខ្លួន គឺលោក យឿន អនុស្សាវរីយ៍ តែងតែគេចវេះរហូត។

ប្រភពដដែលបានបញ្ជាក់បន្ថែមថា បច្ចុប្បន្ន នារីរងគ្រោះដែលបានជ្រុលជ្រួសខ្លួនប្រាណជាមួយតារាចម្រៀង លោក យឿន អនុស្សាវរីយ៍ គឺគាត់តែងតែបង្ហាញពីភាពឈឺចាប់ដែលចាញ់កលល្បិចតារារូបនេះ។ ម្យ៉ាងទៀត គិតរហូតមកទល់ពេលនេះ កូនរបស់នារីរងគ្រោះមានអាយុបានប្រមាណ១ខែមកហើយ បន្ទាប់ពីការសម្រាល។

កម្ពុជាថ្មី នៅព្រឹកថ្ងៃទី១៤ ខែវិច្ឆិកា ឆ្នាំ២០១៨នេះ នៅមិនទាន់អាចស្វែងរកការបកស្រាយ ឬបំភ្លឺពីសំណាក់តារាចម្រៀងសាន់ដេ លោក យឿន អនុស្សាវរីយ៍ បាននៅឡើយទេ។ ខណៈមានមហាជនជាច្រើនបាននិងកំពុង ធ្វើការរិះគន់កាន់តែខ្លាំងលើតារាចម្រៀង លោក យឿន អនុស្សាវរីយ៍ បន្ទាប់ពីមានការបែកធ្លាយដំណឹងដ៏រសើបខាងលើនេះ៕