ក្រុម​ភ្នំពេញក្រោន ចាប់​ផ្ដើម​យុទ្ធនាការ​ប្រកួត​មិត្តភាព​កម្ដៅ​សាច់ដុំ​លើក​ដំបូង​ ក្រោម​ការ​ដឹកនាំ​ពី​សំណាក់​គ្រូ​បង្វឹក​ថ្មី

ក្រុម​ភ្នំពេញក្រោន សមាជិក​ក្នុង​ពានរង្វាន់​លីគ​កំពូល​កម្ពុជា (Metfone Cambodian League) ដែល​ទើបតែងតាំង​លោក Leonardo Vitorino ជនជាតិ​ប្រេស៊ីល​ជា​គ្រូ​បង្វឹក​នោះ បាន​ប្រកាស​ប្រកួត​មិត្តភាព​កម្តៅសាច់ដុំ​ត្រៀម​រដូវកាល​ថ្មី ខាង​មុខ​ហើយ ទោះបី​ជា​អវត្តមាន​កីឡាករ​សំខាន់ៗ​មួយ​ចំនួន​ក៏ដោយ។

កម្មវិធី​ប្រកួត​មិត្តភាព​ក្រៅ​ផ្លូវការ​លើក​ដំបូង នេះ​នឹង​ធ្វើ​ឡើង​នៅ​វេលាម៉ោង​៤​ល្ងាច​ ថ្ងៃទីសៅរ៍ ទី១០​ ខែ​វិច្ឆិកា ចុង​សប្តាហ៍នេះ ដោយ​ក្រុមម្ចាស់ផ្ទះភ្នំពេញក្រោន នឹងត្រូវបើកទ្វារកីឡដ្ឋាន RSN Stadium របស់​ខ្លួន​នៅ​រាជធានី​ភ្នំពេញ ដើម្បី​ស្វាគមន៍​ក្រុម​ក្រសួងការពារជាតិ ដែល​ជា​ផ្នែក​មួយ ​នៃការ​ធ្វើ​តេស្ត​សមត្ថភាព​កីឡាករ​ថ្មី​រៀងៗខ្លួន។ ប្រកួត​នេះ​ដែរ​នឹង​បើក​ឲ្យ​មហាជន​ចូលរួម​ទស្សនា​ដោយ​សេរី ផង​ដែរ។

ក្រុមភ្នំពេញក្រោន ថ្មីៗនេះ បានតែងតាំង​ក្បាល​ម៉ាស៊ីន ថ្មីក្រោយជម្រុះថ្នាក់ដឹកនាំចាស់អស់​បន្ទាប់ពី​ចប់​រដូវកាល​ឆ្នាំ២០១៨។ ចំណែកថ្នាក់ដឹកនាំថ្មីរបស់ក្លិបមានដូចជា លោក លី ហៀង ជាអ្នកចាត់ការ​ទូទៅ​ក្លិប ចំណែក លោក Leonardo Vitorino ជាគ្រូបង្គោលថ្មី ស្របពេលប្អូនប្រុសរបស់ខ្លួន Luis Fernando Vitorino កាន់តំណែងជាគ្រូបង្វឹកអ្នកចាំទីឈុតធំ។ អតីតគ្រូវេស្ទើន លោក ស៊ុំ វណ្ណា បានទទួលតំណែងជាគ្រូជំនួយក្រុមឈុតធំ ខណៈដែលអតីតខ្សែប្រយុទ្ធ កែវ សុខង៉ន ជាអ្នក​ចាត់​ការ​ទូទៅ​ក្រុមឈុតធំ។

ទាំង​លោក​Leonardo Vitorino គ្រូ​បង្វឹក​ក្រុម​ភ្នំពេញក្រោន និង​លោក ភា សុភ័ត្រា គ្រូ​បង្វឹក​របស់​ក្រុម​ក្រសួងការពារជាតិ សុទ្ធ​តែ​ត្រូវ​តាម​ដាន​ និង​ត្រួត​ពិនិត្យ​សមត្ថភាព​កូន​ក្រុម​របស់​ខ្លួន​ និង​សមាជិក​ថ្មីៗ​ទាំង​ខ្មែរ​ និង​បរទេស ដែល​ទើប​តែ​ជ្រើសរើសចេញពីក្រុមថ្នាលយុវជន​ ព្រម​ទាំង​កីឡាករ​មួយ​ចំនួន​ដែល​កំពុង​ស្ថិតក្នុង​ដំណាក់កាល​ធ្វើតេស្ត​សាកល្បង​មុន ​និង​សម្រេច​បញ្ចូល​ពួក​គេ​ទៅ​ក្នុង​ក្រុម​ឈុត​ធំ ​ឬ​យ៉ាងណានោះ។

សម្រាប់​ការ​ប្រកួត​លីគ​កំពូលកម្ពុជាឆ្នាំ២០១៨ កន្លង​មក​នេះ ក្រុម​ទាំង​២​ធ្លាប់​បាន​ប៉ះ​គ្នា​២លើក ដោយ​នៅ​ជើង​ទី១​ ក្រុម​ភ្នំពេញក្រោន បាន​យកឈ្នះក្រុម​ក្រសួងការពារជាតិ ក្នុង​លទ្ធផល ​២-០ ហើយ​នៅ​ជើង​ទី២ វិញ​ក្រុម​ក្រសួងការពារជាតិ បាន​​យក​ឈ្នះ​ក្រុម​ភ្នំពេញក្រោន វិញ​ដោយ​លទ្ធផល​ ៥-១ ក្នុងជើងទី២៕


Source: Kampuchea Thmey Daily