ភ្នំពេញ ៖ ខណៈដល់ម៉ោងដាំបាយ និងលាងសំអាតបន្លែ ត្រី សាច់ សម្រាប់ចម្អិនអាហារថ្ងៃត្រង់របស់បងប្អូនប្រជាពលរដ្ឋ ក៏ស្រាប់តែពួកគាត់បើកទឹកស្អាត ដែលប្រើរាល់ថ្ងៃនោះ បានប្រែពណ៌ទៅជាក្រហមល្អក់លាយឡំជាមួយដីផង ធ្វើឲ្យពួកគាត់ត្រូវរាំងស្ទះយ៉ាងខ្លាំង ធ្វើអ្វីមិនកើតឡើយ។
ជាក់ស្ដែងនៅវេលាម៉ោង១០ព្រឹក ថ្ងៃទី១៤ ខែវិច្ឆិកា ឆ្នាំ២០១៨នេះ ប្រជាពលរដ្ឋរស់នៅបណ្ដោយផ្លូវលេខ៧៥ កែងផ្លូវលេខ៨៤ ក្នុងភូមិ០៨ ក្រុម១០៨ ក្នុងសង្កាត់ស្រះចក ខណ្ឌដូនពេញ បាននាំគ្នាភ្ញាក់ផ្អើលគ្រប់ៗផ្ទះ ខណៈដែលពួកគាត់បានបើកទឹកចេញពីក្បាលរ៉ូប៊ីនេទឹករបស់ផ្ទះគាត់ ស្រាប់តែឃើញទឹកស្អាតរបស់រដ្ឋាករទឹកបានប្រែក្លាយជាល្អក់កករក្រហមលាយឡំជាមួយដីផងនោះ។
ដោយសារតែមានបញ្ហាបែបនេះប្រពលរដ្ឋដែលរស់នៅភូមិក្រោលគោសង្កាត់គីឡូម៉ែត្រលេខ៦ ក្នុងខណ្ឌឫស្សីកែវ ក៏បានរអ៊ូរទាំថា សព្វថ្ងៃនេះ មិនដឹងជាយ៉ាងម៉េចនោះទេ បានជាទឹករបស់រដ្ឋាករស្វយ័ត ដែលពួកគាត់ប្រើប្រាស់សព្វថ្ងៃនេះ គឺប្រើមិនសូវគ្រប់គ្រាន់នោះទេ ជាពិសេសទៀតនោះ គឺពេលព្រឹកតែម្ដង គឺទឹកចេញតិចៗដូចនោមទាស់ចឹង ប្រើការអីមិនកើតនោះទេ ដោយសារតែទឹកចេញតិចពេក។
ប្រជាពលរដ្ឋបានលើកឡើងទៀតថា ថ្ងៃនេះដែរ បើសិនណាទឹកនៅតែប្រែពណ៌ជាល្អក់បែបនេះកាន់តែយូររាប់ម៉ោងដូច្នេះ តទៅទៀតនោះ ពិតជាពិបាកហើយ ព្រោះភាគច្រើនប្រជាពលរដ្ឋដែលរស់នៅ គ្មានអាង ឬក៏វ៉ាក់សាំងសម្រាប់ស្តុកទឹកប្រើប្រាស់ពេលទឹកស្អាតមានបញ្ហាបែបនេះនោះទេ។
ពាក់ព័ន្ធនឹងបញ្ហានេះដែរ ប្រជាពលរដ្ឋបានសំណូមពរទៅខាងរដ្ឋាករទឹកស្វយ័តរាជធានីភ្នំពេញគួរតែមានវិធានយ៉ាងណាចំពោះបញ្ហាទឹកនៅពេលព្រឹក ហេតុអីបានជាចេញទឹកខុសពីពេលមុនៗនោះ តើមកពីការប្រើប្រាស់ច្រើន ឬក៏បច្ចេកទេសអ្វី?។
សូមបញ្ជាក់ថា ចំពោះបញ្ហាទឹកដែលបើកមកឃើញល្អក់សុទ្ធដីក្រហមនោះ គឺរំលងបានប្រហែលជា២ម៉ោងក្រោយ ក្នុងថ្ងៃដដែលនោះដែរ បានហូរមកសភាពធម្មតាស្អាតវិញហើយ ប្រជាពលរដ្ឋអាចប្រើប្រាស់បាន ហើយដោយគ្រាន់តែស្ទះតិចតួចតែប៉ុណ្ណោះ៕
Source: Kampuchea Thmey Daily
0 Comments