កំពង់ឆ្នាំង ៖ អ្នកចែកចាយ និងប្រើប្រាស់គ្រឿងញៀន២នាក់ និងវត្ថុតាងគ្រឿងញៀន៣កញ្ចប់ ត្រូវបានសមត្ថកិច្ចនគរបាលប្រឆាំងគ្រឿងញៀនខេត្ត សហការជាមួយនគរបាលក្រុងកំពង់ឆ្នាំងចាប់ខ្លួន។
ករណីចែកចាយ និងប្រើប្រាស់គ្រឿងញៀនខាងលើនេះ បានធ្វើឡើងនៅវេលាម៉ោង៣និង៤០នាទីថ្ងៃទី១៣ ខែវិច្ឆិកា ឆ្នាំ២០១៨ ស្ថិតនៅផ្ទះបណ្ដែតទឹកមួយកន្លែងក្នុងភូមិទី៧ សង្កាត់ខ្សាម ក្រុងកំពង់ឆ្នាំង។
សមត្ថកិច្ចនគរបាលប្រឆាំងគ្រឿងញៀនបានឲ្យដឹងថា ក្នុងហេតុការណ៍បង្ក្រាបខាងលើនេះសមត្ថកិច្ចឃាត់ខ្លួនបានជនសង្ស័យប្រុស/ស្រី២នាក់ មាន១-ឈ្មោះ សាន់ ម៉ាស់ ភេទស្រី អាយុ៣១ឆ្នាំ ជនជាតិខ្មែឥស្លាម មុខរបរនេសាទត្រី ជាមុខសញ្ញាចាស់។ ២-ឈ្មោះ ឡាំ វី ភេទប្រុស អាយុ២៦ឆ្នាំ ជនជាតិវៀតណាម មុខរបរនេសាទត្រី និងដកហូត ថ្នាំញៀនបាន៣កញ្ចប់ ទម្ងន់០.៣៤ក្រាម ទូរស័ព្ទដៃ១គ្រឿង ដាវ២ អាវុធកែច្នៃ១ដើម អាំងវ៉ិចទ័ឆក់ត្រី១គ្រឿង បាឡាស្មាច់ជាប់ដោយម៉ាស៊ីនឡាន២គ្រឿង រួមនឹងសម្ភារៈឧបករណ៍ បម្រើដល់ការជក់មួយចំនួនទៀត។
សមត្ថកិច្ចបានឲ្យដឹងទៀតថា ក្នុងកិច្ចប្រតិបត្តិការករណីខាងលើនេះ ជនសង្ស័យម្នាក់ ដែលជាមេខ្លោងជួញដូរគ្រឿងញៀន បានលោតទឹកគេចខ្លួនចូលក្រោយផ្ទះបណ្ដែតទឹកបាត់។
បច្ចុប្បន្ន ជនសង្ស័យទាំង២នាក់ និងវត្ថុតាង ត្រូវបានការិយាល័យនគរបាលប្រឆាំងគ្រឿងញៀនខេត្តកសាងសំណុំរឿងតាមនីតិវិធី បញ្ជូនទៅសាលាដំបូងខេត្តកំពង់ឆ្នាំង ចាត់ការតាមផ្លូវច្បាប់៕
Source: Kampuchea Thmey Daily
0 Comments