អ្នកប្រដាល់ទម្ងន់៦៣,៥០០គីឡូក្រាម ៤រូប នឹងត្រូវជួបប្រកួតគ្នាដណ្ដើមពានរង្វាន់ប្រាក់លានរបស់ទូរទស្សន៍បាយ័ន នាល្ងាចថ្ងៃសៅរ៍ ទី២៤ ខែវិច្ឆិកា ឆ្នាំ២០១៨ខាងមុខនេះ នៅលើសង្វៀនបាយ័នស្ទឹងមានជ័យ។
អ្នកប្រដាល់ទាំង៤រូបនោះ គឺ នូវ ដារ៉ូ ក្លិបអាណាចក្រគុនខ្មែរ , សេក គឹមរួន ក្លិបអង្គរមានជ័យខេត្តសៀមរាប , សុខ សុវណ្ណ អ្នកប្រដាល់ក្លិបកងពលធំអន្តរាគមន៍លេខ២ , និង យ៉ុន ដារ័ត្ន អ្នកប្រដាល់ក្លិបតាឡីដំរីមានរិទ្ធ។ ពួកគេទាំង៤ ត្រូវប្រកួតគ្នាតាមរូបមន្តម៉ារ៉ាតុង គឺចាញ់ហាលអាវ ឈ្នះត្រូវបន្តការប្រកួតទៀត រហូតរកឃើញអ្នកជាប់លេខ១ ជាម្ចាស់ពានរង្វាន់។
សម្រាប់ការជួបគ្នារវាងអ្នកប្រដាល់ជើងខ្លាំងទាំង៤រូបនេះ គឺ នូវ ដារ៉ូ នឹងត្រូវជួបប្រកួតជាមួយ សេក គឹមរួន ពួកគេទាំងពីរមិនធ្លាប់ជួបគ្នាទេកន្លងមក។ រវាងពីរនាក់នេះ បើតាមកម្រិតសមត្ថភាពបច្ចេកទេស និងកាយសម្បទារបស់ពួកគេទាំងពីរនេះ ឃើញថា សេក គឹមរួន ខ្លាំងជាង តែស្នៀតគុន គឺចាញ់ នូវ ដារ៉ូ ទេ។ ទោះជាយ៉ាងណា សម្រាប់ការជួបគ្នាលើកនេះ មិនអាចទស្សន៍ទាយមុនបានថា អ្នកណាហាលអាវ អ្នកណាឡើងទៅផ្ដាច់ព្រ័ត្រនោះឡើយ។
ចំពោះអ្នកប្រដាល់ជើងចាស់ សុខ សុវណ្ណ គេនឹងត្រូវជួបប្រកួតជាមួយអ្នកប្រដាល់ជើងខ្លាំងស្រករក្រោយ យ៉ុន ដារ័ត្ន។ ពួកគេទាំងពីរនេះ ធ្លាប់ជួបគ្នាម្ដងហើយកន្លងមក ដោយ សុវណ្ណ វាយចាញ់ ដារ័ត្ន ដោយពិន្ទុ។ ពួកគេទាំងពីរនាក់នេះ មានថ្វីដៃល្អ ហើយខ្លាំង និងកម្លាំងស៊ុហ្វរឹងមាំដូចគ្នា។ យ៉ាងណា ប៉ះគ្នាលើកនេះ គឺមានលក្ខណៈតឹងតែងហើយ។
ប៉ុន្តែទោះជាយ៉ាងណា រវាងអ្នកប្រដាល់ជើងខ្លាំងទាំង៤រូបនេះ ទោះបីជាមិនដឹងថាអ្នកណាជ្រុះធ្លាក់ អ្នកណានឹងបានឡើងទៅដល់វគ្គផ្ដាច់ព្រ័ត្រ ហើយអ្នកណានឹងក្លាយជាម្ចាស់ពានរង្វាន់នេះក្ដី ក៏គេមើលឃើញមុនថា សេក គឹមរួន និង សុខ សុវណ្ណ អាចនឹងជួបគ្នាក្នុងវគ្គផ្ដាច់ព្រ័ត្រ ដើម្បីប្រជែងគ្នាយកពានរង្វាន់នេះ។
សូមបញ្ជាក់ថា ការប្រកួតចែកចេញជាពីរដំណាក់កាល ដែលដំណាក់កាលទី១ ប្រកួតជម្រុះ ដើម្បីជម្រុះចោលពីរនាក់ដែលចាញ់ៗ ហើយពីរនាក់ដែលឈ្នះនោះ ត្រូវឡើងទៅជួបគ្នាក្នុងដំណាក់កាលទី២ ដែលជាការប្រកួតផ្ដាច់ព្រ័ត្រដណ្ដើមពានអនុស្សាវរីយ៍របស់ស្ថានីយទូរទស្សន៍បាយ័ន។
ការប្រកួតក្នុងដំណាក់កាលទី១ គឺប្រកួតតែ៣ទឹកប៉ុណ្ណោះ ដោយក្នុងមួយទឹកមាន៣នាទី និងការប្រកួតក្នុងដំណាក់កាលផ្ដាច់ព្រ័ត្រ គឺវាយ៥ទឹក តែមួយទឹកវាយតែ២នាទីទេ។
ក្រៅពីគូដណ្ដើមពានរង្វាន់នេះ នីម នន អ្នកប្រដាល់ក្លិបកងពលតូចទ័ពឆ័ត្រយោង៩១១ នឹងជួបប្រកួតជាមួយ អេរ៉ាវ៉ាន់ ចាន់រាជ អ្នកប្រដាល់ក្លិបកុសលកីឡា។ ពួកគេទាំងពីរ នឹងប្រកួតគ្នាក្នុងប្រភេទទម្ងន់៥៧គីឡូក្រាម។
ពីរនាក់នេះ មិនដែលប៉ះគ្នាទេកន្លងមក។ សម្រាប់ការជួបប្រកួតគ្នាលើកដំបូងនេះ មិនដឹងថា អេរ៉ាវ៉ាន់ ចាន់រាជ គេអាចវាយឈ្នះ នីម នន ឬអត់នោះទេ? ព្រោះ អេរ៉ាវ៉ាន់ ចាន់រាជ ជាអ្នកប្រដាល់ជើងថ្មី ។ ប៉ុន្តែយ៉ាងណា អេរ៉ាវ៉ាន់ ចាន់រាជ គេក៏មានស្នៀតប្រដាល់ល្អ និងខ្លាំងគួរសមដែរ៕
Source: Kampuchea Thmey Daily
0 Comments