ក្រសួងមហាផ្ទៃ រៀបចំការប្រឡងជ្រើសរើសបេក្ខជនឲ្យចូលបម្រើការងារ ក្នុងក្របខ័ណ្ឌមន្ត្រីពន្ធនាគារក្រសួងមហាផ្ទៃឆ្នាំ២០១៨

Cambodia News November 19, 2018

ភ្នំពេញ ៖ ក្រសួងមហាផ្ទៃ សហការជាមួយរដ្ឋបាលរាជធានីភ្នំពេញ នៅព្រឹកថ្ងៃអាទិត្យ ទី១៨វិច្ឆិកា បានរៀបចំការប្រឡងជ្រើសរើសបេក្ខជនឲ្យចូលបម្រើការងារនៅក្នុងក្របខ័ណ្ឌមន្ត្រីពន្ធនាគារ ក្រសួងមហាផ្ទៃសម្រាប់ ឆ្នាំ២០១៨ ដោយយកវិទ្យាល័យ ជាស៊ីម សន្ធរម៉ុក ធ្វើជាមណ្ឌលប្រឡង។

លោក ប៉ាវ ហមផាន រដ្ឋលេខាធិការក្រសួងមហាផ្ទៃ, លោក ប្រាក់ សំអឿន អគ្គ នាយក នៃអគ្គនាយកដ្ឋានរដ្ឋបាលក្រសួងមហាផ្ទៃ,លោក កើត ឆែ អភិបាលរងរាជធានីភ្នំពេញ បានអញ្ជើញចូលរួមកាត់វិញ្ញាសាសម្រាប់ការប្រឡងនេះ។

តាមការឲ្យដឹងពីមន្ត្រីរៀបចំការប្រឡងបញ្ជាក់ថា សម្រាប់មណ្ឌលរាជធានីភ្នំពេញ មានបេក្ខជន បេក្ខនារីចូលរួមប្រឡងមានចំនួន៤១៦នាក់ មកពីពន្ធនាគាររាជធានីភ្នំពេញ,ពន្ធនាគារខេត្តតាកែវ,ពន្ធនាគារខេត្តកណ្តាល,មណ្ឌលអប់រំកែប្រែទី១,មណ្ឌលអប់រំកែប្រែទី២ មកប្រឡងចូលគ្នាក្នុងរយៈពេលពេញមួយព្រឹកថ្ងៃទី១៨វិច្ឆិកានេះ ដំណាលគ្នានឹងការប្រឡងនៅទូទាំងប្រទេសប្រទេសដែរ។

សម្រាប់មណ្ឌលរាជធានីភ្នំពេញបេក្ខជនដែលត្រូវជ្រើសរើសយកមានចំនួន១០នាក់ ក្នុងចំណោមបេក្ខជន៤១៦នាក់ ស្រី១៣១នាក់។ ចំពោះវិញ្ញាសាដែលត្រូវលើកយកមកប្រឡង ត្រូវបានបែងចែកជា២ ទី១-សម្រាប់មន្ត្រីប្រតិបត្តិនៅពន្ធនាគារ មានចំណេះដឹងទូទៅ ចំណេះដឹងលើវិស័យពន្ធនាគារ និងគណិតវិទ្យា។ ទី២-សម្រាប់មន្ត្រីជំនាញឯកទេស(វេជ្ជបណ្ឌិត ពេទ្យមធ្យម វិស្វករក្សេត្រសាស្ត្រ ស្ថាបត្យករ បសុពេទ្យ និងមន្ត្រីជំនាញព័ត៌មានវិទ្យាប្រឡងលើវិញ្ញាសាចំណេះដឹងទូទៅ ចំណេះដឹងលើវិស័យសិទ្ធិមនុស្ស និងពន្ធនាគារ,និងវិញ្ញាសាជំនាញឯកទេស ដោយប្រើរយៈពេលប្រឡង១ម៉ោងនិង៣០នាទី។

គួរបញ្ជាក់ថា យោងតាមប្រកាសរបស់ក្រសួងមហាផ្ទៃលេខ៤១០៧ប្រ.ក ស្ដីពីការប្រឡងជ្រើសរើសបេក្ខជនឲ្យចូលបម្រើការងារនៅក្នុងក្របខ័ណ្ឌមន្ត្រីពន្ធនាគារក្រសួងមហាផ្ទៃសម្រាប់ឆ្នាំ២០១៨ បានបើកឲ្យមានការប្រឡងប្រជែងជ្រើសរើសបេក្ខជនជាសិស្ស និស្សិតឲ្យចូលបម្រើការងារក្នុងក្របខ័ណ្ឌមន្ត្រីពន្ធនាគារក្រសួងមហាផ្ទៃចំនួន២៥០នាក់ សម្រាប់ឆ្នាំ២០១៨ ដើម្បីចាត់ឲ្យទៅបម្រើការងារនៅពន្ធនាគាររាជធានីភ្នំពេញ និងពន្ធនាគារ ខេត្តនានានៅទូទាំងប្រទេស៕