ភ្នំពេញ ៖ ដើម្បីរក្សាសន្តិសុខសណ្ដាប់ធ្នាប់ឲ្យបានល្អប្រសើរក្នុងឱកាសបុណ្យអុំទូក អកអំបុក បណ្ដែតប្រទីប និងសំពះ ព្រះខែ ដែលនឹងប្រព្រឹត្តិទៅពីថ្ងៃទី២១ ដល់ថ្ងៃទី២៣ ខែវិច្ឆិកា ឆ្នាំ២០១៨ ខាងមុខនេះ កម្លាំងមានសមត្ថកិច្ចនឹងដាក់ពង្រាយកម្លាំងរហូតដល់ជាង១ម៉ឺននាក់ នៅតាមតំបន់A B និងC ក្នុងនោះកម្លាំងរបស់គណៈបញ្ជាការឯកភាពរាជធានីភ្នំពេញ មានរហូតដល់ជាង៨ពាន់នាក់។
នេះបើយោងតាមផែនការ ការពារដែលលើកឡើងដោយ លោក មានចាន់ យ៉ាដា អភិបាលរងរាជធានីភ្នំពេញ នៅក្នុងកិច្ចប្រជុំមួយកាលពីរសៀលថ្ងៃទី១៤ ខែវិច្ឆិកា ឆ្នាំ២០១៨ នៅសាលារាជធានីភ្នំពេញ ក្រោមអធិបតីភាព លោក ឃួង ស្រេង អភិបាលរាជធានីភ្នំពេញ លោក ស ថេត ស្នងការរាជធានីភ្នំពេញ អភិបាលខណ្ឌទាំង១២ និងមានការចូលរួមពីមន្ត្រីពាក់ព័ន្ធគ្រប់លំដាប់ថ្នាក់មួយចំនួនទៀត។
លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញបានឲ្យដឹងក្រោយកិច្ចប្រជុំនេះថា លោក មានចាន់ យ៉ាដា អភិបាលរងរាជធានីភ្នំពេញ ក្នុងកិច្ចប្រជុំនោះបានលើកឡើងថា បុណ្យអុំទូកឆ្នាំនេះនិងប្រើកម្លាំងសរុបចំនួន១២៧៥៤នាក់ ដើម្បីរក្សាសន្តិសុខសណ្ដាប់ធ្នាប់ជូនប្រជាពលរដ្ឋ ក្នុងនោះសម្រាប់កម្លាំងរបស់គណៈបញ្ជាការឯកភាពរាជធានីភ្នំពេញ មានរហូតដល់៨៦២៥នាក់ ដោយឈរជើងនៅតាមតំបន់សំខាន់ៗចំនួន ៣គឺ តំបន់A,B,C និងចែកជាគោលដៅតូចៗផងដែរ។
លោកក៏បានបញ្ជាក់ផងដែរថា ស្ថានភាពទឹកទន្លេនៅឆ្នាំនេះ ទៀបជាងឆ្នាំទៅរហូតដល់១ម៉ែត្រ ហើយល្បឿនទឹកក៏ហូរយឺតជាងឆ្នាំទៅផងដែរ។
ដោយឡែក សម្រាប់ទូកង ដែលត្រូវចូលរួមប្រកួតនៅឆ្នាំនេះមានចំនួន២៩៨ទូក ខណៈដែលឆ្នាំ២០១៧មានទូក ងត្រឹមតែ២៧០ទូក និង មានកីឡាករជិត២ម៉ឺននាក់។ សម្រាប់ប្រទីបឆ្នាំនេះមានចំនួន១៥ លើសពីឆ្នាំទៅផងដែរ។
លោក ម៉េត មាសភក្តី បន្តថា ចំណែកលោក ឃួង ស្រេង ដែលជាប្រធានអង្គប្រជុំ បានមានប្រសាសន៍លើកឡើងថា បញ្ហាសន្តិសុខ សណ្ដាប់ធ្នាប់ជាបញ្ហាចម្បង ដែលអាជ្ញាធររាជធានីភ្នំពេញត្រូវតែយកចិត្តទុកដាក់ ដូច្នេះលោកជំរុញឲ្យអភិបាលខណ្ឌដូនពេញ និងខណ្ឌចំការមន ត្រូវយកចិត្តទុកដាក់ឲ្យបានខ្ពស់។
លោកអភិបាលបន្តថា បញ្ហាសណ្ដាប់ធ្នាប់នេះ បើមនុស្ស១០០នាក់ ធ្វើឲ្យប៉ះពាល់ផលប្រយោជន៍ មនុស្ស១លាននាក់ យើងត្រូវធ្វើដើម្បីប្រយោជន៍មនុស្ស១លាននាក់នោះហើយ។
ចំណែក ការគ្រប់គ្រងអ្នកលក់ដូរ និងការបើកកន្លែងផ្ញើម៉ូតូ លោកអភិបាលរាជធានីភ្នំពេញ ក៏បានជំរុញឲ្យមានការពិនិត្យឲ្យបានម៉ត់ចត់ផងដែរ មិនអាចឲ្យមានការដំឡើងថ្លៃស្រេចតែចិត្តនោះទេ។
ក្នុងកិច្ចប្រជុំនោះដែរ លោកអភិបាលរាជធានីភ្នំពេញក៏បានធ្វើការណែនាំឲ្យលោកស្នងការនគរបាលរាជធានីភ្នំពេញ ត្រូវធ្វើសន្និសីទកាសែតមួយ ដើម្បីឲ្យប្រជាពលរដ្ឋបានដឹង ពីការពង្វាងចរាចរណ៍ ក៏ដូចជាការចតរយៈពេលប៉ុន្មានថ្ងៃ នៃព្រះរាជពិធីនេះ។
ក្រៅពីនេះ លោកអភិបាលរាជធានី ក៏បានធ្វើការណែនាំឲ្យមន្ទីរសាធារណការ និងដឹកជញ្ជូនរាជធានីភ្នំពេញ ត្រូវបំពេញការងាររបស់ខ្លួនឲ្យបានល្អ ពិសេសលើការដាក់ស្លាកសញ្ញាការពារសួនច្បារ ការដាក់ស្លាកសញ្ញាបង្ហាញពីទីតាំងបង្គន់អនាម័យជាដើម។
ចំណែកមន្ទីរកសិកម្ម ក៏មានការងារត្រូវអនុវត្តផងដែរ នោះគឺការងារចាប់ប្រមូលកំប្លោកនៅក្នុងទន្លេកុំឲ្យរំខានក្នុងព្រះរាជពិធី។
លោក ម៉េត មាសភក្តី បានបន្តថា បើតាមការប៉ាន់ប្រមាណ ព្រះរាជពិធីបុណ្យអុំទូកឆ្នាំនេះ នឹងមានប្រជាពលរដ្ឋរាប់ម៉ឺននាក់មកដើរលេងកម្សាន្តនៅភ្នំពេញ ដូច្នេះលោក ឃួង ស្រេង ក៏បានជំរុញឲ្យមន្ទីរសុខារាជធានី ត្រូវត្រៀមលក្ខណៈលើការសង្គ្រោះបន្ទាន់ឲ្យបានល្អប្រសើរ ពោលគឺត្រូវតែល្អប្រសើរទាំងនៅក្នុងតំបន់ពិធី និងក្រៅតំបន់ពិធី៕
Source: Kampuchea Thmey Daily
0 Comments