ភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអះអាងថា សមាគម អង្គការមិនមែនរដ្ឋាភិបាល មានសិទ្ធិសេរីភាពពេញលេញ ក្នុងការធ្វើសកម្មភាពស្របច្បាប់នៅកម្ពុជា ដោយពុំចាំបាច់ជូនដំណឹងទៅអាជ្ញាធរដូចមុនឡើយ នេះបើយោងតាមលិខិតផ្ញើទៅអភិបាលរាជធានី-ខេត្ត និងជាប្រធានគណៈបញ្ជាការឯកភាព រដ្ឋបាលរាជធានី-ខេត្ត ចុះថ្ងៃទី២៧ ខែវិច្ឆិកា ឆ្នាំ២០១៨។
លិខិតដែលចុះហត្ថលេខាដោយសម្តេចក្រឡាហោម ស ខេង បានឲ្យដឹងថា ដើម្បីពង្រឹងកិច្ចសហប្រតិបត្តិការ និងភាពជាដៃគូ រវាងរាជរដ្ឋាភិបាល និងរដ្ឋបាលថ្នាក់ក្រោមជាតិ ជាមួយសមាគម និងអង្គការមិនមែនរដ្ឋាភិបាល ព្រមទាំងសហគមន៍នានានៅមូលដ្ឋាន ក្រសួងមហាផ្ទៃបានដាក់ចេញនូវសេចក្តីណែនាំមួយ ចុះថ្ងៃទី៣១ ខែតុលា ឆ្នាំ២០១៨។ ក្នុងន័យនេះសមាគម អង្គការមិនមែនរដ្ឋាភិបាល ដែលបានចុះបញ្ជីត្រឹមត្រូវ ស្របតាមច្បាប់ ព្រមទាំងសហគមន៍នានានៅមូលដ្ឋានមានសិទ្ធិសេរីភាពពេញលេញ ក្នុងការធ្វើសកម្មភាពក្នុងព្រះរាជាណាចក្រកម្ពុជា ស្របតាមច្បាប់ និងលិខិតបទដ្ឋានគតិយុត្តិនានា ជាធរមាន ព្រមទាំងលក្ខន្ដិកៈរបស់ខ្លួន ដែលបានតម្កល់ទុកនៅក្រសួងមហាផ្ទៃ ដោយពុំចាំបាច់ជូនដំណឹងដល់អាជ្ញាធរមូលដ្ឋានក្នុងរយៈពេល៣ថ្ងៃ មុនពេលចាប់ផ្ដើមធ្វើសកម្មភាពដូចមុននោះឡើយ។
សូមបញ្ជាក់ថា កាលពីថ្ងៃទី៣១ ខែតុលា ឆ្នាំ២០១៨ ក្រសួងមហាផ្ទៃបានចេញសេចក្តីណែនាំមួយផងដែរ ស្តីពីកិច្ចសហប្រតិបត្តិការរវាងរាជរដ្ឋាភិបាល និងរដ្ឋបាលថ្នាក់ក្រោមជាតិ ជាមួយសមាគម និងអង្គការមិនមែនរដ្ឋាភិបាលក្នុងស្រុក ព្រមទាំងសហគមន៍នានានៅមូលដ្ឋាន៕
Source: Kampuchea Thmey Daily
0 Comments