ភ្នំពេញ ៖ រដ្ឋបាលរាជធានីភ្នំពេញ នឹងផ្ដល់សេវារដ្ឋបាលលើវិស័យសុរិយោដីជូនពលរដ្ឋឲ្យបានល្អប្រសើរ តាមអង្គភាពច្រកចេញចូលតែមួយ។ នេះបើតាមការបញ្ជាក់របស់ លោក ឃួង ស្រេង អភិបាល នៃគណៈអភិបាលរាជធានីភ្នំពេញ ក្នុងកិច្ចប្រជុំមួយ ស្ដីពី ការផ្តល់សេវា រដ្ឋបាល លើវិស័យសុរិយោដី ដល់ប្រជាពលរដ្ឋ ដែលមានបំណងស្នើសុំមករដ្ឋបាលរាជធានីភ្នំពេញតាមរយៈអង្គភាពច្រកចេញចូលតែមួយ កាលពីរសៀលថ្ងៃទី១៣វិច្ឆិកានេះ។
លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញ បានប្រាប់ឲ្យដឹងនៅក្រោយកិច្ចប្រជុំនោះ ថា អង្គភាពច្រកចេញចូលតែមួយ គឺជាយន្តការថ្មីមួយ ដែលជាគោលនយោបាយរបស់រាជ រដ្ឋាភិបាល ដើម្បីជំរុញការផ្តល់សេវាដល់សាធារណៈ ពិសេសសេវាចាំបាច់ឲ្យបានទាន់ពេលវេលាជូនប្រជាពលរដ្ឋ ក្នុងការកាត់បន្ថយការថ្នាំងថ្នាក់ និងកាត់បន្ថយការយកសេវាកម្រៃក្រៅផ្លូវការច្រើនក្រៅពីច្បាប់បានកំណត់។
អ្នកនាំពាក្យរូបនេះបន្តថា ក្នុងកិច្ចប្រជុំនោះ លោក អភិបាល បានស្ដាប់នូវរបាយការណ៍របស់លោកស្រីប្រធានច្រកចេញចូលតែមួយរបស់រដ្ឋបាលរាជធានីភ្នំពេញ ក៏ដូចជាការលើកឡើងរបស់មន្ត្រីជំនាញពាក់ព័ន្ធជុំវិញ ដើម្បីឲ្យការអនុវត្តការងារជូនប្រជាពលរដ្ឋប្រកបដោយប្រសិទ្ធភាព និង អាចទុកចិត្តបាន។
លោក ម៉េត មាសភក្តី បានបញ្ជាក់ទៀតថា លោក ឃួង ស្រេង ក៏បានដាក់ចេញនូវផែនការមួយចំនួនបន្ថែមទៀត ពាក់ព័ន្ធនឹងនីតិវិធីផ្ដល់សេវានេះ ដល់ខណ្ឌទាំងអស់ ក៏ដូចជាមន្ទីរ ដើម្បីបន្តផ្សព្វផ្សាយដល់មន្ត្រីថ្នាក់ក្រោម សម្រាប់អនុវត្តកិច្ចការនេះឲ្យបានយល់ពីការផ្ដល់សេវា ដើម្បីធ្វើយ៉ាងណាជំរុញឲ្យការផ្តល់សេវាជូនប្រជាពលរដ្ឋឆ្លើយតបបានទាន់ពេលវេលាដែលបានកំណត់ដោយច្បាប់ សម្រាប់ការផ្តល់សេវានិមួយៗ។
សូមបញ្ជាក់ថា អង្គភាពច្រកចេញចូលតែមួយរបស់រដ្ឋបាលរាជធានីភ្នំពេញមានពីរ គឺជួរមុខ ជាអ្នកអនុវត្តកិច្ចការផ្នែករដ្ឋបាល និងជួរក្រោយ នៅក្នុងនេះផ្ទាល់ និងមន្ទីរដែនដីនគរូបនីយកម្ម និងសំណង់រាជធានីភ្នំពេញ និង ទីចាត់ការដែលពាក់ព័ន្ធ។
នៅក្នុងអង្គភាពនេះដែរ ក៏មាន១២វិស័យសម្រាប់រៀបចំសេវាជូនពលរដ្ឋ ដែលក្នុងផ្ដោតសំខាន់លើវិស័យសុរិយោដី និងសាធារណការ ដែលមានការពាក់ព័ន្ធច្រើន ក្នុងកិច្ចការបម្រើជូនពលរដ្ឋចំពោះមុខ ដើម្បីដំណើរការឯកសារតាំងពីដើមរហូតដល់ចប់តាមរយៈច្រកចេញចូលតែមួយនេះ។
យ៉ាងណាការដំណើរកិច្ចការផ្ដល់សេវាកម្មនេះ មានភាពស្មុគស្មាញ និង ត្រូវការពេលវេលា ដើម្បីរៀបចំឯកសារ តាមការស្នើសុំរបស់បងប្អូនប្រជាពលរដ្ឋ ដែលបានស្នើមករដ្ឋបាលរាជធានីភ្នំពេញ។
ហើយមន្ត្រីទាំងអស់ បាននិងកំពុង បម្រើការដោយយកចិត្តទុកដាក់ និងប្រឹងប្រែង អនុវត្តឲ្យបានតាមការកំណត់ នៃច្បាប់៕
Source: Kampuchea Thmey Daily
0 Comments