សុខ សា​វិ​ន សាក​កណ្ដាប់ដៃ​ជាមួយ Yort Thournn Thang

សុខ សា​វិ​ន អ្នក​ប្រដាល់​ក្លិប​ឆ្មា​សែន​សុខ​គុន​ខ្មែរ ត្រូវគេ​ផ្ដល់​ឱកាស​ឲ្យ​ជួប​ប្រកួត​សាក​កណ្ដាប់ដៃ​ជាមួយ​អ្នក​ប្រដាល់​ថៃ​ ឈ្មោះ Yort Thournn Thang ជា​លក្ខណៈ​មិត្តភាព​អន្តរជាតិ​ នៅ​សង្វៀន​TV5 ព្រែកកំពឹស នា​យប់​ថ្ងៃ​ទី​១៧ ខែ​វិច្ឆិកា​ ឆ្នាំ​២០១៨​នេះ។ ពីរ​នាក់​នេះ ជួប​គ្នា​ក្នុង​ប្រភេទ​ទម្ងន់​៦៣,៥០០​គីឡូក្រាម។​
​
បើតាម​ លោក​ សេង ក​ដិ​កា អ្នកចាត់ចែង​កម្មវិធី​ប្រដាល់​នៅ​TV5 ឲ្យ​ដឹង​ថា Yort Thournn Thang អ្នក​ប្រដាល់​ថៃ​រូបនេះ មាន​កម្ពស់​ប្រហាក់ប្រហែល​នឹង ​សុខ សា​វិ​ន​ ដែរ តែ​ប្រវត្តិ​ប្រកួត​របស់​គេ គឺ​តិច​ជាង​ សុខ សា​វិ​ន។

Yort Thournn Thang ពុំ​ធ្លាប់​ដែល​មក​ប្រកួត​នៅ​ស្រុក​ខ្មែរ​ម្តង​ណា​នៅឡើយ​ទេ​ពីមុនមក។ ​ជា​លើក​ទី​១​ប៉ុណ្ណោះ​សម្រាប់​អ្នក​ប្រដាល់​ថៃ​រូប​នេះ ដែល​មក​ជួប ​សុខ សា​វិ​ន​ នេះ។ Yort Thournn Thang គេ​មាន​កំណត់ត្រា​ប្រកួត​ចំនួន​៦៥​លើក ដោយ​ឈ្នះ​៥០​លើក ចាញ់​១០​លើក និង​ស្មើ ០៥​លើក ខណៈ​ដែល​សុខ សា​វិ​ន អ្នក​ប្រដាល់​កម្ពុជា​យើង​ប្រកួត​បាន​ចំនួន​៩២​លើក ឈ្នះ​៦៥​លើក ចាញ់​២២​លើក និង​ស្មើ​០៥​លើក។​
​ ​
សុខ សា​វិ​ន ធ្លាប់​ប្រកួត​ជាមួយ​ថៃ​ច្រើន​នាក់​ហើយ​កន្លងមក ដោយ​វាយ​ឈ្នះ​ថៃ​ច្រើនជាង​ចាញ់។​ ការ​ប្រកួត​ជាមួយ​ថៃ​លើក​ចុង​ក្រោយ​នេះ សុខ សា​វិ​ន បាន​ផ្ដួល​ថៃ​ Phat Ngen thong ក្នុង​ទឹក​ទី​៥ កាលពី​ថ្ងៃទី​២៧​ ខែ​តុលា ឆ្នាំ​២០១៨។
​
ជា​អ្នក​ប្រដាល់​ដែល​មាន​ស្នៀត​កែង ជង្គង់ កណ្ដាប់ដៃ​លឿន រហ័ស និង​ខ្លាំង​នោះ សុខ សា​វិ​ន វាយ​មិន​ញញើត​អ្នក​ប្រដាល់​ថៃ​នោះ​ឡើយ។ ចាំមើល តើ​ សុខ សា​វិ​ន អាច​យកឈ្នះ Yort Thou rnn Thang បាន​ឬ​អត់?។ Yort Thournn Thang គេ​ជា​អ្នក​ប្រដាល់​ជើង​ខ្លាំង​មួយរូប​នៅ​ស្រុកថៃ។ នេះ​បើ​តាម​លោក​សេង ក​ដិ​កា អ្នកចាត់ចែង​កម្មវិធី​ប្រដាល់​ប្រចាំ​TV5​ឲ្យ​ដឹង​នោះ។​
​ ​
យ៉ាងណា​ចំពោះ សុខ សា​វិ​ន អ្នក​ប្រដាល់​កម្ពុជា​វិញ គេ​ក៏​ជា​អ្នក​ប្រដាល់​ជើង​ខ្លាំង​មួយ​រូប​ដែរ​នៅ​ស្រុក​ខ្មែរ។ ចាំមើល តើ ​សុខ សា​វិ​ន អាច​យកឈ្នះ Yort Thournn Thang បាន​ឬ​អត់ សម្រាប់​ការ​ជួប​គ្នា​លើកដំបូង​នេះ?៕

Source: Kampuchea Thmey Daily