កំពង់ចាម ៖ កូនប្រុសអកតញ្ញូ បានផឹកទឹកត្នោតជូររហូតស្រវឹង ហើយខឹងនឹងឪពុកម្ដាយ ព្រមទាំងប្រពន្ធស្ដីបន្ទោស និងរអ៊ូរទាំច្រំដែលៗពេក ក៏កេះដែកកេះដុតម៉ូតូឆេះខានជិះ និងគំរាមសម្លាប់ថែមទៀតផង។
ប៉ូលិសបានឲ្យដឹងថា ករណីហិង្សាក្នុងគ្រួសារ(បំផ្លិចបំផ្លាញទ្រព្យសម្បត្តិ និងគំរាមកំហែងថា នឹងសម្លាប់) នេះ បានកើតឡើងនៅថ្ងៃទី១៣ ខែវិច្ឆិកា ឆ្នាំ២០១៨ វេលាម៉ោង១៨និង៤០នាទី ចំណុចភូមិអូរប៉ិះ ឃុំជយោ ស្រុកចំការលើ ខេត្តកំពង់ចាម។
ប្រភពព័ត៌មាននៅកន្លែងកើតហេតុបានឲ្យដឹងថា នៅថ្ងៃកើតហេតុ ឈ្មោះ ឈិន ថាវី ភេទប្រុស អាយុ២៧ឆ្នាំ នៅភូមិអូរប៉ិះ ឃុំជយោ ស្រុកចំការលើ ខេត្តកំពង់ចាម បានជិះម៉ូតូ ម៉ាកយ៉ាមាហា ស៊ីរ៉ូស មកផឹកទឹកត្នោតជូរ នៅភូមិថ្នល់បែកកើត ឃុំស្វាយទាប ស្រុកចំការលើ ខេត្តកំពង់ចាម។
ពេលត្រឡប់ទៅដល់ផ្ទះវិញ ក៏បានឈ្លោះប្រកែកជាមួយ ប្រពន្ធ បន្ទាប់មកឪពុកម្ដាយ បានចូលទៅឃាត់ និងស្ដីបន្ទោសពីរឿងដើរផឹកស៊ី ដោយខឹងប្រពន្ធ និងឪពុកម្ដាយស្ដីបន្ទោសឲ្យ ឈ្មោះ ថាវី បានគំរាមថា នឹងសម្លាប់ចោលមួយពូជ បើសិនជាយក វា(ឈិន ថាវី)ទៅដាក់គុក បន្ទាប់មកជនសង្ស័យបានបើកគម្របប្រេងសាំង យកដែកកេះដុតម៉ូតូឆេះអស់តែម្ដង។
លោក ហោ សេងហួរ អាយុ៥៨ឆ្នាំ ត្រូវជាឪពុកបង្កើត របស់ជនសង្ស័យ បានប្ដឹងកម្លាំងប៉ុស្តិ៍ជយោ ធ្វើការឃាត់ខ្លួនជនសង្ស័យនៅកន្លែងកើតហេតុ បញ្ជូនមកអធិការនគរបាលស្រុកចំការលើ ដើម្បីកសាងសំណុំរឿងតាមនីតិវិធី៕
Source: Kampuchea Thmey Daily
0 Comments